কোকাৰাঝাৰ জিলাৰ ভিতৰুৱা এখন গাঁৱৰ এটা পৰিয়ালক ডাইনী সন্দেহত আৰু যাদু-মন্ত্ৰ সাধনা কৰাৰ অভিযোগেৰে গাঁৱবাসীয়ে ১৫ আগষ্টৰ ভিতৰত গাঁও এৰি যাবলৈ দিয়া নিৰ্দেশে অঞ্চলটোত চাঞ্চল্যৰ সৃষ্টি কৰিছে।
আৰক্ষীয় বিষয়া বিৰাকচন ৰামচিয়াৰীয়ে কোকৰাঝাৰ আৰক্ষী থানাৰ অন্তৰ্গত ১ নং জোৰনগৰ গাঁৱত ৮ আগষ্টত ঘটনাটো সংঘটিত হয় বুলি জানিবলৈ দিয়ে।
আৰক্ষীয়ে জনোৱা মতে, ভদ্ৰেশ্বৰ ৰাভা (৫০), তেওঁৰ পত্নী ফুলেশ্বৰী ৰাভা, পুত্ৰ অজিত ৰাভা, বোৱাৰী আৰু ২ বছৰীয়া নাতিৰ বিৰুদ্ধে ডাইনীৰ অভিযোগ তুলি গাঁৱবাসীয়ে ১৫ আগষ্টৰ ভিতৰত তেওঁলোকক গাঁও এৰি যাবলৈ নিৰ্দেশ দিয়ে।
উল্লেখযোগ্য যে, ৮ আগষ্টত গাঁৱবাসীয়ে পৰিয়ালটোৰ লোকসকলৰ বিৰুদ্ধে ডাইনী আৰু তন্ত্ৰ-মন্ত্ৰ সাধনাৰ অভিযোগ তুলি এখন ৰাজহুৱা সভা আয়োজন কৰে আৰু সভাত পৰিয়ালটোক গাঁও এৰি যোৱাৰ নিৰ্দেশ দিয়াৰ সিদ্ধান্ত গ্ৰহণ কৰা হয়।
সভাত ভূক্তভোগী পৰিয়ালটোৰ লোকসকলৰ পৰা গাঁও এৰি যাব বুলি জোৰ-জবৰদস্তিকৈ এখন পত্ৰত চহীও কৰি লোৱা হয় বুলি আৰক্ষীয় সূত্ৰই প্ৰকাশ কৰে।
ঘটনাৰ সম্ভেদ লাভ কৰি কোকৰাঝাৰ আৰক্ষীয়ে গাঁৱখনত উপস্থিত হৈ ঘটনা সন্দৰ্ভত তদন্ত আৰম্ভ কৰে।
আৰক্ষী অহাৰ খবৰ লাভ কৰি গাঁৱখনৰ গাঁওবুঢ়াকে ধৰি বেছিভাগ লোকে গ্ৰেপ্তাৰ হোৱাৰ ভয়ত পলায়ন কৰে।
গাঁওখনৰ কিছু সংখ্যক স্থানীয় লোকে ৪ বছৰ পূৰ্বে গাঁৱবাসীয়ে এগৰাকী মহিলাক ডাইনী সন্দেহত হত্যা কৰিছিল বুলি আৰক্ষীৰ আগত মত প্ৰকাশ কৰে।