এডিলেইড অ’ভালত প্ৰথমখন টেষ্টত লজ্জাজনকভাৱে পৰাস্ত হোৱাৰ পিছত, আজিৰ পৰা মেলবৰ্ণত অনুষ্ঠিত হৈছে ভাৰত-অষ্ট্ৰেলিয়াৰ মাজৰ দ্বিতীয় টেষ্ট (বক্সিং ডে)।
পেটাৰ্ণেল লিভ লৈ ঘৰলৈ ওভতা ভাৰতৰ নিয়মীয়া অধিনায়ক বিৰাট কোহলীৰ অনুপস্থিতিত বৰ্ডাৰ-গাভাস্কাৰ ট্ৰফিৰ বাকী মেচকেইখনত নেতৃত্ব দিব উপ-অধিনায়ক আজিংক ৰাহানেই।
দীৰ্ঘদিন ধৰি ভাৰতীয় টেষ্ট দলৰ উপ-অধিনায়কৰ দায়িত্বত আছে ৰাহানে। মিডল অৰ্ডাৰ বেটছমেনজনে ইতিমধ্যে দুখন টেষ্টত ভাৰতক নেতৃত্ব দিছে।
টেষ্টত ৰাহানেৰ অধিনায়ক হিচাপে অভিষেক ঘটে ২০১৭ চনত অষ্ট্ৰেলিয়াৰ বিৰুদ্ধে।
বিৰাট কোহলীয়ে শৃংখলাটোৰ সময়ত আঘাত প্ৰাপ্ত হোৱা বাবে তেওঁ সুযোগ লাভ কৰিছিল। ইয়াৰ পিছতে মেনেজমেণ্টে ৰাহানেক শৃংখলাৰ অন্তিম টেষ্টখনৰ নেতৃত্ব প্ৰদান কৰে।
ধৰমশালাত অনুষ্ঠিত সেই মেচখনত ৰবীন্দ্ৰ জাদেজাৰ আকৰ্ষণীয় প্ৰদৰ্শনৰ ভিত্তিত ভাৰতে অষ্ট্ৰেলিয়াক পৰাস্ত কৰি বৰ্ডাৰ-গাভাস্কাৰ ট্ৰফি দখল কৰে।
উল্লেখণীয় যে অধিনায়কৰ দায়িত্ব লাভ কৰিয়েই ৰাহানেই কেইবাটাও সাহসী পদক্ষেপ গ্ৰহণ কৰা পৰিলক্ষিত হৈছিল। ইয়াৰ ভিতৰত অন্যতম আছিল কোহলীৰ স্থানত কুলদীপ যাদৱক দলত অন্তৰ্ভুক্ত কৰা।
কুলদীপে টেষ্টখনত চাৰিটা উইকেট দখল কৰে আৰু ৰাহানেৰ সিদ্ধান্তক সঠিক বুলি প্ৰমাণ কৰি দিয়ে।
ইয়াৰ পিছত ২০১৮ চনত ৰাহানেই আফগানিস্তানৰ বিৰুদ্ধে অনুষ্ঠিত ঐতিহাসিক টেষ্ট মেচখনত ভাৰতীয় ক্ৰিকেট দলক নেতৃত্ব প্ৰদান কৰিছিল।
বেংগালুৰুত অনুষ্ঠিত মেচখনত ভাৰতে এক ইনিংছ আৰু ২৬২ ৰানত বিজয়ী হৈছিল।
ইয়াৰ উপৰি তেওঁ তিনিখন এদিনীয়া মেচ আৰু দখন টি-২০ মেচতো ভাৰতক নেতৃত্ব প্ৰদান কৰিছে।
তিনিওখন এদিনীয়াতে ভাৰত বিজয়ী হৈছে আৰু টি-২০ মেচ দুখনৰ এখনত জয় আৰু এখনত পৰাস্ত হয়।
উল্লেখ্য যে আজি প্ৰথমবাৰৰ বাবে ৰাহানেই বিদেশত ভাৰতীয় দলক টেষ্টত নেতৃত্ব প্ৰদান কৰিছে।
এই পৰ্যন্ত ৰাহানেই ভাৰতৰ হৈ ৬৬খন টেষ্ট মেচত ১১টা শতক আৰু ২২টা অৰ্ধশতকেৰে ৪,২৪৫ ৰান সংগ্ৰহ কৰিছে।