কেতিয়া গ্ৰেপ্তাৰ হ’ব উমৰাংছুৰ অবৈধ কয়লা খনিৰ মাষ্টাৰ মাইণ্ড ডিমা হাচাও স্বায়ত্তশাসিত পৰিষদৰ কাৰ্যবাহী সদস্য দেৱলালৰ পত্নী কণিকা?

এতিয়াও আতংকই মাৰ যোৱা নাই উমৰাংছ’ত। অসমৰ ডিমা হাছাও জিলাৰ উমৰাংছ’ৰ এক খয়লা খনিত আৱদ্ধ হৈ পৰা ১০ ৰো অধিক শ্ৰমিকক উদ্ধাৰ কৰাত চূড়ান্ত বিফল হৈছে উদ্ধাৰকাৰী দল। প্ৰায় ৩০০ ফুট দ খনিত আৱদ্ধ হৈ পৰা শ্ৰমিকসকলক জীৱন্তে উদ্ধাৰ কৰিবলৈ সক্ষম হোৱা নাই উদ্ধাৰকাৰী দলে। অৱশ্যে চাৰিজন শ্ৰমিকৰ মৃতদেহ উদ্ধাৰ কৰিছে উদ্ধাৰকাৰী দলে।

ৰাজ্যিক দুৰ্যোগ প্ৰশমন বাহিনী আৰু ৰাষ্ট্ৰীয় দুৰ্যোগ প্ৰশমন বাহিনীৰ লগতে ভাৰতীয় সেনাৰ উদ্ধাৰ অভিযান ব্যৰ্থ হোৱাৰ পাছত নৌ সেনাৰ ডুবাৰুৱেও চলায় উদ্ধাৰ অভিযান। ইয়াৰ পাছতো এজনো শ্ৰমিকক জীৱন্তে উদ্ধাৰ কৰিবলৈ সক্ষম নহ’ল উদ্ধাৰকাৰী দল। ইয়াৰ বিপৰীতে মৃত আৰু সন্ধানহীন শ্ৰমিকৰ ঘৰত বিৰাজ কৰিছে শোকাকুল পৰিৱেশে। এনে এক পৰিৱেশৰ মাজতে পোহৰলৈ আহিছে অতি ভয়ংকৰ তথ্য।

প্ৰকাশিত খবৰৰ মতে, সেই অভিশপ্ত অবৈধ কয়লা খনিটো হৈছে ডিমা হাছাও স্বায়ত্ত শাসিত পৰিষদৰ মুখ্য কাৰ্যবাহী সদস্য দেৱলাল গাৰ্লোছাৰ পত্নী কণিকা গাৰ্লোছা (হোজাই)ৰ। অভিযোগ অনুসৰি উচ্চতম ন্যায়ালয়ৰ নিৰ্দেশকো অমান্য কৰি দেৱলালৰ পত্নী কণিকা গাৰ্লোছাই জিলাখনত কেবাটাও অবৈধ কয়লা খনি চলায় আহিছে। উচ্চতম ন্যায়ালয়ৰ কঠোৰ নিৰ্দেশনা উলংঘা কৰি উমৰাংচুৰ আছাম কুৱেৰীত দীৰ্ঘবছৰ ধৰি দিন চলি আছিল এই ৰেট হোল মাইনিং।

ৰাজ্য চৰকাৰৰ অধীনস্থ অসম মিনাৰেল উন্নয়ন পৰিষদ, এ এম ডি চিৰদ্বাৰা স্বীকৃত এলেকাৰ বাহিৰত দীৰ্ঘদিনৰ পৰা আছাম কুৱেৰীয়ে চলাই আছিল কয়লাৰ এই অবৈধ খনন৷ অসম ছিণ্ডিকেট আৰু অপৰাধশুন্য হৈ পৰা বুলি সঘনাই দাবী কৰা মুখ্যমন্ত্ৰীয়ে ইতিমধ্যে উমৰাংচুৰ এই কয়লা খননক অবৈধ আখ্যা দিছে। ইয়াৰ পাছতো পাৰ্বত্য জিলাখনত প্ৰায় ৬০ৰ পৰা ৭০ টা অবৈধ খয়লা খনিত কয়লাৰ খনন কাৰ্য কেনেকৈ চলি আহিছে তাকে প্ৰশ্নৰ উত্থাপন হৈছে।

ইফালে অভিযোগ অনুসৰি শ্ৰমিক আৱদ্ধ হৈ পৰা খনিটোৰ লগতে আৰু কেবাটাও খনি দেৱলাল গাৰ্লোছাৰ পত্নী মণিকা গাৰ্লোচাই চলাই আহিছে। আত্মীয়ৰ নামত অনুজ্ঞাপত্ৰ উলিয়াই মণিকা গাৰ্লোচাই অবৈধ কয়লা খননৰ সমগ্ৰ কাম-কাজ তদাৰক কৰি আহিছে বুলিও অভিযোগ উঠিছে।

অভিযোগ অনুসৰি দিছপুৰৰ এজন ক্ষমতাশালী মন্ত্ৰীৰ প্ৰত্যক্ষ পৃষ্ঠপোষকতাত দেৱলাল গাৰ্লোছাই কৰ ফাঁকিৰে চলাই থকা এই কয়লা ছিণ্ডিকেটৰ বিষয়ে বিজেপিৰে বহু নেতাই মুখ্যমন্ত্ৰী হিমন্তবিশ্ব শৰ্মাক আৰু দলৰ ৰাজ্যিক সভাপতিক ছেপ্টেম্বৰ মাহতে লিখিত অভিযোগ দিছিল যদিও মুখ্যমন্ত্ৰীয়ে কোনো ব্যৱস্থা গ্ৰহণ কৰা নাছিল। ইফালে প্রাক্তন মুখ্য কাৰ্যবাহী সদস্য তথা বিজেপি দলৰ নেতা সমৰজিৎ হাফলংবাৰে ভয়ংকৰ অভিযোগ তুলি কয়- ‘এইটো কয়লা খনি দেৱলাল গাৰ্লোছাৰ পত্নী কণিকা হোজাইৰ। উমৰাংচুৰ দৰেই কাৰ্বি আংলং জিলাৰ ডিলাই, বকলীয়াৰ কুৰডুং, পাট্ৰাডিছা, শিলনীজানৰ কয়লাজান, কয়লা মাটিত মুকলিভাৱে কয়লা খনন চলি আছে আৰু দৈনিক শ শ ট্ৰাক কয়লা কাৰ্বি আংলঙৰ পৰাও গৈ আছে। আৰক্ষী, বন বিভাগ আৰু পৰিবহণ বিভাগৰ বিষয়াসকলক এই বিষয়ে সুধিলে সাংবাদিককো ক’ব যে এই ব্যৱসায় দিছপুৰৰ মন্ত্ৰীৰ কাৰ্যালয়ৰ পৰা চলে, আমি ধৰিলে চাকৰি যাব।’ ইফালে আৰক্ষীয়ে এই অবৈধ কয়লা খননৰ বিৰুদ্ধে ২/২০২৫ নম্বৰত এটা গোচৰ ৰুজু কৰি আছাম কুৱেৰীৰ পুনুছ নুনিছা ওৰফে সুৰুষ নুনিছাক গ্ৰেপ্তাৰ কৰিছে আৰক্ষীয়ে৷ এই ধৃত নুনিছা হৈছে কণিকা গাৰ্লোচাৰ আত্মীয়। অৰ্থাৎ অবৈধ কয়লা খনিটোক প্ৰকৃত গৰাকীক গ্ৰেপ্তাৰ নকৰি আৰক্ষীয়ে গ্ৰেপ্তাৰ কৰিছে গৰাকীৰ আত্মীয়ক।  দিছপুৰৰ ক্ষমতাশালীৰ মন্ত্ৰীৰ কয়লা ছিণ্ডিকেটৰ ক’লা অধ্যায় উন্মুক্ত হোৱাৰ ভয়তে প্ৰকৃত গৰাকীক গ্ৰেপ্তাৰ নকৰি আত্মীয় গ্ৰেপ্তাৰ কৰি সকলোবোৰ মেনেজ কৰিবলৈ চেষ্টা কৰি বুলি বুলি এতিয়া সবত্ৰে চৰ্চা চলিছে।