জাতিধ্বংসী বিধেয়কখনেই স্বাধীন অসমৰ দাবীক পুনৰ প্ৰাসংগিক কৰি তুলিব নেকি? আজি নাগৰিকত্ব সংশোধনী বিধেয়কখনৰ সপক্ষে জেপিচিয়ে ইয়াৰ প্ৰতিবেদন দাখিল কৰাৰ পিছত চৰম পৰ্য্যায় পোৱা অসমীয়া মানুহৰ ক্ষোভে তাৰেই ইংগিত দিছে।
আজি যুটীয়া সংসদীয় সমিতিয়ে অসম তথা উত্তৰ-পূবৰ জনগণৰ মতৰ বিৰুদ্ধে গৈ বিধেয়কখনৰ সপক্ষে প্ৰতিবেদন দাখিল কৰাৰ প্ৰতিবাদত আমবাৰীৰ ৰাজপথত ৰূপায়িত হয় ধিক্কাৰ দিৱস। ক’লা পতাকা প্ৰদৰ্শন, উত্তোলনেৰে এই দিৱসৰ কাৰ্য্যসূচী আৰম্ভ হয়। ক’লা পতাকা উত্তোলন কৰে বিশিষ্ট বুদ্ধিজীৱী ড০ হীৰেন গোহাঁয়ে।
আনহাতে আজিৰ ধিক্কাৰ দিৱসত সচেতন নাগৰিকৰ উপস্থিতিতে উত্থাপন হ’ল ‘স্বাধীন অসম’ৰ প্ৰসংগ। কিছু সংখ্যক লোকে যে জাতিটোক বচাবৰ বাবে ‘স্বাধীন অসম’ প্ৰতিষ্ঠাই শেষ পথ বুলি ভাবিবলৈ লৈছে তাৰ উমান পোৱা গ’ল।
কাৰ্য্যসূচীটোত ভাষণ প্ৰদান কৰি কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে কয়, “ভাৰতীয় সংসদীয় আৰু যুক্তৰাষ্ট্ৰীয় ব্যৱস্থাত আমি ন্যায় পোৱাটো অসম্ভৱ, চাগে অসমীয়া জাতিয়ে আকৌ স্বাধীনতাৰ প্ৰস্তাৱ উত্থাপন কৰিব লাগিব। সংবিধান সভাত অসমৰ প্ৰতিনিধিয়ে উত্থাপন কৰা, আহোম সভাই উত্থাপন কৰা, ভীমবৰ দেউৰীয়ে দিয়া স্বতন্ত্ৰতাৰ প্ৰস্তাৱ আকৌ উত্থাপন কৰিব আৰু প্ৰয়োজন হ’লে আমি এখন স্বাধীন দেশ গঠন কৰিব লাগিব”।
একেদৰে অনুষ্ঠানৰ মূল গুৰি ধৰা বিশিষ্ট চিন্তাবিদ ড০ হীৰেন গোহাঁয়েও ৰাষ্ট্ৰই আমাৰ কোনো কথাই নুশুনিলে স্বাধীনতাৰ দাবী তুলিবলৈ নিশ্চয়কৈ বাধ্য হ’ব লাগিব বুলি মন্তব্য কৰে।
কিন্তু তেওঁ এতিয়া ভাৰতৰ সংবিধানৰ ধৰ্মনিৰপেক্ষ চৰিত্ৰ অক্ষুণ্ণ ৰখাৰ হকেহে অসমৰ ৰাইজে যুঁজি আছে বুলি ভাষণত কয়। লগতে এই যুঁজখন ‘অসমৰ সুৰক্ষাৰ হকে’ হোৱাৰ লগতে ই ‘ভাৰতৰো সুৰক্ষাৰ হকে’ কৰা যুঁজ বুলিও তেওঁ এক তাৎপৰ্যপূৰ্ণ মন্তব্য কৰে।
স্বাধীন অসমৰ প্ৰসংগটোত অৱশ্যে তেওঁ স্বাধীন অসমৰ বাবে আন্দোলনৰ প্ৰস্তাৱ ল’বলৈ হ’লে সকলো সংগঠনে লগ লাগি আলোচনা মৰ্মেহে ল’ব লাগিব বুলি স্পষ্ট কৰি দিয়ে।
অনুষ্ঠানত উপস্থিত আন কেইবাজনো বিশিষ্ট ব্যক্তিৰ মুখতো আজি শুনা গ’ল স্বাধীন অসমৰ প্ৰসংগ।
অৱশ্যে, এই ক্ষেত্ৰত দ্বিমত পোষণ কৰে বিশিষ্ট বুদ্ধিজীৱী তথা অৱসৰপ্ৰাপ্ত আৰক্ষী সঞ্চালক প্ৰধান হৰেকৃষ্ণ ডেকাই। তেওঁ এই আন্দোলন যিহেতু সংবিধানৰ গণ্ডীৰ ভিতৰত থাকি সংবিধানৰ ধৰ্মনিৰপেক্ষ চৰিত্ৰক ৰক্ষা কৰাৰ বাবে কৰা হৈছে। গতিকে ইয়াত ভাৰতৰ পৰা অসমক বিচ্ছিন্ন কৰাৰ প্ৰসংগ আহিব নালাগে বুলি মন্তব্য কৰে।
ইপিনে, আজিৰ এই ‘ধিক্কাৰ দিৱস’ৰ কাৰ্যসূচীত বিভিন্ন ৰাজনৈতিক দলৰ পৰা আৰম্ভ কৰি জাতীয়-জনগোষ্ঠীয় আৰু বহুকেইটা সামাজিক সংগঠনৰ প্ৰতিনিধি আৰু কেইবাৰাকীও শিল্পী-সাহিত্যিকে অংশগ্ৰহণ কৰে। উপস্থিত থাকে দুই প্ৰাক্তন মুখ্য মন্ত্ৰী ক্ৰমে প্ৰফুল্ল কুমাৰ মহন্ত আৰু তৰুণ গগৈও।
সকলোৰে বক্তব্যত কেৱল বিজেপি চৰকাৰৰ অসম বিৰোধী স্থিতিক গৰিহণা। এই অনুষ্ঠানৰ পৰাই জাতিৰ সংকটৰ সময়ত জাতি-ধৰ্ম-দল-সংগঠন নিৰ্বিশেষে সকলোকে একত্ৰিতভাৱে আন্দোলন চলাই নিয়াৰ বাবে সকলোলৈ আহ্বান জনায় উপস্থিত প্ৰতিগৰাকী বিশিষ্ট ব্যক্তিয়ে।
আনহাতে, আজিৰ এই অনুষ্ঠানত আৰম্ভণিতে সেই স্থানত উত্তোলন কৰা ক’লা পতাকা আৰক্ষীয়ে বলপূৰ্বক খুলি লৈ যোৱাক কেন্দ্ৰ কৰি আৰক্ষী আৰু একাংশ লোকৰ মাজত খণ্ডযুদ্ধও হয়।
