সমাগত ২০২১ৰ বিধান সভা নিৰ্বাচন। এটা মাত্ৰ মাহৰ পাছতে অনুষ্ঠিত হ’ব বিধানসভাৰ নিৰ্বাচন।
শাসনলৈ অহাৰ পূৰ্বে সকলো অত্যাৱশ্যকীয় সামগ্ৰীৰ লগতে পেট্ৰ’ল ডিজেলৰ মূল্যবৃদ্ধি ৰোধ কৰাটো প্ৰধানতঃ মূল ইচ্ছ্যু আছিল বিজেপিৰ। কিয়নো কংগ্ৰেছ চৰকাৰ ব্যৰ্থ আছিল সামগ্ৰীৰ মূল্যবৃদ্ধি ৰোধ কৰাৰ ক্ষেত্ৰত।
কিন্তু প্ৰায় ৫ টা বৰ্ষ সামগ্ৰীৰ মূল্য হ্ৰাস নকৰাকৈ বৰঞ্চ দৈনিক এটকা দুটকাকৈ বৃদ্ধি কৰি থকাৰ ফলত সামগ্ৰীসমূহৰ মূল্য আকাশলঙ্ঘী হ’লগৈ।
নিৰ্বাচনৰ পূৰ্বে সামগ্ৰীসমূহৰ মূল্য হ্ৰাস কৰাটো প্ৰতিখন চৰকাৰৰ একপ্ৰকাৰ অভ্যাসত পৰিণত হৈছে। তাৰ পৃথক নহয় শাসনাধীন বিজেপি চৰকাৰ।
কালি অসমৰ জনসাধাৰণে গভীৰ আগ্ৰহৰে ৰৈ আছিল হিমন্ত বিশ্ব শৰ্মাৰ বাজেট ভাষণলৈ। সকলোৱে আশা কৰিছিল অত্যাৱশ্যকীয় সামগ্ৰীৰ মূল্যবৃদ্ধি হ্ৰাস কৰা সম্পৰ্কে বক্তব্যত উল্লেখ কৰিব দক্ষ মন্ত্ৰীগৰাকীয়ে।
কিন্তু মন্ত্ৰীগৰাকীৰ মুখত কেৱল পেট্ৰ’ল-ডিজেল-সুৰাৰ প্ৰসংগহে উচ্চাৰিত হ’ল। মাজনিশাৰ পৰা কাৰ্যকৰী হোৱাকৈ পেট্ৰ’ল-ডিজেলৰ প্ৰতি লিটাৰৰ মূল্য ৫ টকাকৈ হ্ৰাস কৰাৰ বিপৰীতে সুৰাত ২৫ শতাংশ ৰেহাইৰ কথা উল্লেখ কৰিলে মন্ত্ৰীগৰাকীয়ে।
এই ঘোষণাৰ পাছতে সুৰাপায়ীসকল আনন্দত মতলীয়া হৈ পৰা পৰিলক্ষিত হৈছে। ১০০ টকাৰ কুৱাৰ্টাৰ বটল এতিয়া তেওঁলোকে লাভ কৰিব ৭৫ টকাত।
একাংশ সুৰাপায়ীয়ে হয়তো মনতে সিদ্ধান্ত লৈ লৈছে বিজেপি চৰকাৰকে এইবাৰ তেওঁলোকে শাসনলৈ আনিব।
কিন্তু সেইসকলক উদ্দেশ্যি ক’ব বিচাৰিছো লকডাউনৰ সময়ছোৱাত ২৫ শতাংশ মূল্য বৃদ্ধি কৰাৰ বাবেহে এতিয়া ২৫ শতাংশ ৰেহাই দিয়াৰ ব্যৱস্থা কৰিছে ৰাজ্য চৰকাৰে।
ইপিনে, পূৰ্বৰে পৰা এক গুৰুতৰ অভিযোগ উত্থাপন হৈ আহিছে যে নিৰ্বাচনৰ সময়ত ঠায়ে ঠায়ে ৰাজনৈতিক দলসমূহে সুৰা বিতৰণ কৰে বিভিন্ন ৰাজনৈতিক দলে। সুৰাৰ মূল্য বৃদ্ধিৰ পাছত তেওঁলোকৰ মনবোৰ সংকুচিত হৈছিল যদিও কালি হিমন্ত বিশ্ব শৰ্মাই কৰা ঘোষণাৰ পাছতে তেওঁলোকৰো যেন মুখত এমুকুৰা হাঁহি বিয়পিছে।
আনহাতে, নিৰ্বাচনী প্ৰচাৰৰ এটা গুৰুত্বপূৰ্ণ অধ্যায় হৈছে হাজাৰ হাজাৰ বাইক লৈ ৰাজনৈতিক দলসমূহৰ শক্তি প্ৰদৰ্শন। এই হাজাৰ হাজাৰ বাইকত বিনামূলীয়া তেল দিয়াটো ৰাজনৈতিক দলসমূহৰ একপ্ৰকাৰ নিয়ম। বহু যুৱক তেল লাভৰ আশাতে ৰেলীত অংশগ্ৰহণৰ অভিনয় কৰি আদবাটৰে পৰা উভটি অহাৰো উদাহৰণ নথকা হৈছে।
এতিয়া ৰাজনৈতিক দলৰ নেতাসমূহৰো পেট্ৰ’ল ডিজেলৰ মূল্য কিছু পৰিমাণে হ’লেও হ্ৰাস পোৱাত হাজাৰ হাজাৰ বাইকত তেল ভৰাওঁতে ধন ৰাহি হ’ব।
অৱশ্যে, নিৰ্বাচনৰ পূৰ্বে অত্যাৱশ্যকীয় সামগ্ৰী যেনে চাউল, দাইল, আলু-পিয়াজ, মিঠাতেলকে ধৰি অন্যান্য সামগ্ৰীৰ দাম কিছু পৰিমাণে হ’লেও কমাব বুলি একাংশই আশা প্ৰকাশ কৰিছে।