চৰকাৰৰ সৈতে শান্তি আলোচনাৰে বি টি আৰ চুক্তি কৰা এমাহ নহওঁতেই বড়ো সশস্ত্ৰ বিদ্ৰোহী সংগঠন NDFB-এ পুনৰ আন্দোলনৰ হুংকাৰ দিছে চৰকাৰক।
যোৱা ২৭ জানুৱাৰিত কেন্দ্ৰীয় চৰকাৰ আৰু ৰাজ্য চৰকাৰৰ সৈতে ত্ৰিপাক্ষিক শান্তি চুক্তিত বড়োসকলক প্ৰতিনিধিত্ব কৰা এটা মূল পক্ষ আছিল বিদ্ৰোহী সংগঠনটোৰ চাৰিওটা গোট।
কিন্তু আজি আটাইকেইটা গোটৰ সম্বন্বয়ৰক্ষী কমিটিয়ে বাক্সাত ততাতৈয়াকৈ সংবাদ মাধ্যমক সম্বোধন কৰে।
চাৰিওটা গোটৰ নেতাসকলে NDFBৰ মুৰব্বী ৰঞ্জন দৈমাৰীৰ জামিনৰ ম্যাদ বৃদ্ধি নকৰাক লৈ উদ্বিগ্নতা প্ৰকাশ কৰাৰ লগতে দৈমাৰীক সাধাৰণ ক্ষমাদান কৰি দি “কাৰ্য্যতঃ শান্তি স্থাপন” কৰিবলৈ চৰকাৰক আহ্বান জনায়।
সংগঠনটোৰ এটা প্ৰধান গোট NDFB(P)ৰ অধ্যক্ষ গোবিন্দ বসুমতাৰীয়ে কয়, “চুক্তি স্বাক্ষৰ কৰাৰ স্বাৰ্থত জামিনত মুক্তি দিয়া দৈমাৰীক ৰাইজৰ কাষত কিয় থাকিবলৈ দিয়া নাই চৰকাৰে? মুখত শান্তিৰ কথা ক’লেই নহয়, কাৰ্য্যতঃ কৰিব লাগে৷ দৈমাৰীৰ উপস্থিতি অবিহনে স্থায়ী শান্তি অসম্ভৱ”।
তেওঁ লগতে হুংকাৰ দি কয়, “সোনকালে দৈমাৰীক মুকলি কৰি নিদিলে আমি আন্দোলনৰ কাৰ্যসূচী গ্ৰহণ কৰিম৷ এই আন্দোলন গণতান্ত্ৰিকভাৱে চলাম৷”
বোমা বিস্ফোৰণ আৰু হত্যাকাণ্ডৰ গোচৰত যাৱজ্জীৱন কাৰাবাস খাটি থকা দৈমাৰীক চৰকাৰে শান্তিচুক্তি স্বাক্ষৰ কৰা বাবে ২৫ জানুৱাৰিত অন্তৰ্ৱৰ্তী জামিন দিছিল।
কিন্তু তেওঁৰ জামিনৰ ম্যাদ শেষ হোৱাত ২০ ফেব্ৰুৱাৰিত আদালতে পুনৰ কাৰাগাৰত আত্মসমৰ্পণৰ বাবে নিৰ্দেশ দিয়ে।
অহা ২৪ ফেব্ৰুৱাৰিত এন ডি এফ বিৰ চাৰিওটা গোটে মিলি ওদালগুৰিত এখন বিশাল জনসভাৰ আয়োজন কৰিছিল যদিও দৈমাৰীক পুনৰ কাৰাগাৰলৈ নিক্ষেপ কৰাত এই জনসভা স্থগিত ৰখা হৈছে বুলি আজি সমন্বয়ৰক্ষী কমিটীয়ে জনায়।
ওদালগুৰিত আয়োজন কৰা এই বিশাল সভা এতিয়া বাতিল কৰা হৈছে ৷ সভালৈ হাগ্ৰামা মহিলাৰী, প্ৰমোদ বড়োকো জনাইছিল আমন্ত্ৰণ ৷
“মূল উদ্যোক্তা ৰঞ্জন দৈমাৰী কাৰাগাৰলৈ যাবলগীয়া হোৱাত ওদালগুৰিৰ সভা স্থগিত কৰা হৈছে”, NDFB(S)ৰ অধ্যক্ষ বি ছাউৰাইগৗৰাই কয়।
