ৰাজধানী এক্সপ্ৰেছৰ আৰ্হিত বিদ্যালয়: কৃষ্ণাই আশুডুবি প্ৰাথমিক বিদ্যালয়ে আকৰ্ষিত কৰিছে শৈক্ষিক মহলক

গোৱালপাৰা জিলাৰ মাটিয়া শিক্ষা খণ্ডৰ অন্তৰ্গত কৃষ্ণাই আশুডুবি প্ৰাথমিক বিদ্যালয়খন সম্প্ৰতি শৈক্ষিক মহলৰ আকৰ্ষণৰ কেন্দ্ৰবিন্দু হৈ পৰিছে ৷ এই আকৰ্ষণৰ মূলতে হৈছে বিদ্যালয়খনৰ দৃষ্টিনন্দন সাজসজ্জা ৷ 

ৰাজধানী এক্সপ্ৰেছ ৰে’লগাড়ীৰ আৰ্হিত সজোৱা গোৱালপাৰাৰ এই চৰকাৰী বিদ্যালয়খন এতিয়া সকলোৰে বাবে আকৰ্ষণৰ কেন্দ্ৰবিন্দু হৈ পৰিছে ৷

শেহতীয়াকৈ চ’চিয়েল মিডিয়াতো চৰ্চিত হৈছে বিদ্যালয়খন ৷ এই সাজসজ্জা পিছে কোনো চৰকাৰী পৃষ্ঠপোষকতাত হৈ উঠা নাই। বিদ্যালয়খনৰ প্ৰধান শিক্ষক গৰাকীৰ নিজা প্ৰচেষ্টাতহে এনে ৰূপ লাভ কৰিছে বিদ্যালয়খনে ৷ প্ৰধান শিক্ষক গৰাকীয়ে সম্পূৰ্ণ নিজা খৰচেৰে সজাই তুলিছে বিদ্যালয়খন ৷

Also Read: সাহিত্য একাডেমী বঁটাপ্ৰাপক সংস্কৃত পণ্ডিত প্ৰভাত চন্দ্ৰ শৰ্মাৰ পৰলোকপ্ৰাপ্তি

১৯৫০ চনত স্থাপিত কৃষ্ণাইৰ আশুডুবি প্ৰাথমিক বিদ্যালয়ৰ প্ৰধান শিক্ষক অশোক নাথে ব্যক্তিগত প্ৰচেষ্টাত ৰাজধানী এক্সপ্ৰেছ ৰে’লগাড়ীৰ আৰ্হিত সজাই তুলিছে বিদ্যালয় গৃহ তথা শ্ৰেণীকোঠা সমুহ ৷

ব্যক্তিগত খণ্ডৰ বিদ্যালয়ৰ পৰিৱৰ্তে ছাত্ৰ-ছাত্ৰী সকলক চৰকাৰী বিদ্যালয়ৰ প্ৰতি আকৰ্ষিত কৰাৰ বাবে এই প্ৰচেষ্টা প্ৰধান শিক্ষকগৰাকীৰ ৷

যি সময়ত ব্যক্তিগত খণ্ডৰ বিদ্যালয়ৰ প্ৰতি অভিভাৱক তথা ছাত্ৰ-ছাত্ৰী সকল আকৃষ্ট হৈছে, তেনে সময়তে উক্ত চৰকাৰী বিদ্যালয়ৰ আটকধুনীয়া ৰূপে মোহিত কৰিছে শৈক্ষিক মহলৰ লগতে সৰ্বসাধাৰণ লোকক ৷

শিক্ষক গৰাকীৰ এই প্ৰচেষ্টাই বাস্তৱ ৰূপো লাভ কৰা পথত ৷ কাৰণ বহু ছাত্ৰ-ছাত্ৰীয়ে ব্যক্তিগত খণ্ডৰ বিদ্যালয় এৰি চৰকাৰী এই প্ৰাথমিক বিদ্যালয়খনলৈ ঢাপলি মেলাৰ  বাবে উৎসুকতা প্ৰকাশ কৰিছে ৷

ইফালে বিদ্যালয়ৰ শিক্ষক-শিক্ষয়িত্ৰীসকলেও ব্যক্তিগত বিদ্যালয়ৰ দৰে ছাত্ৰ-ছাত্ৰী সকলক প্ৰদান কৰি আহিছে শিক্ষা ৷ গুণগত শিক্ষাৰ মান উন্নত কৰাৰ উপৰি প্ৰদান কৰিছে নৈতিকতাৰ শিক্ষাও ৷

Also Read:কৰ ফাঁকি: সুগন্ধি দ্ৰব্যৰ ব্যৱসায়ীৰ ঘৰত টকাৰ পাহাৰ; জব্দ নগদ ১৭৭কোটি টকা

শেহতীয়াকৈ বিদ্যালয়খন আৰু অধিক সুন্দৰ ৰূপত সজোৱাৰ বাবে বহু পৰিকল্পনা গ্ৰহণ কৰিছে বিদ্যালয় খনৰ প্ৰধান শিক্ষক অশোক নাথ তথা সহকাৰী শিক্ষক বৰ্গই।