অসম বিধানসভা নিৰ্বাচনত বৰাক উপত্যকাৰ ভোটেই শেষ কথা নহয়।
সেয়া উপলব্ধি কৰিয়েই কৰিমগঞ্জৰ জনসভাত মোদীয়ে আজি ঘূণাক্ষৰেও উল্লেখ্য নকৰিলে ‘কা’ৰ কথা। ‘কা’কলৈ আজিও উত্তপ্ত হৈ আছে ব্ৰহ্মপুত্ৰ উপত্যকা।
অসমলৈ জাতীয় সংকট নমাই আনিব পৰা আইন খনৰ বিৰুদ্ধে সদৌ অসম ছাত্ৰ সন্থায়ো কাইলৈ অৰ্থাৎ ২০ মাৰ্চৰ পৰা ৰাজ্যজুৰি আৰম্ভ কৰিব আন্দোলন।
এনে পৰিস্থিতিত ‘কা’ সমৰ্থন কৰা বৰাকৰ গৰিষ্ঠসংখ্যক লোকক সন্তুষ্ট কৰিবলৈ মোদীয়ে ‘কা’ সন্দৰ্ভত একো কথাই নক’লে।
উল্লেখ্য নিৰ্বাচনী প্ৰচাৰ চলাবলৈ পুনৰ অসমলৈ আহিছে প্ৰধানমন্ত্ৰী নৰেন্দ্ৰ মোদী।
ব্ৰহ্মপুত্ৰ উপত্যকাৰ বিভিন্ন স্থানত প্ৰচাৰ চলোৱাৰ অন্তত আজি মোদী আহে বৰাক উপত্যকালৈ।
বৰাক উপত্যকাৰ কৰিমগঞ্জত আজি মোদীয়ে বিজেপি প্ৰাৰ্থীৰ হৈ প্ৰচাৰ চলায়।
অসমলৈ এতিয়ালৈকে যিমান বাৰ মোদীয়ে নিৰ্বাচনী প্ৰচাৰ চলাবলৈ আহিছে কোনোবাৰেই এবাৰৰ বাবে হ’লেও উচ্চাৰণ কৰা নাই বহু বিতৰ্কিত নাগৰিকত্ব সংশোধনী আইন খনৰ কথা।
২০১৯ চনত অসম অগ্নিগৰ্ভ হৈ পৰা নাগৰিকত্ব সংশোধনী আইন অৰ্থাৎ ‘কা’ৰ কথা মোদীয়ে ইচ্ছাকৃত ভাবেই ব্ৰহ্মপুত্ৰ উপত্যকাৰ কোনো এখন নিৰ্বাচনী প্ৰচাৰ সভাতে উচ্চাৰণ কৰা নাছিল।
বাংলাদেশ, পাকিস্তান, আফগানিস্তান আদি দেশত ‘নিৰ্যাতন’ৰ সন্মুখীন হোৱা হিন্দু লোকসকলক ভাৰতত সংস্থাপিত কৰাৰ বাবে চৰকাৰে গৃহীত কৰা ‘কা’ৰ বিৰুদ্ধে ব্ৰহ্মপুত্ৰ উপত্যকাত প্ৰৱল আন্দোলনৰ সৃষ্টি হৈছিল যদিও বৰাক উপত্যকা আছিল এই ক্ষেত্ৰত ব্যতিক্ৰম।
বৰাক উপত্যকাৰ প্ৰায় সংখ্যক লোকেই ‘কা’ সমৰ্থন জনাই আহিছে।
সেয়ে ভোট ভিক্ষা কৰিবলৈ অহা মোদীয়ে কৰিমগঞ্জত আজি ‘কা’ৰ ৰেকৰ্ড খন পুনৰ বজাই উপত্যকাটোত বাস কৰা হিন্দু বাঙালী লোকসকলক অধিক আবেগিক কৰি তোলাৰ সুযোগ থকাৰ পিছতো মোদীয়ে ব্ৰহ্মপুত্ৰ উপত্যকাত বিজেপিয়ে ভোট হেৰুওৱাৰ আশংকা কৰিয়েই ‘কা’ৰ কথা মুখলৈয়ে নানিলে বুলি এতিয়া সৰ্বত্ৰ চৰ্চা হৈছে।
