অন্ত পৰিল ড০ মৃদুল হাজৰিকাৰ কাৰ্যকাল : কোন হ’ব গুৱাহাটী বিশ্ববিদ্যালয়ৰ পৰৱৰ্তী উপাচাৰ্য ?
ঐতিহ্যমণ্ডিত গুৱাহাটী বিশ্ববিদ্যালয়ৰ বৰ্তমানৰ উপাচাৰ্য ড০ মৃদুল হাজৰিকাৰ কাৰ্যকাল শুকুৰবাৰে অন্ত পৰে। বৰ্তমানৰ উপাচাৰ্য হাজৰিকাৰ পাঁচ বছৰীয়া কাৰ্যকালৰ অন্ত পৰাৰ লগে লগে গুৱাহাটী বিশ্ববিদ্যালয়ৰ পৰৱৰ্তী উপাচাৰ্য কোন হ’ব সেই লৈ বিদ্বৎ মহলৰ মাজত ব্যাপক চৰ্চা আৰম্ভ হৈছে।
ইতিমধ্যে উপাচাৰ্য বাছনিৰ বাবে বিশ্ববিদ্যালয় অনুদান আয়োগৰ প্ৰাক্তন অধ্যক্ষ বেদপ্ৰকাশক অধ্যক্ষ, গুৱাহাটী বিশ্ববিদ্যালয়ৰ আচাৰ্য ৰাজ্যপাল অধ্যাপক জগদীশ মুখী আৰু গুৱাহাটী বিশ্ববিদ্যালয়ৰে এগৰাকী অধ্যাপকক লৈ তিনিজনীয়া এখন উপাচাৰ্য অনুসন্ধান সমিতি গঠন কৰা হৈছে।
আনহাতে, এই উপাচাৰ্য অনুসন্ধান সমিতিখনক লৈয়ো বিতৰ্কৰ উদ্ভৱ হৈছে। বিশেষকৈ গুৱাহাটী বিশ্ববিদ্যালয় শিক্ষক সন্থাই উপাচাৰ্য অনুসন্ধান সমিতিখনক লৈ অসন্তুষ্টি প্ৰকাশ কৰিছে।
শিক্ষক সন্থাই প্ৰকাশ কৰা মতে উপাচাৰ্য অনুসন্ধান সমিতিৰ সদস্য হিচাপে বিশ্ববিদ্যালয়খনৰ কাৰ্যবাহী পৰিষদৰ পৰা এগৰাকী সদস্যক মনোনীত কৰাৰ নিয়ম। সেই অনুযায়ী বিশ্ববিদ্যালয়ৰ কাৰ্যবাহী পৰিষদে যিগৰাকী সদস্যক মনোনীত কৰিছে তেওঁ বিশ্ববিদ্যালয়খনৰ এটা বিভাগৰ অৱসৰপ্ৰাপ্ত অধ্যাপক আৰু বৰ্তমান বিশ্ববিদ্যালয়ৰ নিয়োগ সমিতিৰো এগৰাকী সদস্য।
তদুপৰি বিশ্ববিদ্যালয় অনুদান আয়োগৰ নিয়ম অনুসৰি উপাচাৰ্য অনুসন্ধান সমিতিৰ কোনো সদস্য সংশ্লিষ্ট বিশ্ববিদ্যালয়খনত কোনো ধৰণৰ কাম-কাজত জড়িত অথবা সমিতিৰ সদস্য হ’ব নোৱাৰে।
গুৱাহাটী বিশ্ববিদ্যালয় শিক্ষক সন্থাই এনেবোৰ কাৰণতে উপাচাৰ্য অনুসন্ধান সমিতিখনক লৈ ঘোৰ অসন্তুষ্টি প্ৰকাশ কৰিছে। তেওঁলোকে ইতিমধ্যে বিষয়টো আচাৰ্য তথা ৰাজ্যপাল অধ্যাপক জগদীশ মুখীৰো দৃষ্টিগোচৰ কৰিছে। সেয়ে পৰৱৰ্তী উপাচাৰ্য কোন হ’ব সেই সম্পৰ্কে এতিয়াও ছবি স্পষ্ট হোৱা নাই।
ইয়াৰ মাজতে কাৰ্যকাল অন্ত পৰা উপাচাৰ্য মৃদুল হাজৰিকাক পৰৱৰ্তী উপাচাৰ্য নিযুক্তি নিদিয়া পৰ্যন্ত বিশ্ববিদ্যালয়ৰ কাম-কাজ চলাই যাবলৈ অনুমতি দিয়ে বুলি জানিব পৰা গৈছে।
উল্লেখযোগ্য যে ১৬ আগষ্টত অনুষ্ঠিত ইউ জি চিৰ স্থায়ী সমিতিৰ ৩১সংখ্যক বৈঠকত নাকৰ দ্বাৰা স্বীকৃতিপ্ৰাপ্ত শিক্ষানুষ্ঠানসমূহৰ প্ৰকাশ কৰা তালিকাত গুৱাহাটী বিশ্ববিদ্যালয়ে ‘এ’ গ্ৰেড লাভ কৰিছে।