অন্ত পৰা নাই পেলেষ্টাইন-ইজৰাইলৰ মাজত সংঘাত। মঙলবাৰে নিশাও ইজৰাইললৈ ৰকেট নিক্ষেপ কৰিছে পেলেষ্টাইনৰ হামাছ বাহিনীয়ে।
ইতিমধ্যে দুয়োপক্ষৰ হাজাৰ হাজাৰ লোকৰ মৃত্যু হৈছে। দুয়োপক্ষৰ এই গোলাবৰ্ষণত আৱদ্ধ হৈ পৰিছে প্ৰায় ১৮ হাজাৰ ভাৰতীয় নাগৰিক।
ভাৰতীয় দূতাবাসে জনাইছে যে বৰ্তমান প্ৰায় ১৮ হাজাৰ ভাৰতীয় ইজৰাইলত আবদ্ধ হৈ আছে। দূতাবাসৰ দ্বাৰা সময়ে সময়ে তেওঁলোকক নিৰাপদ স্থানলৈ লৈ যোৱা হৈছে।
কিন্তু, এই দুখন দেশৰ ভাৰতীয়সকল আচলতে সুৰক্ষিত নেকি? ক’ত লুকাই আছে তেওঁলোক? কেন্দ্ৰীয় চৰকাৰে কি কয়? হাজাৰ হাজাৰ ভাৰতীয় নাগৰিক কিয় ইজৰাইললৈ গুচি যায়? বৈদেশিক কাৰ্যালয়ৰ সূত্ৰ অনুসৰি ইজৰাইলত বসবাস কৰা বৃহৎ সংখ্যক ভাৰতীয়ই তাত থকা বৃদ্ধসকলক চোৱা-চিতা কৰাৰ কাম কৰে। সেই দেশত বসবাস কৰা ১৮,০০০ ভাৰতীয়ৰ ভিতৰত প্ৰায় ১৪,০০০ লোক এই বৃত্তিৰ সৈতে জড়িত। বাকীসকলৰ অধিকাংশই ছাত্ৰ-ছাত্ৰী আৰু আই টি খণ্ডত কাম কৰে। তেওঁলোকৰ সংখ্যাও কেইবা হাজাৰ। তাৰোপৰি হীৰা আৰু বিভিন্ন ব্যৱসায়ৰ লগত জড়িত বহু ভাৰতীয় ইজৰাইলত আছে। ইয়াৰ উপৰিও ইজৰাইলত ভাৰতীয় মূলৰ প্ৰায় ৮৫,০০০ ইহুদী বাস কৰে।
ইমানবোৰ ভাৰতীয় কিয় ইজৰাইললৈ যায়? আকৰ্ষণ কি? বৃদ্ধ লোকৰ যত্ন ল’বলৈ কি কি অৰ্হতাৰ প্ৰয়োজন? কিমান দৰমহা পায় তেওঁলোকে?
উল্লেখ্য যে, পশ্চিমীয়া দেশত নাৰ্চিংৰ দৰে বৃত্তিত ভাৰতীয়সকলৰ বাবে বিপুল সুযোগ আছে। ইজৰাইলত নাৰ্চিঙৰ দৰমহা বিশেষভাৱে আকৰ্ষণীয়। ইয়াৰ উপৰিও আন আন সুবিধাও উপলব্ধ, যাৰ তুলনা আন দেশৰ লগত কৰিব নোৱাৰি। গতিকে বহু ভাৰতীয়ই জীৱিকাৰ সন্ধানত ইজৰাইললৈ যাবলৈ পছন্দ কৰে।
ইজৰাইলত বৃদ্ধলোকৰ যত্নৰ লোৱাৰ কামৰ বাবে মাহে নূন্যতম ১.২৫ লাখ দৰমহা প্ৰদান কৰা হয়। তদুপৰি থকা-খোৱাৰ লগতে চিকিৎসাও বিনামূলীয়াকৈ পোৱা যায়। অতিৰিক্ত সময় কাম কৰিলে অতিৰিক্ত ধন দিয়া হয়।। তদুপৰি শুকুৰবাৰে দুপৰীয়াৰ পৰা শনিবাৰে বিয়লিলৈকে বন্ধও পায়। এই কাৰণেই ইজৰাইলত বহু ভাৰতীয়ই এই বৃত্তি বাছি লয়।
সাধাৰণতে কেয়াৰগিভাৰ বা পৰিচৰ্যাকাৰীৰ বাবে ভিছা চাৰি বছৰ তিনিমাহৰ বাবে দিয়া হয়। ইয়াৰ পিছত ভিছাৰ ম্যাদ বৃদ্ধি কৰিব পাৰি। বৃদ্ধসকলক চোৱা-চিতা কৰাসকল বেছিভাগেই নাৰ্চিং হোমৰ সৈতে জড়িত। অৱশ্যে ৰোগী বা বৃদ্ধ লোকৰ ঘৰত সেৱা আগবঢ়োৱা সকলে অতিৰিক্ত সুবিধা লাভ কৰে। গ্ৰাহকৰ মৃত্যু হ’লে নতুন নিয়োগকৰ্তা বিচাৰি পোৱা যায়। বছৰত এবাৰ ঘৰলৈ যাবৰ বাবে ছুটীও পোৱা যায়।
পৰিচৰ্যা প্ৰদান কৰা ব্যক্তিৰ চাকৰিৰ বাবে কি কি অৰ্হতাৰ প্ৰয়োজন?
বহু দেশত নাৰ্চিঙৰ বাবে স্নাতক ডিগ্ৰীৰ প্ৰয়োজন হ’লেও ইজৰাইলত নহয়। ইজৰাইলত নাৰ্চৰ চাকৰিৰ বাবে আবেদন কৰাৰ একমাত্ৰ উপায় হৈছে এ এন এম (এচিষ্টেণ্ট নাৰ্চিং – মিডৱাইফাৰী) বা জি এন এম (জেনেৰেল নাৰ্চিং – মিডৱাইফাৰী) পাঠ্যক্ৰম। ইয়াৰ উপৰিও হিব্ৰু ভাষা শিকিবলৈ এমাহৰ পাঠ্যক্ৰমৰ প্ৰয়োজন। আন বহু দেশত এই কামবোৰৰ বাবে প্ৰায়ে ইংৰাজী ভাষাৰ কঠিন পৰীক্ষাৰ প্ৰয়োজন হয়। কিন্তু ইজৰাইলত ইয়াৰ প্ৰয়োজন নাই।
