ভাৰতৰ ডিজিটেল লেনদেনৰ জগতখনলৈ ডাঙৰ খবৰ কঢ়িয়াই জনপ্ৰিয় মেছেজিং এপ হোৱাটছএপৰ WhatsApp Pay-ই ভাৰতত অনুমতি লাভ কৰিছে।
এটা বাতৰি মতে ৬ ফেব্ৰুৱাৰিত ফেইচবুক কোম্পানিৰ এই এপটোৱে ভাৰতৰ National Payments Corporation of India (NPCI)-ৰ পৰা গুৰুত্বপূৰ্ণ অনুমোদন লাভ কৰিছে।
“National Payments Corporation of India-ই হোৱাটছ এপক পৰ্য্যায়ক্ৰমে ডিজিটেল পেইমেণ্ট সেৱা চলাবলৈ অনুমতি প্ৰদান কৰিছে”, ভাৰতীয় ৰিজাৰ্ভ বেংকৰ এজন নাম প্ৰকাশত অনিচ্ছুক ব্যক্তিৰ উদ্ধৃতি ডেইলি হাণ্টত।
বাতৰিটোৰ মতে, ৰিজাৰ্ভ বেংকৰ পৰা অনুমতি অহাৰ পিছতে NPCI-ৰ অনুমোদনটো লাভ কৰে বৃহৎ মেছেজিং কোম্পানিটোৱে।
জানিব পৰামতে, হোৱাটছ এপে এইটো নিশ্চিতি দিছে যে ই ডেটা ল’কেলাইজেশ্যনৰ মানবোৰ মানি চলিব, যিটোৰ বাবে পেইমেণ্ট সেৱা আৰম্ভ কৰা দুবছৰ পলম কৰিব লগীয়া হ’ল।
WhatsApp Pay-এ প্ৰথম পৰ্য্যায়ত ১০ নিযুত ভাৰতীয় য়ুজাৰক সামৰি ল’ব।
পৰীক্ষামূলকভাৱে ই ২০১৮ চনৰ ফেব্ৰুৱাৰিত আই চি আই চি আই বেংকৰ সহযোগত ইয়াৰ সেৱাৰ সূচনা কৰিছিল। কিন্তু নিয়ামক দিশৰ বাবে সেয়া অব্যাহত ৰাখিবলৈ সক্ষম নহৈছিল।
বৰ্তমান হোৱাটছ এপৰ য়ুজাৰৰ সংখ্যালৈ চাই ই পলমকৈ আৰম্ভ কৰিলেও আনবোৰ য়ু পি আই ভিত্তিক ডিজিটেল পেইমেণ্ট সেৱা প্ৰদানকাৰীৰ বাবে এটা ডাঙৰ প্ৰত্যাহ্বান হৈ থিয় দিয়াটো নিশ্চিত।
ভাৰতত ইতিপূৰ্বে থকা Google Pay, Paytm, PhonePe and Amazon Pay আদিয়ে বৃহৎ সংখ্যক য়ুজাৰক সফলভাৱে সামৰি লৈছে।
