কেলিফৰ্ণিয়াৰ বিশ্ব প্ৰসিদ্ধ ছিকুইয়া নেশ্যনেল পাৰ্কত বনজুইৰ পৰা ৰক্ষা কৰিবলৈ অগ্নিনিৰ্বাপক বাহিনীয়ে প্ৰাচীন গছবোৰক অগ্নি-প্ৰশমক ব্লেংকেটেৰে ঢাকি দিছে।
বিষয়াসকলে বিশ্বৰ আটাইতকৈ বৃহৎ গছ কিছুমান থকা বিশাল ফৰেষ্টখনত কেইঘন্টামানৰ ভিতৰতে জুইয়ে গ্ৰাস কৰিব পাৰে বুলি শংকিত হৈছে।
এই বনাঞ্চলখনত বিশ্বৰ ভিতৰতে বৃহ আকৃতিৰ তথা প্ৰায় ২,৫০০বছৰ পুৰণি ২৭৫ ফুট ওখ ‘জেনেৰেল শ্বেৰমেন’ গছডালকে ধৰি প্ৰায় ২,০০০ছিকুইয়াছ গছ আছে।এসপ্তাহ ধৰি এই অঞ্চলটোত বিশাল জুইয়ে ছানি ধৰিছে।
এই জুই নুমুৱাবলৈ হেলিকপ্টাৰ আৰু পানী বৰষা বিমানেৰ সৈতে ৩৫০জনতকৈয়ো অধিক অগ্নি-প্ৰশমক যোদ্ধাই প্ৰচেষ্টা অব্যাহত ৰাখিছে। তেওঁলোকে জেনেৰেল শ্বেৰমেনকে ধৰি কেইবাডালো গছক এলমনিয়াম আস্তৰণেৰে সুৰক্ষিত কৱচ পিন্ধাইছে।
উল্লেখ্য যে পৃথিৱীত বৰ্তমান জীয়াই থকা আকৃতিৰ ফালৰ পৰা আটাইতকৈ বৃহৎ গছ এই জেনেৰেল শ্বেৰমেন প্ৰায় ২,৩০০ৰ পৰা ২,৭০০০ বছৰ পুৰণি বুলি অনুমান কৰা হৈছে।
বিশেষজ্ঞসকলে জানিবলৈ দিয়া মতে ছিকুইয়া গছবোৰ অতি অগ্নি-প্ৰতিৰোধক আৰু বহ্নিশিখাৰ মাজতো বৰ্তি থাকিব পাৰে।