শম্ভু সীমান্তত কৃষকৰ আন্দোলনে ২০০ দিন হোৱাৰ উপলক্ষে এক গণ সমাৱেশৰ আয়োজন কৰা হৈছে। শনিবাৰে তাত যোগদান কৰিব মল্লযুঁজাৰু বিনেশ ফ’গাটেও। খানৌৰী আৰু ৰতনপুৰা সীমান্ততো প্ৰতিবাদী সভাৰ আয়োজন কৰা হৈছে।
পেৰিছ অলিম্পিকত উজ্জ্বল প্ৰদৰ্শনৰ পাছত সকলোৰে মুখত ভিনেশৰ নাম। মল্লযুঁজৰ উপৰিও ভিনেশক বাৰে বাৰে বিভিন্ন আন্দোলনত দেখা গৈছে। এবছৰৰ পূৰ্বে তেওঁ যন্তৰ মন্তৰৰ ধৰ্ণা মঞ্চত একেৰাহে ৪০ দিন মূৰত ৰ’দ লৈ কটায় আৰু যৌন নিৰ্যাতনৰ অভিযোগত অভিযুক্ত সৰ্বভাৰতীয় মল্লযুঁজ ফেডাৰেচনৰ তদানীন্তন মুৰব্বী ব্রীজভূষণ শৰণ সিংক গ্ৰেপ্তাৰ কৰিবলৈ দাবী জনাইছিল। সাক্ষী মালিক, বজৰং পুনিয়াৰাও উপস্থিত থাকে। নতুন সংসদ ভৱন উদ্বোধনৰ দিনা ৰাজধানীৰ ৰাজপথৰ পৰা কাৰাগাৰৰ ভ্যানত দিল্লী আৰক্ষীয়ে তেওঁলোকক টানি লৈ যায়। সকলো অপমানৰ উত্তৰ দিবলৈ তেওঁ নিজকে নতুন উদ্যমেৰে পেৰিছ অলিম্পিকৰ বাবে প্ৰস্তুত কৰিছিল।কিন্তু মাত্ৰ ১০০ গ্ৰাম অতিৰিক্ত ওজনৰ বাবে অলিম্পিকৰ ফাইনেলৰ পৰা অযোগ্য ঘোষণা কৰাৰ পাছত সকলো আবেগিক হৈ পৰে৷
তেওঁ বাৰে বাৰে কৃষক আন্দোলনৰ বিষয়ে মুকলিকৈ কৈছে আৰু সমৰ্থন প্ৰকাশ কৰিছে। সূত্ৰ অনুসৰি শনিবাৰে শম্ভু সীমান্ত ৰেলীতো ভিনেশক দেখা পোৱা যাব। আগষ্ট মাহত পেৰিছৰ পৰা ঘৰলৈ উভতি অহাৰ পাছৰে পৰা ভিনেশ কংগ্ৰেছত যোগদান কৰিব পাৰে বুলি বিভিন্ন মহলে জল্পনা-কল্পনাৰ সৃষ্টি হৈছে। অৱশ্যে এই সকলোবোৰ জল্পনা-কল্পনাক খাৰিজ কৰি তেওঁ কয় যে বৰ্তমান তেওঁৰ এনে কোনো পৰিকল্পনা নাই।
প্ৰসংগক্ৰমে কৃষকসকলে চলিত বৰ্ষৰ ১৩ ফেব্ৰুৱাৰীৰ পৰা এই শস্যৰ নূন্যতম সমৰ্থন মূল্য (MSP) দাবীত আন্দোলন আৰম্ভ কৰিছে। কৃষক সংগঠনৰ মিত্ৰজোট কিষাণ মৰ্চাৰ দাবী কেন্দ্ৰই এম এছ পিৰ ওপৰত কৃষকক প্ৰতাৰণা কৰিছে। তাৰ পিমাছত মহাৰাষ্ট্ৰ, হাৰিয়ানা, ঝাৰখণ্ড আৰু জম্মু-কাশ্মীৰত বিধানসভা নিৰ্বাচনৰ পূৰ্বে দুগুণ উৎসাহেৰে পুনৰ আন্দোলন আৰম্ভ হ’ল। প্ৰসংগক্ৰমে কৃষকৰ আন্দোলনৰ বাবেই এইবাৰৰ লোকসভা নিৰ্বাচনত বিজেপিয়ে পঞ্জাৱ, হাৰিয়ানা, উত্তৰ প্ৰদেশ, ৰাজস্থান আৰু মহাৰাষ্ট্ৰৰ বহু গ্ৰাম্য আসন লাভ কৰে। গতিকে এইবাৰ পুনৰ কৃষকসকলে নিৰ্বাচনমুখী ৰাজ্যসমূহত বিজেপিক ‘আনমাস্ক’ কৰাৰ আন্দোলন আৰম্ভ কৰিছে। বিজেপিৰ ‘কৃষক বিৰোধী নীতি’ৰ বিৰুদ্ধে এই ৰাজ্যসমূহত কেইবাটাও সমদল, জাঠ আৰু মহাপঞ্চায়তৰ আয়োজন কৰা হৈছে। সেই আন্দোলন এইবাৰ ২০০ দিনত সংঘটিত হৈছিল।
