বিশ্বৰ প্ৰথমটো মূত্ৰাশয় সংৰোপণ সফলতাৰে সম্পন্ন কৰিছে আমেৰিকাৰ চিকিৎসকে। এই মূত্ৰাশয়টো লছ এঞ্জেলছৰ ৪১ বছৰীয়া অস্কাৰ লেৰিংগাৰৰ শৰীৰত সংৰোপণ কৰা হৈছে। চিকিৎসকৰ দাবী যে কেৱল আমেৰিকাতে নহয়, চিকিৎসা বিজ্ঞানৰ ইতিহাসত এয়া এক অভূতপূৰ্ব সাফল্য। এই অস্ত্ৰোপচাৰে গুৰুতৰ অংগ বিকলতাত ভুগি থকা হাজাৰ হাজাৰ ৰোগীৰ জীৱনলৈ নতুন আশা কঢ়িয়াই আনিব বুলিও চিকিৎসকসকলে দাবী কৰে।
আমেৰিকাৰ সংবাদ সংস্থা নিউয়ৰ্ক টাইমছৰ এক প্ৰতিবেদন অনুসৰি এই যুগান্তকাৰী অস্ত্ৰোপচাৰৰ আঁৰত আছে ভাৰতীয় মূলৰ ইউৰ’লজিষ্ট ইন্দৰবীৰ গিল। অস্ত্ৰোপচাৰৰ পিছত চিকিৎসকে কয় যে ৰোগীজন ট্ৰেকিয়াল এডিন’কাৰ্চিনোমা নামৰ এক বিৰল প্ৰকাৰৰ কৰ্কট ৰোগত আক্ৰান্ত হৈ আছিল।
চাৰি বছৰ আগতে টিউমাৰ এটা আঁতৰোৱাৰ অস্ত্ৰোপচাৰৰ পিছত তেওঁৰ মূত্ৰাশয়ৰ কাৰ্য্যক্ষমতা কাৰ্যতঃ সম্পূৰ্ণৰূপে হেৰাই গৈছিল। তেওঁ মাত্ৰ ৩০ ঘন চেণ্টিমিটাৰ প্ৰস্ৰাৱহে ৰাখিব পাৰিছিল, আনহাতে স্বাভাৱিক মূত্ৰাশয়ত ৩০০ ঘন চেণ্টিমিটাৰতকৈ অধিক তৰল পদাৰ্থ ৰাখিব পাৰিছিল। অৰ্থাৎ তেওঁৰ প্ৰস্ৰাৱ ধৰি ৰখাৰ কোনো ক্ষমতা নাছিল। এই অস্ত্ৰোপচাৰৰ পিছত তেওঁ স্বাভাৱিকভাৱে শৌচাগাৰ ব্যৱহাৰ কৰিবলৈ সক্ষম হৈছে।
গিলে লগতে কয়, “এই ট্ৰান্সপ্লাণ্টে ৰোগীৰ বাবে এনে সম্ভাৱনাৰ দুৱাৰ মুকলি কৰি দিছে, যিটো আগতে নাছিল। অংগ প্ৰতিস্থাপন হৈছে এক জীৱন ৰক্ষাকাৰী অস্ত্ৰোপচাৰ। বহু ক্ষেত্ৰত এই পদ্ধতি ৰোগীৰ জীৱন ৰক্ষা আৰু তেওঁলোকৰ জীৱনৰ মান উন্নত কৰিবলৈ অতি প্ৰয়োজনীয় হৈ পৰে। এতিয়া মূত্ৰাশয় প্ৰতিস্থাপন সেই তালিকাত যোগ দিব পৰা যাব।”
