অসমত খিলঞ্জীয়া কোন? অসম ৰাজ্যিক জমিয়ত উলামাই বৃহস্পতিবাৰে উত্থাপন কৰিছে এই প্ৰশ্ন।
সদৌ অসম বেংগলি হিন্দু এচ’চিয়েচন, বৰাকৰ বহু সংগঠনৰ বৃহৎ মঞ্চ নাগৰিক অধিকাৰ ৰক্ষা সমন্বয় সমিতিৰ পিছত “খিলঞ্জীয়া”কলৈ জমিয়তেও অনুৰূপ প্ৰশ্নটোৰ অৱতাৰণা কৰিছে।
“খিলঞ্জীয়া” অসমীয়াৰ অধিকাৰ প্ৰদান সন্দৰ্ভত ৰাইজৰ পৰামৰ্শ আহ্বান কৰা অসম চুক্তিৰ ৬নং দফা সম্পৰ্কীয় কেন্দ্ৰগঠিত উচ্চস্তৰীয় সমিতিক সংগঠনটোৱে এই প্ৰশ্ন সুধিছে।
“প্ৰথমে খিলঞ্জীয়া কোন সেয়া নিশ্চিত কৰক। তাৰ পিছত খিলঞ্জীয়াৰ আসন সংৰক্ষণ বিষয়টো আনক,” বৃহস্পতিবাৰে দিছপুৰ প্ৰেছ ক্লাবত সংবাদমেলত উলামাৰ সাধাৰণ সম্পাদক আমিনুল ইছলামৰ মন্তব্য।
অসমত চৰকাৰী চাকৰি আৰু বিধানসভা-লোকসভাত খিলঞ্জীয়ালৈ আসন সংৰক্ষণ বিষয়টোৰ জমিয়তে “তীব্ৰ বিৰোধিতা” কৰিছে।
সমিতিলৈ এই সংক্ৰান্তত এখন স্মাৰক পত্ৰ প্ৰেৰণ কৰিছে সংগঠনটোৱে।
জমিয়ত মতে, ভাৰতীয় সংবিধান প্ৰণয়নৰ পৰাই পিছপৰা জনজাতি আৰু জনগোষ্ঠীয় লোকসকলৰ বাবে বিশেষ সা-সুবিধা দি অহা হৈছে।
“অসম চুক্তিৰ ৬নং দফা ৰূপায়ণ সমিতিয়ে সংবিধানৰ বাহিৰেও খিলঞ্জীয়া ৰক্ষাকৱচ দিবলৈ ওলোৱা কাৰ্য্যক আমি কোনো মতে মানি নলওঁ,” জমিয়তৰ মত।
কিন্তু, জমিয়তে অসমৰ “চাহ জনগোষ্ঠীয় লোকসকলক” ভূমি অধিকাৰ প্ৰদানৰ পোষকতা কৰিছে।
শ শ বছৰ ধৰি অসমত বসবাস কৰি অহাৰ পাছতো “চাহ জনগোষ্ঠীয়” লোকসকলক ভূমি অধিকাৰ নিদিয়াক লৈ সংগঠনটোৱে ক্ষোভ প্ৰকাশ কৰিছে।
অসম চুক্তিৰ ৬নং দফা ৰূপায়ণ সন্দৰ্ভত পৰামৰ্শদানৰ বাবে কেন্দ্ৰই যোৱা ১৬ জুলাইত সমিতিখন গঠন কৰিছিল।
যোৱা জানুৱাৰিত গঠন কৰা পূৰ্বৰ সমিতিখনৰ বেছিখিনি সদস্যই সমিতিখনত থাকিবলৈ অনিচ্ছা প্ৰকাশ কৰাত বৰ্তমানৰ সমিতিখন গঠন কৰা হৈছিল।
বৰ্তমানৰ সমিতিখন গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাক অধ্যক্ষ আৰু অসমৰ মহাধিবক্তা ৰমেশ বৰপাত্ৰগোহাঞি, অৰুণাচল প্ৰদেশৰ মহাধিবক্তা নিলয় দত্ত, অৱসৰপ্ৰাপ্ত আই এ এছ বিষয়া সুভাষ দাস, অসম আৰক্ষী (বিশেষ শাখা)ৰ প্ৰাক্তন সঞ্চালকপ্ৰধান পল্লৱ ভট্টাচাৰ্য্য, অৱসৰপ্ৰাপ্ত অধ্যাপক সৃষ্টিধৰ দত্ত, লেখক সুমন্ত চলিহা, অধ্যাপক জয়কান্ত শৰ্মা, জ্যেষ্ঠ সাংবাদিক ৱছবিৰ হুছেইন আৰু সদৌ অসম ছাত্ৰ সন্থাৰ মুখ্য উপদেষ্টা, সভাপতি আৰু সম্পাদক ক্ৰমে সমুজ্জ্বল কুমাৰ ভট্টাচাৰ্য্য, দীপাংক নাথ আৰু লুৰিণজ্যোতি গগৈক সদস্যৰূপে লৈ গঠিত হৈছে।
গৃহ মন্ত্ৰ্যালয়ৰ যুটীয়া সচিব (উত্তৰ-পূব)ক সমিতিখনত সদস্য সচিবৰূপে নিয়োগ কৰা হৈছে।
