হিমাচল প্ৰদেশৰ স্পিতি জিলাৰ হিক্কিমত অৱস্থিত বিশ্বৰ সৰ্বোচ্চ ডাকঘৰটোৱে এতিয়া এক নতুন ৰূপ লাভ কৰিছে। পৰ্যটকক আকৰ্ষিত কৰিবলৈ এই ডাকঘৰটোক এতিয়া লেটাৰবক্সৰ আকাৰত গঢ়ি তোলা হৈছে।
বিশ্বৰ সৰ্বোচ্চ এই ডাকঘৰটোত ১৯৮৩ চনৰ পৰা হিকিম গাঁৱত কাৰ্যকলাপ আৰম্ভ কৰা হৈছিল। এই ডাকঘৰটো সাগৰ পৃষ্ঠৰ পৰা ১৪,৫৬৭ ফুট উচ্চতাত অৱস্থিত।
লেটাৰবক্স আকৃতিৰ ডাকঘৰটো ভাৰতীয় ডাক বিভাগৰ হিমাচল চক্ৰৰ মুখ্য পোষ্ট মাষ্টাৰ জেনেৰেল বন্দিতা কৌলে উদ্বোধন কৰে। আনহাতে সহকাৰী উপায়ুক্ত অভিষেক বাৰ্মা সন্মানীয় অতিথি হিচাপে উপস্থিত থাকে।
ডাকঘৰটো উদ্বোধন কৰি কৌলে কয় “দেশত এই ডাকঘৰটোৰ দৰে কোনো ডাকঘৰ নাই। ই পৰ্যটকৰ আকৰ্ষণৰ কেন্দ্ৰবিন্দু। পৃথিৱীৰ পৰা অহা পৰ্যটকসকলে হিকিমি ডাকঘৰৰ পৰা তেওঁলোকৰ নিকট তম প্ৰিয়জনক পত্ৰ প্ৰেৰণ কৰে। পৰ্যটনৰ দিশৰ পৰাও ই অতি গুৰুত্বপূৰ্ণ বুলি প্ৰমাণিত হ’ব।”
আনহাতে, লাহৌল স্পিতিৰ সহকাৰী উপায়ুক্ত অভিষেক বাৰ্মাই কয় যে হিকিমৰ ডাকঘৰ স্পিতলৈ অহা পৰ্যটকৰ প্ৰিয় স্থানবোৰৰ ভিতৰত অন্যতম।
“এতিয়া পৰ্যটকসকলেও এই লেটাৰ বক্সৰ আকৃতিত চলি থকা ডাকঘৰটো ভাল পাব। এই নতুন কাৰ্যালয় গৃহটো লাংচা পঞ্চায়তত স্থাপন কৰা হৈছে।” বাৰ্মাই কয়।
