হায়দৰাবাদত সংঘটিত হৈছে এক চাঞ্চল্যকৰ ঘটনা। এগৰাকী যুৱতীয়ে চিকিৎসালয়ত ভৰ্তি হৈ থকা তেওঁৰ ‘ব্ৰেইন ডেড’ প্ৰেমিকৰ মোবাইল ফোন চুৰি কৰি তেওঁৰ দেউতাকৰ বেংক একাউণ্টলৈ ৩২ লাখ টকা স্থানান্তৰ কৰাৰ অভিযোগ উত্থাপন কৰিছে। ২০২৪ চনত অষ্ট্ৰেলিয়াৰ পৰা হায়দৰাবাদলৈ ঘূৰি অহা পন্নবয়না মল্লিকাৰ্জুন যাদৱ নামৰ এজন যুৱক ২০২৪ চনৰ ১৫ নৱেম্বৰত তেওঁৰ প্ৰেমিকা মেধা ৰেড্ডী আৰু কিছু চিনাকি বন্ধুৰ সৈতে পাৰ্টি কৰি ঘৰলৈ উভতি অহোঁতে ফ্লাই অভাৰত এক দুৰ্ঘটনাৰ সন্মুখীন হয়। দুৰ্ঘটনাৰ পিছত তেওঁক চিকিৎসালয়লৈ নিয়া হয় যদিও চিকিৎসকে তেওঁৰ মগজু মৃত বুলি ঘোষণা কৰে। তেতিয়াৰ পৰাই মল্লিকাৰ্জুন চিকিৎসালয়ত ভৰ্তি হৈ আছে।
মল্লিকাৰ্জুনৰ মাতৃ এল জি মুকেশ্বৰী যাদৱে দুৰ্ঘটনাৰ পিছত পুত্ৰৰ মোবাইল ফোন হেৰাইছে বুলি অভিযোগ কৰিছে। পুত্ৰৰ চিকিৎসাৰ বাবে টকাৰ প্ৰয়োজন হোৱাত তেওঁ বেংক একাউণ্ট পৰীক্ষা কৰি দেখে যে মল্লিকাৰ্জুনৰ একাউণ্টৰ পৰা ৩২ লাখ টকা তেওঁৰ প্ৰেমিকাৰ একাউণ্টলৈ স্থানান্তৰ কৰিছে।
প্ৰথমে আৰক্ষীয়ে এফআইআৰ ৰুজু কৰিবলৈ অস্বীকাৰ কৰে যদিও পিছত আৰক্ষীয়ে মল্লিকাৰ্জুনৰ প্ৰেমিকা মেধা ৰেড্ডী আৰু তেওঁৰ দেউতাকৰ বিৰুদ্ধে চুৰি আৰু জালিয়াতিৰ অভিযোগত এফআইআৰ ৰুজু কৰিছে। অভিযুক্তক বিচাৰি আৰক্ষীৰ অভিযান অব্যাহত ৰাখিছে। ইয়াৰ লগতে, প্ৰথমে গোচৰ ৰুজু নকৰা আৰক্ষী বিষয়াৰ বিৰুদ্ধে কৰ্তব্যত গাফিলতিৰ অভিযোগৰো তদন্ত চলি আছে।
মল্লিকাৰ্জুনৰ মাতৃয়ে কয়, ল’ৰাৰ বয়স মাত্ৰ ২৫ বছৰ। এনে কঠিন সময়ত তেওঁৰ ঘনিষ্ঠ প্ৰেমিকাই কেনেকৈ এনে কাম কৰিব ভাবিবই নোৱাৰো। ছোৱালীজনীৰ দেউতাকো এই কামত জড়িত। দোষীক শাস্তি দিয়াৰ বাবে আৰক্ষীক আহ্বান জনাইছো।
