বন্যহস্তীৰে মানুহৰ সংঘাত, নতুন কথা নহয় ৷ কিন্তু গোৱালপাৰা জিলাৰ বিভিন্ন প্ৰান্তত এই হাতী মানুহৰ সংঘাতে চুড়ান্ত ৰূপ ধাৰণ কৰিছে ৷
হাতীৰ এটা বৃহৎ জাকে ভাঙিলে কেইবাটাও বাসগৃহ৷ খাই তহিলং কৰিলে ধান ,চাউল৷ হাতীৰ আক্ৰমণৰ ফলত শিশু মহিলা সহ বহু কেইগৰাকী লোকৰ কথমপি প্ৰাণৰক্ষা পৰিছে৷
গোৱালপাৰাৰ পশ্চিম মাটিয়া অঞ্চলত যোৱা নিশা খাদ্যৰ সন্ধানত বনাঞ্চলৰ পৰা হাতীৰ এটা জাকে অতৰ্কিতে জনাঞ্চলত প্ৰৱেশ কৰে আৰু গাঁওখনৰ ঘৰ সমূহ এফালৰ পৰা ভাঙিবলৈ আৰম্ভ কৰে৷
নিশাই এক হুৱাদুৱাৰ সৃষ্টি হয় অঞ্চলটোৰ কেইবাটাখনো গাঁৱত৷ নিশা গৃহস্থই শুই থকা অৱস্থাত হাতীৰ জাকটোৱে ঘৰ ভাঙিবলৈ ধৰে আৰু এটি শিশুক লগত লৈ ঘৰটোৰ চিলিঙৰ ওপৰত উঠি যায়৷
তাৰ সমান্তৰালভাৱে এগৰাকী বয়স্ক মহিলা ঘৰৰ ভিতৰতে আৱদ্ধ হৈ পৰে ৷
হাতীৰ আক্ৰমণৰ বাবে এতিয়াও শংকা আঁতৰা নাই গাঁৱবাসীৰ ৷
কিয়নো উক্ত অঞ্চলটোৰ পৰা মাত্ৰ ৫০০মিটাৰ দূৰত্বতে হাতীৰ জাকটোৱে অৱস্থান গ্ৰহণ কৰিছে আৰু যিকোনো সময়তে গাঁৱখনত পুনৰ প্ৰৱেশ কৰাৰ আশংকাৰ উমান পাই আতংকিত হৈ পৰিছে গঁঞা ৷