কেতিয়াবা অতিপাত আনন্দৰ মুহূৰ্ত এটাও নিৰানন্দত পৰিণত হ’ব পাৰে।
২০২০ বৰ্ষ আমাৰ মাজৰ পৰা গুচি যাবলৈ মাজত মাত্ৰ কেইটামান ঘণ্টা বাকী।
কোভিড সংক্ৰমণকে ধৰি আন বহু নেতিবাচক ঘটনাৰে ভৰা এই বছৰটো।
বহু বেয়াৰ মাজতো অলপ আনন্দ কৰি বছৰটোক বিদায় দিওঁ বুলি প্ৰেমিকৰ সৈতে গান গাবলৈ বহিছিল ব্ৰিটিছ মূলৰ গায়িকা ছোফিয়া এলাৰে।
উদ্দেশ্য আছিল প্ৰেমিকৰ সৈতে একেলগে গীত গোৱাৰ ভিডিঁঅ’ গুণমুগ্ধসকলক উপহাৰ দিব।
সম্প্ৰতি মাদ্ৰিদত বাস কৰি থকা গায়িকা ছোফিয়াই প্ৰেমিক আলভাৰো চোলাৰৰ সৈতে সাজি-কাচি গীত গাবলৈ আৰম্ভ কৰিছিল। প্ৰেমিকে গীত গাইছিল আৰু সেই গীতৰ সৈতে প্ৰেমিকা ছোফিয়াই সুৰ মিলাই গৈছিল।
প্ৰেমিক-প্ৰেমিকাৰ এনে সংগীত চৰ্চাই এটা সময়ত তুংগত উঠিছিল। প্ৰেমিকৰ গীতৰ লহৰত হালি-জালি আছিল প্ৰেমিকা ছোফিয়া।
View this post on Instagram
তেতিয়াই ঘটি গ’ল অঘটনটো।গীতৰ লহৰত মূৰটো পিছপিনে হালি যোৱাৰ লগে লগে পিছ পিনে জ্বলি থকা চাকিৰ জুই লাগে ছোফিয়াৰ চুলিত।
এই ঘটনাৰ বিষয়ে তেওঁ অলপ সময় পিছতহে গম পায়।লগে লগে প্ৰেমিক চোলাৰে হাতেৰে মোহাৰি ছোফিয়াৰ চুলিত লগা জুই নুমুৱাই দিয়ে।
ফলত এক ভয়কৰ বিপদৰ পৰা ৰক্ষা পৰিল গায়িকাগৰাকী।
এই সমগ্ৰ ঘটনাৰ দৃশ্য গায়িকাগৰাকীয়ে তেওঁৰ ইনষ্টাগ্ৰামত ৰাজহুৱা কৰিছে।ইনষ্টাগ্ৰামত তেওঁ লিখিছে—‘২০১৯ চনত আমি ভালেই আছিলো, ২০২০ চনত চুলিত জুই লাগিল আৰু গ্লাছো ভাঙিল, ২০২১ চনটো সকলোৰে বাবে ভাল হওঁক’।