আজি অসম জাতীয় পৰিষদৰ সভাপতি লুৰীণজ্যোতি গগৈয়ে দলৰ জ্যেষ্ঠ নেতা জগদীশ ভূঞা আৰু পংকজ লোচন গোস্বামীৰ সৈতে বিজয়নগৰৰ ছিলভাৰ স্ক্ৰীণ ডিজিটেল চিনেমা হলত জুবিন গাৰ্গৰ অন্তিমখন ছবি ‘ৰৈ ৰৈ বিনালে’ৰ দৰ্শনী উপভোগ কৰে। ছবিগৃহত প্ৰৱেশ কৰাৰ পূৰ্বে উপস্থিত সকলোৱে প্ৰয়াত শিল্পীগৰাকীক শ্ৰদ্ধাঞ্জলি জ্ঞাপন কৰে।
শ্ৰদ্ধাঞ্জলী অনুষ্ঠানৰ সময়ত লুৰীনজ্যোতি গগৈয়ে সামাজিক মাধ্যমৰ আগত কয়, ‘‘ৰৈ ৰৈ বিনালেই আচলতে আজিৰ বাস্তৱতাক প্ৰতিফলিত কৰিছে। এই ছবিখন চোৱাৰ পিছত জনসাধাৰণে জুবিন গাৰ্গৰ আদৰ্শৰ লগত নিজকে বিলীন কৰিবলৈ সক্ষম হ’ব। মই সকলোকে জুবিন গাৰ্গৰ এই অন্তিম ছবিখন চাবলৈ আহ্বান জনাইছো।”
তেওঁ লগতে কয়, “জনসাধাৰণে প্ৰতিটো ছবিগৃহতে ছবিখন চাবলৈ আহিছে। তেওঁলোকে ন্যায়ৰ আহ্বান জনাইছে। গণতন্ত্ৰত জনসাধাৰণেই হৈছে আটাইতকৈ শক্তিশালী বিচাৰক, আৰু তেওঁলোকে প্ৰতিটো দিশৰ পৰা ন্যায় বিচাৰিছে।”
তেওঁ উল্লেখ কৰে যে, ‘কাশ্মীৰ ফাইলছ’ ছবিখন মুক্তি পোৱাৰ সময়ত মুখ্যমন্ত্ৰী হিমন্ত বিশ্ব শৰ্মাই নিজেই ছবিখন চোৱাৰ উপৰি ছবিখন চাবলৈ কৰ্মচাৰীসকলক ছুটী প্ৰদান কৰিছিল।
এই সন্দৰ্ভত লুৰীণজ্যোতি গগৈয়ে প্ৰশ্ন উত্থাপন কৰে, “আজি কিয় ছুটী ঘোষণা কৰা নহ’ল? মুখ্যমন্ত্ৰীয়ে তেওঁৰ মন্ত্ৰীসভাৰ সদস্যসকলৰ সৈতে ‘ৰৈ ৰৈ বিনালে’ চাবনে?”
গগৈয়ে কয়, “এই ছবিখন এক আৱেগলৈ পৰিণত হৈছে। সমগ্ৰ বিশ্বৰ প্ৰায় ৭০০ খন ছবিগৃহত ‘ৰৈ ৰৈ বিনালে’ প্ৰদৰ্শিত হ’ব, যিটো অসমীয়া চিনেমাৰ বাবে এক ঐতিহাসিক মুহূৰ্ত। পুৱা ৪ বজাত ছবিখনৰ প্ৰথম দৰ্শনী আৰম্ভ হৈছিল, আৰু মাল্টিপ্লেক্সসমূহত এই ছবি ২৪ ঘণ্টাই চলিব। এটা সপ্তাহৰ বাবে সকলো ছবিগৃহৰ টিকট সম্পূৰ্ণৰূপে বুক হৈ গৈছে — এই বিশাল জনসমাগমে জুবিন গাৰ্গৰ আদৰ্শক আগুৱাই নিয়াৰ বাবে ৰাইজৰ দায়িত্ববোধকে প্ৰতিফলিত কৰিছে।”
জুবিন গাৰ্গৰ মৃত্যুৰ পৰিস্থিতি সম্পৰ্কে মন্তব্য কৰি গগৈয়ে কয়, “মুখ্যমন্ত্ৰীৰ মতে, জুবিনক হত্যা কৰা হৈছিল। তদন্তৰ ফলাফল হত্যা বা স্বাভাৱিক মৃত্যু যিয়েই নহওক কিয়, অসমৰ জনসাধাৰণৰ সত্যটো জনাৰ অধিকাৰ আছে। এই বিষয়টোৰ পৰা মনোযোগ আঁতৰাই নিয়াৰ প্ৰচেষ্টা ৰাইজে আৰু গ্ৰহণ নকৰে।”
