উত্তৰ-পূব কয়লা ক্ষেত্ৰ মাৰ্ঘেৰিটাৰ অৰ্থনীতিৰ মেৰুদণ্ড। তিনিচুকীয়া জিলাৰ লগতে ৰাজ্যৰ বহু উদ্যোগ-প্ৰতিষ্ঠান এই প্ৰতিষ্ঠানটোৰ পৰা উৎপাদিত কয়লাৰ ওপৰত নিৰ্ভৰশীল। এই জাতীয় উদ্যোগটো কোনোপধ্যেই বন্ধ হ’বলৈ দিয়া নহ’ব।
ভাৰত চৰকাৰৰ কয়লা দপ্তৰে বুধবাৰে সমগ্ৰ ভাৰতবৰ্ষতে আয়োজন কৰা বন মহোৎসৱ আৰু বৃক্ষৰোপণ কাৰ্যসূচীৰ অংশবিশেষ হিচাপে লিডুৰ টিৰাপ কলিয়ৰীত অনুষ্ঠিত এখন সভাত ভাষণ প্ৰদান কৰি ভাৰত চৰকাৰৰ খাদ্য সংশাধন দপ্তৰৰ ৰাজ্যিক মন্ত্ৰী ৰামেশ্বৰ তেলীয়ে এই মন্তব্য কৰে।
দিহিং-পাটকাইত কয়লা খননক লৈ চলিত বিতৰ্ক আৰু প্ৰতিবাদৰ মাজতে ক’ল ইণ্ডিয়া লিমিটেডে যোৱা ৩ জুনত উত্তৰ-পূব কয়লাক্ষেত্ৰ, মাৰ্ঘেৰিটাত সকলো খনন বাতিলৰ নিৰ্দেশ দিছিল।
মুখ্য অতিথি তেলীয়ে উত্তৰ-পূব কয়লা ক্ষেত্ৰৰ কয়লা খননস্থলীকলৈ মাৰ্ঘেৰিটাৰ বাহিৰৰ দল-সংগঠন-ব্যক্তি বিশেষে ব্যাপক অপপ্ৰচাৰ চলাই উদ্যোগটো আজি বন্ধ হোৱাৰ পৰিৱেশ সৃষ্টি কৰা বুলি কয়।
কেন্দ্ৰীয় মন্ত্ৰী গৰাকীয়ে ৰাজহুৱা খণ্ডৰ প্ৰতিষ্ঠানটো কোনোপধ্যেই বন্ধ হ’বলৈ দিয়া নহ’ব বুলি স্পষ্ট কৰি দি তেওঁ প্ৰতিষ্ঠানটোৰ অচলাৱস্থা দূৰ কৰাৰ সম্পৰ্কত কেন্দ্ৰীয় আৰু ৰাজ্য উভয় চৰকাৰৰ সৈতে সঘন যোগাযোগ ৰাখি আহিছে বুলি কয়।
খাদ্য সংশাধন দপ্তৰে দেশৰ লগতে ৰাজ্যৰ বহু ঠাইত উদ্যোগ স্থাপনৰ বাবে পুঁজি আৱণ্টন দিয়াৰ কথা তেলীয়ে জানিবলৈ দিয়ে।
তাৰ ভিতৰত নলবাৰী, তিনিচুকীয়া আৰু তেজপুৰত ৩০কোটি টকাকৈ ফুড প্ৰচেচিং পাৰ্কৰ বাবে পুজিঁ আৱণ্টন দিয়া হৈছে বুলি কয়।
নতুন দিল্লীত গৃহ মন্ত্ৰী অমিত শ্বাহে উদ্বোধন কৰা এই কাৰ্যসূচীৰ লাইভ সকলোৱে উপভোগ কৰাৰ পাছতে আৰম্ভ কৰা সভাখনত বিধায়ক ভাস্কৰ শৰ্মাই ভাষণ প্ৰদান কৰি কয়লা উদ্যোগটোলৈ অহা ভাবুকিৰ কথা ব্যক্ত কৰি মাৰ্ঘেৰিটাবাসীয়ে এই উদ্যোগটো বন্ধ হোৱাটো কোনোপধ্যে নিবিচাৰে বুলি স্পষ্ট কৰি দিয়ে।
শৰ্মাই কয় স্থানীয় বিধায়ক হিচাপেই নহয় স্থানীয় বাসিন্দা হিচাপে উদ্যোগটোৰ স্বাৰ্থত কাম কৰি যাব।
বিধায়ক শৰ্মাই দিহিং পাটকাই অভয়াৰণ্যত কয়লাৰ মুক্ত খনন চলাৰ অপপ্ৰচাৰত লিপ্ত থকাসকলৰ কথা প্ৰকাশ কৰি ক্ষোভ প্ৰকাশ কৰে।
এচ পি দত্তই আতঁ ধৰা সভাখনত উপস্থিত থাকে স্থানীয় মহকুমাধিপতি, উত্তৰ-পূব কয়লা খনিৰ মুখ্য মহাপ্ৰবন্ধক যুগল কুমাৰ বৰা তথা অসম চৰকাৰৰ অন্যান্য বিষয়াবৰ্গ।
সভাৰ পাছতে প্ৰায় ৫০ হাজাৰ গছপুলি ৰোপণৰ লক্ষ্যৰে প্ৰতিষ্ঠানটোৱে আৰম্ভ কৰা পাৰ্কখনত এটিকৈ গছপুলি ৰোপণ কৰে কেন্দ্ৰীয় মন্ত্ৰী তেলী, বিধায়ক শৰ্মাৰ লগতে অতিথিসকলে।
তাৰপাছতে মাৰ্ঘেৰিটা উন্নয়ন খণ্ড সভাকক্ষত অনুষ্ঠিত এখন সভাত সাংসদ তেলীয়ে অংশগ্ৰহণ কৰি বিভিন্ন ধৰ্মীয় মঠ-মন্দিৰ আৰু নামঘৰৰ আন্তঃগাঁথনি উন্নীতকৰণৰ বাবে ২০১৭-১৮ বৰ্ষৰ সাংসদ উন্নয়ৰ পুঁজিৰ তৰফৰ পৰা মাৰ্ঘেৰিটা সমষ্টিৰ বিভিন্ন ধৰ্মীয় ক্ষেত্ৰলৈ অনুদানৰ চেক আগবঢ়ায়।
