বিশ্ব স্বাস্থ্য সংস্থা (WHO)ই সোমবাৰে তিনিটা ভাৰতীয় কাহৰ ঔষধৰ বিৰুদ্ধে চিকিৎসা সতৰ্কবাণী জাৰি কৰিছে। এই চিৰাপসমূহত অধিক মাত্ৰাত ডাইথাইলিন গ্লাইকল (DEG) নামৰ বিষাক্ত পদাৰ্থ আছে, যিয়ে বৃক্ক আৰু যকৃতৰ গুৰুতৰ ক্ষতি কৰিব পাৰে। তামিলনাডুৰ শ্ৰীছান ফাৰ্মাচিউটিকেলৰ কল্ড্ৰিফ, গুজৰাটৰ ৰেডনেক্স ফাৰ্মাচিউটিকেলৰ ৰেস্পিফ্ৰেছ টি আৰ, আৰু শ্বেপ ফাৰ্মাৰ ৰিলাইফৰ নিৰ্দিষ্ট ঔষধৰ বিৰুদ্ধে সতৰ্কবাণী জাৰি কৰিছে।
উল্লেখ্য যে যোৱা মাহত মধ্যপ্ৰদেশত কল্ড্ৰিফ চিৰাপ সেৱন কৰি ২২ শিশুৰ মৃত্যু হোৱাৰ পিছত এই সতৰ্কবাণী দিয়া হৈছে। ৰাজস্থানতো কাহৰ ঔষধৰ সৈতে জড়িত একেই সমস্যাৰ খবৰ পোৱা গৈছে। জ্বৰ আৰু চৰ্দিৰ চিকিৎসাৰ বাবে এই চিৰাপ ব্যৱহাৰ কৰা শিশুসকলে বমি আৰু প্ৰস্ৰাৱৰ গুৰুতৰ সমস্যাৰ সন্মুখীন হৈছিল। এই বিষাক্ত ঔষধ সেৱন কৰি ২ ছেপ্টেম্বৰত প্ৰথমটো শিশুৰ মৃত্যু ঘটে।
জানিব পৰা মতে এই ঔষধৰ পৰীক্ষাত পোহৰলৈ আহিছে যে কল্ড্ৰিফত ৪৮.৬% DEG, ৰিলাইফত ০.৬১৬% আৰু ৰেস্পিফ্ৰেছ টি আৰত ১.৩৪% ডিইজিৰ মাত্ৰা পোৱা গৈছে যিটো স্বাস্থ্যাৰ বাবে ক্ষতিকাৰক। অশুদ্ধি হিচাপে ডিইজিৰ অনুমোদিত সীমা মাত্ৰ ০.১%, কিন্তু বিশেষজ্ঞসকলৰ মতে চিৰাপত এই দ্ৰব্য থাকিব নালাগে।
২ অক্টোবৰত তামিলনাডুৰ ড্ৰাগ কণ্ট্ৰল সঞ্চালকে কল্ড্ৰিফক সেৱন যোগ্য নহয় বুলি ঘোষণা কৰিছিল। ৫ আৰু ৬ অক্টোবৰত মধ্যপ্ৰদেশে উচ্চ DEG মাত্ৰা নিশ্চিত কৰে। ভাৰতৰ কেন্দ্ৰীয় ঔষধ মানক নিয়ন্ত্ৰণ সংস্থাই ৩০ ছেপ্টেম্বৰত ৰোগৰ ক্লাষ্টাৰ ধৰা পৰাৰ পিছত ৮ অক্টোবৰত WHOক অৱগত কৰিছিল।
WHO-য়ে কয় যে এই বিষাক্ত ঔষধৰ ৰপ্তানিৰ কোনো প্ৰমাণ নাই, তথাপিও বিশ্বব্যাপী নিয়ন্ত্ৰকসকলক অনিয়মিত বজাৰসমূহ নিৰীক্ষণ কৰিবলৈ আহ্বান জনাইছে। ভাৰতীয় কৰ্তৃপক্ষই নিশ্চিত কৰিছে যে এই চিৰাপসমূহ ঘৰুৱা বজাৰতে সীমাবদ্ধ।
৯ অক্টোবৰত ভাৰতৰ ঔষধ পৰীক্ষণৰ ত্ৰুটিৰ বাবে বিশ্ব স্বাস্থ সংস্থাই উদ্বেগ প্ৰকাশ কৰি এই সতৰ্কবাণী প্ৰদান কৰে। প্ৰতিক্ৰিয়াৰূপে মধ্যপ্ৰদেশ পুলিচে চেন্নাইত শ্ৰীছানৰ মালিক জি ৰংগনাথনক গ্ৰেপ্তাৰ কৰে। সোমবাৰে কোম্পানীটোৰ উৎপাদন অনুজ্ঞাপত্ৰ বাতিল কৰা হয় আৰু দুই বছৰ ধৰি গুণগত পৰীক্ষা নকৰাৰ বাবে তামিলনাডুৰ দুজন ঔষধ পৰিদৰ্শকক নিলম্বিত কৰা হয়।
এই চিৰাপসমূহ এতিয়া তামিলনাডু, মধ্যপ্ৰদেশ, কেৰালা, কৰ্ণাটক, পঞ্জাৱ, হিমাচল প্ৰদেশ, উত্তৰ প্ৰদেশ, পুডুচেৰী, পশ্চিমবংগ আৰু দিল্লীত নিষিদ্ধ কৰা হৈছে। কৰ্তৃপক্ষই অভিভাৱকসকলক এই চিৰাপসমূহ পৰিহাৰ কৰি শিশুৰ ৰোগৰ বাবে ডাক্তৰৰ পৰামৰ্শ ল’বলৈ সকীয়াই দিছে।
