কাৰাগাৰৰ ভিতৰত প্ৰচণ্ড জ্বৰ, মূৰৰ বিষত ভুগি থকা অখিল গগৈৰ দেহত কৰ’নাৰ উপসৰ্গ দেখা পোৱাৰ পাছতে কৃষক মুক্তি সংগ্ৰাম সমিতি, বিভিন্ন জাতীয়তাবাদী দল সংগঠনৰ নেতা আৰু তেওঁৰ শুভাকাংক্ষীসকল চিন্তিত হৈ পৰিছে।
এন্টিজেন টেষ্টত নিগেটিভ আহিল যদিও সাধাৰণ স্বাৱ টেষ্টৰ চূড়ান্ত ফলাফল বৰ্তমানো অহা নাই।
ইয়াকে লৈ এতিয়া উদ্বিগ্ন সকলো। তেনে সময়তে অখিল গগৈ কোভিড-১৯ পজিটিভ বুলি বাতৰি সম্প্ৰচাৰ হোৱাৰ পাছত চৰকাৰলৈ ফেচবুকৰ জৰিয়তে অখিল গগৈৰ পত্নী গীতাশ্রী তামুলীয়ে চাৰিটা প্ৰশ্নৰ অৱতাৰণা কৰিছে।
ফেচবুকত তামুলীয়ে লিখি কয়, “অভিনয় কৰা নাই। বাস্তৱ প্ৰশ্ন সুধিছো।”
তেওঁৰ প্ৰশ্ন কেইটা তলত অ-সম্পাদিত ৰূপত উল্লেখ কৰা হ’ল :
১)ক’ত ৰাখিব? কেবিন নালাগে বাৰু, বিছনা আছেনে? নে শুব জানিলে মজিয়াই পালেং?
২)ক’ভিড ডাঙৰ নে সৰু বেমাৰ?
৩) যদি ভয়াৱহ, কয়দীসকলক এনেকৈ দলনিত পোনা মেলি কিয় ৰাখিলে? পৰীক্ষাৰ বাবে কিয় আদালতৰ সহায় ল’ব লগা হ’ল?
৪)যদি সৰু, গুৰুত্বহীন ৰোগ, দেশৰ এই অগণন জনতাক কিয় অনিশ্চিত জীৱন সংগ্ৰামলৈ ঠেলি দিয়া হ’ল? ৰোগত নমৰি, নাখাই মাৰিবৰ বাবে?
এই পোষ্টৰ তলত কমেণ্ট কৰি বিশিষ্ট সাহিত্যিক অপূৰ্ব কুমাৰ বৰুৱাই লিখিছে,
” অখিলৰ জনপ্ৰিয়তা আৰু ভাৱমুৰ্তিত ভীত-সন্ত্ৰষ্ট চৰকাৰ। গতিকে যিকোনো পৰ্যায়লৈ যাবলৈ কুণ্ঠাবোধ নকৰে ইহঁতে। আজি ধেমালিতে কাৰোবাক কৈছিলো যে ধৈৰ্য্য আৰু বিটুৰ ক’ভিড টেষ্টৰ ফলাফল সহজে ওলাব কিন্তু অখিলৰটো গৃহ মন্ত্ৰ্যালয়ে চাব লাগিব কাৰণ ভুল হ’লে চৰকাৰক দোষ দিব। আৰু এতিয়া? … ২০২১ ইহঁতক ওফৰাব নোৱাৰিলে নহব। মই উচ্চতম ন্যায়ালয়লৈ যাম। কিন্তু ? …
অন্য এগৰাকী ফেচবুক ব্যৱহাৰকাৰী অনন্ত ৰাজখোৱায়ে লিখিছে, “এখন কাৰাগাৰ নিজ অৰ্থত এটা কনটেইনমেণ্ট জ’ন। তাত ক’ভিড সংক্ৰমণ ৰোধ কৰাতো সহজ কাম আছিল। জেইল এখনততো যেতিয়াই তেতিয়াই বাহিৰৰ মানুহ অহা যোৱা কৰি নাথাকে। আগৰে পৰা বন্দী কেইজনতো বাহিৰত ঘুৰি নুফুৰেগৈ। নতুনকৈ যিসকলক আনিছিল তেওঁলোকক সঠিক টেষ্ট কৰি জেইলৰ ভিতৰত এন্ট্ৰি দিয়া নহ’ল কিয়? জেইল কৰ্তৃপক্ষৰ চূড়ান্ত হেমাহি নে চৰকাৰৰ সুপৰিকল্পিত ষড়যন্ত্ৰ এয়া।
চিন্তনীয় বিষয়।”
ইয়াৰোপৰি, বিপুল তালুকদাৰ নামৰ এগৰাকী ফেচবুক ব্যৱহাৰকাৰীয়ে লিখিছে, “ইয়াৰ উত্তৰ ৰাষ্ট্ৰই দিবলৈ বাধ্য। নহ’লে আমি বাধ্য কৰাব লাগিব। সিহঁতে জনা উচিত যে, অখিলক উপযুক্ত চিকিৎসা নকৰিলে ৰাইজে ধৈৰ্যৰ বান্ধ চিঙি পেলাব।”
এনেদৰেই বহুজনে চৰকাৰ বিৰোধী কমেণ্ট কৰা দেখা গ’ল।
গীতাশ্রী তামূলীৰ এই ফেচবুক পোষ্ট ইতিমধ্যে ছ’চিয়েল মিডিয়াত ভাইৰেল হৈ পৰিছে। বহুসংখ্যক অনুৰাগীয়ে এই পোষ্ট share কৰাও পৰিলক্ষিত হৈছে।
