বাল্যবিবাহ বিৰোধী অভিযানৰ গোচৰসমূহত POCSO আইনৰ ধাৰাৰ প্ৰয়োগ কৰি এতিয়া ন্যায়ালয়ৰ কৰ্কথনা খাইছে ডঃ হিমন্ত বিশ্ব শর্মাৰ চৰকাৰ তথা আৰক্ষীয়ে।
গুৱাহাটী উচ্চ ন্যায়ালয়ে বাল্যবিবাহৰ সৈতে জড়িত পৃথক পৃথক গোচৰত অভিযুক্তক আগতীয়া জামিন প্ৰদান কৰাৰ সময়তে এইবোৰ গোচৰৰ বাবে অভিযুক্তৰ জিম্মাত লৈ জেৰাৰ কৰাৰ কোনো প্ৰয়োজন নহয় বুলি মন্তব্য কৰিছে। গুৱাহাটী উচ্চ ন্যায়ালয়ৰ ন্যায়াধীশ সুমন শ্যামে কয় যে যদি আইন উলংঘা কৰি বিবাহ হৈছে তেন্তে আইনখনে নিজস্ব গতি ল’ব। এনে ঘটনা নতুন নহয় আৰু এই সকলোবোৰ বহুদিনৰ পৰাই হৈ আহিছে।
উচ্চ ন্যায়ালয়ে কয় যে তাৎক্ষণিক তদন্তৰ প্ৰয়োজন আছে নে নাই সেই আমি সিদ্ধান্ত ল’ম। ন্যায়ালয়ে কয় যে এইবোৰ এনেকুৱা গোচৰ নহয় য’ত অভিযুক্তক জিম্মাত লৈ জেৰা কৰাৰ প্ৰয়োজন আছে। আমি তেওঁলোকক (অভিযুক্তক) তেওঁলোকৰ বক্তব্য লিপিবদ্ধ কৰিবলৈ ক’ম। এইদৰে অসম চৰকাৰৰ লগতে অসম আৰক্ষীক তীব্ৰ কৰ্কথনা কৰি উচ্চতম ন্যায়ালয়ে প্ৰশ্ন কৰে যে এইবোৰ চোৰাংচোৱাগিৰি নে সম্পত্তি চুৰিৰ গোচৰ?
লাইভ ল’ত প্ৰকাশিত এক প্ৰতিবেদন অনুসৰি আদালতৰ এই মন্তব্যৰ সন্দৰ্ভত অসম চৰকাৰৰ মহাধিবক্তাই কয় যে এইটো এটা অতি গুৰুতৰ বিষয়। ইয়াৰ পাছতে এই বিষয়ে ন্যায়াধীশ সুমন শ্যামে প্ৰশ্ন কৰে ইয়াত POCSO ধাৰা প্ৰয়োগ কৰাৰ কি কি প্ৰয়োজন? “যদি আপুনি POCSO জাপি দিছে, তেন্তে ন্যায়াধীশে চকু মুদি থাকিব নেকি, একো দেখা নাপাব নেকি?”
অৱশ্যে আদালতে কয় যে আমি ইয়াত কাকো দোষমুক্ত কৰা নাই আৰু আপোনালোকক তদন্তকো পৰাও বাধা দিয়া নাই। কিন্তু এই গোচৰসমূহত POCSO ধাৰা প্ৰয়োগ কৰা আৰু জিম্মাত লৈ জেৰা কৰাৰ কোনো প্ৰয়োজন নাই।
ন্যায়ালয়ৰ মতে ৰাজ্য চৰকাৰে আইন অনুসৰি নিজৰ কাম কৰক, তদন্ত কৰি চাৰ্জ শ্বীট দাখিল কৰক। দোষী হ’লে শাস্তি পাব, কিন্তু এনে পদক্ষেপে মানুহৰ ব্যক্তিগত জীৱনত অশান্তি দিছে। ইয়াত সন্তান, পৰিয়ালৰ সদস্য আৰু বয়োজ্যেষ্ঠসকলো জড়িত হৈ আছে।
গুৱাহাটী উচ্চ ন্যায়ালয়ৰ এই ৰায়ৰ পাছতে এতিয়া ৰাজ্য চৰকাৰে বাল্যবিবাহ বিৰোধী অভিযানৰ গোচৰসমূহৰ পৰা POCSO ধাৰা প্ৰত্যাহাৰ কৰে নে নাই সেয়া লক্ষণীয় হ’ব।
