ক্ষমতাৰ ৰাগীত মতলীয়া হৈ পৰা বিজেপিৰ এজন নেতাই কৰা উদ্ভট মন্তব্যই এতিয়া বেছ চাঞ্চল্যৰ সৃষ্টি কৰিছে।
পশ্চিমবংগ বিজেপিৰ নেতা তথা অলপতে দলটোৰ ৰাষ্ট্ৰীয় সম্পাদকৰ দায়িত্ব লাভ কৰা অনুপম হাজাৰেই সাংবাদিকৰ আগত কৈছে যে তেওঁৰ যদি ক’ৰ’ণা হয় তেন্তে তেওঁ প্ৰথমেই সাৱটি ধৰিব বংগৰ মুখ্যমন্ত্ৰী মমতা বেনাৰ্জীক।
এনেদৰে তেওঁ মমতাৰ দেহলৈও ক’ৰ’ণা বিয়পাই দিব বুলি ভাবুকি দিয়ে।
দক্ষিণ পৰগণাৰ বাৰুইপুৰত কোভিড প্ৰট’কল ভংগ কৰি বিজেপিয়ে অনুষ্ঠিত কৰে বিশাল দলীয় সভা।
সভাত উপস্থিত থকা গৰিষ্ঠ সংখ্যক বিজেপি কৰ্মীয়েই পৰিধান কৰা নাছিল মাস্ক।
সামাজিক দূৰত্বৰ কথাটো ক’ৰৱাতে পৰি ৰৈছিল। বিষয়টো সাংবাদিকে আঙুলিয়াই দিয়াত বিজেপি নেতা অনুপম হাজাৰেই কয় যে ক’ৰ’ণাক তেওঁলোকে ভয় নকৰে।ক’ৰ’ণাতকৈয়ো তেওঁলোকৰ বাবে ডাঙৰ শত্ৰু হৈছে মমতা বেনাৰ্জীহে।
ক’ৰ’ণাত মৃত্যু ঘটা লোকৰ মৃতদেহ মমতাই কেৰাচিন ঢালি জ্বলাই দিয়া বুলিও হাজাৰেই অভিযোগ কৰে।
যিটো সময়ত সমগ্ৰ বিশ্বজুৰি ক’ৰ’ণা ভাইৰাছকলৈ সচেতনতাৰ বিষয়ত গুৰুত্ব দিয়া হৈছে সেই সময়তে বিজেপিৰ এজন দায়িত্বশীল পদত থকা নেতাই কাৰোৱাক সাৱটি ধৰি ক’ৰ’ণা বিয়পাই দিব বুলি কৰা মন্তব্যই সকলোকে ভবাই তুলিছে।
