স্বাভাৱিকতে প্ৰশ্ন হয়, ২০১৬ চনৰ পূৰ্বে বিজেপিৰ নিৰ্বাচনী ইস্তাহাৰ অৰ্থ্যাৎ ভিজন ডকুমেন্টত উল্লেখ কৰা কিমান প্ৰতিশ্ৰুতি পালন কৰিলে? মূল প্ৰতিশ্ৰুতিসমূহ পূৰণত বিজেপি সক্ষম হৈছে নে?
৬ জনগোষ্ঠীৰ জনজাতিকৰণ, বানপানী গৰাখহনীয়াৰ সমস্যাক ৰাষ্ট্ৰীয় সমস্যা হিচাপে ঘোষণা কৰি ইয়াৰ স্থায়ী সমাধান, সকলো বাংলাদেশীয়ে টালি-টোপোলা বান্ধি গৃহ দেশলৈ যাব লাগিব, খোৱাপানীৰ সমস্যা সমাধান, মহানগৰীৰ কৃত্ৰিম বানপানী ৰোধ, সন্ত্ৰাসবাদ, অপৰাধ মুক্ত অসম গঢ় দিয়া, ব্ৰহ্মপুত্ৰ খনন, এক্সপ্ৰেছ হাইৱে নিৰ্মাণ, মূল্যবৃদ্ধি ৰোধ, নিৱনুৱা সমস্যাৰ স্থায়ী সমাধান, নাৰীক সুৰক্ষা দিয়া ইত্যাদি বহু আগশাৰীৰ প্ৰতিশ্ৰুতিৰে ২০১৬ চনৰ বিজেপিৰ নিৰ্বাচনী ইস্তাহাৰ প্ৰকাশ পাইছিল।
কিন্তু প্ৰকৃতাৰ্থত এই প্ৰতিশ্ৰুতিসমূহৰ এটাও পূৰণ নহ’ল বা বহু সমস্যাৰে বৰ্তমানো জৰ্জৰিত হৈ আছে অসম। তেনে সময়তে পুনৰ এবাৰ প্ৰতিশ্ৰুতিৰ বন্যা বোৱোৱা মৰুভুমিৰ মৰিচীকা সদৃশ নিৰ্বাচনী ইস্তাহাৰ প্ৰস্তুত কৰিবলৈ ইতিমধ্যে সাজু হৈ উঠিছে বিজেপি।
অৱশ্যে, এইবাৰ বিজেপিৰ নেতৃত্ব এখোপ চৰা। ৰাইজৰ পৰামৰ্শ লৈহে তেওঁলোকে প্ৰস্তুত কৰি উলিয়াব নিৰ্বাচনী ইস্তাহাৰ।
আজি হেঙেৰাবাৰীস্থিত বিজেপিৰ ৰাজ্যিক কাৰ্য্যালয়ত এক সংবাদমেল সম্বোধন কৰি বিজেপিৰ প্ৰাক্তন সভাপতি নাৰায়ণ চন্দ্ৰ বৰকটকীয়ে এই সন্দৰ্ভত অৱগত কৰি কয় ‘জনসাধাৰণৰ সৰ্বাঙ্গীন উন্নয়নৰ স্বাৰ্থৰ হকে বিজেপিয়ে এইবাৰ পোনপ্ৰথমবাৰৰ বাবে সমাজৰ সকলো শ্ৰেণীৰ লোকৰ দিহা পৰামৰ্শ গ্ৰহণ কৰি দলীয় নিৰ্বাচনী ইস্তাহাৰ প্ৰকাশ কৰাৰ সিদ্ধান্ত গ্ৰহণ কৰিছে।‘
Mission100plus.in নামৰ ৱেবচাইটৰ জৰিয়তে পাইজে নিজৰ দিহা-পৰামৰ্শ দিব পাৰিব বুলি তেওঁ জনায়।
আনহাতে, 73832 নম্বৰৰ জৰিয়তে মিছডকল দি ৰাইজে পৰামৰ্শ আগবঢ়াব পাৰিব বুলি তেওঁ উল্লেখ কৰে।
কাইলৈৰ পৰা আৰম্ভ হ’বলগীয়া ৰাজ্যিক বিজেপিৰ এই কাৰ্য্যসূচী অহা ৩১ জানুৱাৰীত অন্ত পৰিব বুলি তেওঁ জনায়।
উল্লেখযোগ্য যে, বিজেপিয়ে পশ্চিমবংগতো ইতিমধ্যে এই পদক্ষেপ হাতত লৈছে।
উক্ত সংবাদমেলত বিজেপিৰ প্ৰাক্তন সাংসদ জ্যেষ্ঠ নেত্ৰী বিজয়া চক্ৰৱৰ্তী, ৰমেন ডেকা, ৰাজেন গোহাঁই, স্বপ্ননীল বৰুৱা আৰু জয়ন্ত কুমাৰ দাস উপস্থিত থাকে।
২০১৬ ৰ নিৰ্বাচনী ইস্তাহাৰৰ সু-ফল লাভ নকৰা জনসাধাৰণে এতিয়া বিজেপিক কি ধৰণে পৰামৰ্শ আগবঢ়াব সেয়া সময়ত লক্ষণীয় হ’ব।
