একেলগে এইখন এখন বাছ আৰু ৰে’ল। দৰাচলতে এইখন এখন ডুৱেল ম’ড ভেহিকল বা ডিএমভি। বিশ্বৰ প্ৰথম এই ডুৱেল ম’ডৰ গাড়ী ৰাজপথৰ লগতে ৰে’লপথতো সমানে চলিব।
দেখিবলৈ মিনিবাছৰ দৰে এই ডিএমভি শনিবাৰৰ পৰা জাপানৰ টোকুশিমা প্ৰিপেকচাৰৰ কাইয়ো চহৰত ইয়াৰ যাত্ৰা আৰম্ভ হৈছে।
ৰাজপথত গাড়ীখন ৰবৰৰ টায়াৰেৰে চলিব যদিও ৰে’লপথত চলাৰ সময়ত ইস্পাটৰ চকা গাড়ীৰ তলৰ ভাগৰ পৰা ৰে’ল লাইনৰ ওপৰলৈ নামি আহে। তেতিয়াই ইয়াক এখন ৰে’লৰ কেৰিয়েজলৈ ৰূপান্তৰিত কৰে। ৰে’লৰ চকাকেইটাই সন্মুখৰ টায়াৰবোৰক ৰে’ললাইনৰ পৰা অঁতৰাই দিয়ে।
Also Read: মাজ আকাশতে ভাগি পৰিল ভাৰতীয় বায়ুসেনাৰ মিগ-২১ বাইছন; পাইলটৰ মৃত্যু
ডিএমভিৰ পৰিচালনা কৰিছে আশা ক’ষ্ট ৰে’লৱে কোম্পানীয়ে। ইয়াৰ মুখ্য কাৰ্যবাহী শিগেকি মিওৰাই কয় যে এই বাহনসমূহ কাইয়োৰ দৰে সৰু চহৰসমূহ বাবে তথা গ্ৰাম্য জনসাধাৰণৰ বাবে বিশেষ উপযোগী হ’ব।
এই ডিএমভি বাহন ৰে’ল লাইনত প্ৰতি ঘন্টাত সৰ্বোচ্চ ৬০ কিলোমিটাৰ গতিত চলিব পাৰিব। কিন্তু পথত ইয়াৰ গতি প্ৰতি ঘন্টাত ১০০ কিলোমিটাৰ হ’ব।
সেইদৰে পথৰ পৰা ৰে’লপথত চলাচলৰ বাবে সাজু হৈ উঠিবলৈ ইয়াক মাত্ৰ ১৫ছেকেণ্ড সময়ৰ প্ৰয়োজন হ’ব। চুইটছৰ জৰিয়তেই ইস্পাটৰ চকালৈ ৰূপান্তৰিত হৈ পৰিব। তদুপৰি, এই বাহনত চালককে ধৰি মাত্ৰ ২৩জন যাত্ৰীহে যাব পাৰিব।
Also Read: ৰাজধানী এক্সপ্ৰেছৰ আৰ্হিত বিদ্যালয়: কৃষ্ণাই আশুডুবি প্ৰাথমিক বিদ্যালয়ে আকৰ্ষিত কৰিছে শৈক্ষিক মহলক
২০০২ চনত আৰম্ভ হোৱা এই প্ৰকল্প এতিয়া যাত্ৰাৰ বাবে সাজু হৈছে আৰু সদ্যহতে এই ডিজেল চালিত বাহন টোকুশিমাৰ পৰা কোশি চহৰলৈ ১৫০ কিলোমিটাৰ পথতহে যাত্ৰা কৰিব।
