বিশিষ্ট চিন্তাবিদ, বুদ্ধিজীৱী ড০ হীৰেন গোহাঁইৰ বিৰুদ্ধে অসম আৰক্ষীয়ে ৰাষ্ট্ৰদ্ৰোহৰ গোচৰ তৰাক লৈ সমগ্ৰ ৰাজ্যৰ লগতে নগাঁৱৰ বৌদ্ধিক মহলতো তীব্ৰ প্ৰতিক্ৰিয়াৰ সৃষ্টি হৈছে।
বিশিষ্ট শংকৰী-সংস্কৃতিৰ গৱেষক তিলক চন্দ্ৰ মজুমদাৰে চৰকাৰৰ এনে সিদ্ধান্তক কঠোৰ ভাষাৰে সমালোচনা কৰি কয়, ‘’চৰকাৰৰ এনেধৰণৰ কাৰ্যই জনসাধাৰণক অধিক উত্তেজিত কৰি তুলিব। ফলত চৰকাৰৰ বিৰুদ্ধে জনসাধাৰণে অধিক আন্দোলন গঢ়ি তুলিবলৈ বদ্ধপৰিকৰ হৈ পৰিব।‘’
এই সন্দৰ্ভত বিশিষ্ট সমালোচক প্ৰভাত বৰাই প্ৰতিক্ৰিয়া প্ৰকাশ কৰি কয় যে অসমৰ সাম্প্ৰতিক চৰকাৰখনক অধমতন্ত্ৰ বা বহুৱাৰ চৰকাৰ বুলি ক’লে শুদ্ধ বৰ্ণনা হ’ব। আমি সকলোৱে এই চৰকাৰখনত এটা বহুৱা থকা কথা জানো আৰু এই বহুৱাৰ পৰামৰ্শ অনুসৰি চৰকাৰখনে প্ৰতিবাদী কণ্ঠক দমনৰ ব্যৱস্থা গ্ৰহণ কৰিছে। আনকি অসমৰ বিবেক স্বৰূপ ড০ হীৰেন গোহাঁইক কাৰাগাৰলৈ পঠিয়াবৰ বাবে সম্পূৰ্ণ প্ৰস্তুতি চলাইছে। কিন্তু ড০ গোহাঁইক গ্ৰেপ্তাৰ কৰি অসমৰ প্ৰতিবাদী কণ্ঠক ৰোধ কৰিব নোৱাৰে। অসমৰ জনসাধাৰণ আগতকৈ বেছি জাগৰিত হৈ চৰকাৰখন তথা দলটোক সাৰি-পুচি নৰ্দমালৈ দলিয়াই পেলাব লাগিব।
আন এজন বিশিষ্ট সাহিত্য সমালোচক উপেন্দ্ৰ বৰকটকীয়ে প্ৰতিক্ৰিয়া প্ৰকাশ কৰি কয়-হীৰেন গোহাঁইয়ে বহল দৃষ্টিভংগীৰে অসমৰ বৃহত্তৰ স্বাৰ্থত মাত মাতি আহিছে। তেওঁ বিষয়বোৰ বহল দৃষ্টিৰে বিশ্লেষণ কৰে। তেওঁৰ মনত কোনো সাম্প্ৰদায়িক ভাৱ নাই আৰু ধৰ্ম নিৰপেক্ষ দৃষ্টিৰে কথাবোৰ চায়। অসম আন্দোলনৰ সময়ত হীৰেন গোহাঁইয়ে গ্ৰহণ কৰা স্থিতি আৰু ভৱিষ্যদ্বাণী পাছলৈ সত্যত পৰিণত হয়। অসমৰ ভৱিষ্যতকলৈ চিন্তা-চৰ্চা কৰা সকলৰ ভিতৰত চিন্তাবিদ হীৰেন গোহাঁইয়ো অন্যতম। গণতান্ত্ৰিক দেশ এখনক হীৰেন গোহাঁইৰ ক্ষেত্ৰত চৰকাৰে আক্ৰোশমূলক ভাৱ লোৱাতো উচিত হোৱা নাই।
ইপিনে বিশিষ্ট গল্পকাৰ শিৱানন্দ কাকতীয়ে প্ৰতিক্ৰিয়া প্ৰকাশ কৰি কয় যে ইয়াৰ কোনো ভাষা নাই, যি ভাষাৰে গৰিহনা দিব পাৰি। গণতান্ত্ৰিক অধিকাৰ সকলোৰে আছে, সেই অধিকাৰক সন্মান কৰাৰ যিটো পৰিৱেশ সেই পৰিৱেশক গুৰুত্ব দিয়া অতি জৰুৰী। এই পৰিৱেশ যি ধৰণে মষিমূৰ হৈ আহিছে তেনেদৰে ভয় আৰু শংকা মূলক স্থিতিক মানুহে কথা কোৱাৰ পৰিৱেশ নোহোৱা হৈ যে আহিছে সেয়া ড০ হীৰেন গোহাঁইৰ বিৰুদ্ধে ৰচা ষড়যন্ত্ৰই তাকেই প্ৰমাণ কৰিছে।
আন এজন বিশিষ্ট কবি জীৱন নৰহে প্ৰতিক্ৰিয়া প্ৰকাশ কৰি কয়-স্বজাতিক প্ৰতাৰণা কৰি ৰাজপাট খোৱাতকৈ হীৰেন গোহাঁই ছাৰৰ দৰে স্বজাতিৰ হকে মাত মাতি দেশ দ্ৰোহ হোৱাই হাজাৰ গুণ মঙ্গল। ড০ হীৰেন গোহাঁইৰ বিবেক আজিলৈ কোনো ৰাজনৈতিক দলে কিনিব পৰা নাই, তেওঁ কাৰো স্তাৱক নহয়। তেওঁক পুলিচে দিয়া ‘দেশ দ্ৰোহ’ৰ গোচৰ অসমীয়া মানুহৰ সততা আৰু সাহসৰ কঠিন কন্ঠস্বৰ। যি কন্ঠস্বৰে স্বজাতিৰ বিপদত বিবেকহৈ থি দিয়ে। ছাৰৰ প্ৰতি কৰা ষড়যন্ত্ৰ তুলুঙা শাসক বৰ্গৰ চিন্তাৰ পৰিচয়। ধিক্কাৰ দিছো আৰু ‘দেশ দ্ৰোহ’ত আমিয়ো ছাৰৰ লগত আছো।
উল্লেখ্য যে, লতাশিল থানাত আৰক্ষীয়ে নিজাববীয়াকৈ গোচৰ ৰুজু কৰিছে। বিশিষ্ট চিন্তাবিদ তথা বুদ্ধিজীৱীগৰাকীৰ বিৰুদ্ধে দেশদ্ৰোহৰ বিভিন্ন ধাৰাৰ জৰিয়তে ৰাষ্ট্ৰদ্ৰোহৰ অভিযোগ তোলা হৈছে। যোৱা ৭ জানুৱাৰীত অনুষ্ঠিত হোৱা লতাশিলৰ এখন প্ৰতিবাদী সভাত ড০ গোহাঁইয়ে কৈছিল যে যদি ভাৰত চৰকাৰ তথা অসম চৰকাৰে অসমৰ জনসাধাৰণৰ কথা নুশুনে, তেতিয়াহ’লে অসমৰ জনসাধাৰণে ‘স্বাধীনতা’ বিচাৰিব। আনহাতে, ড০ গোহাঁইৰ লগতে অখিল গগৈ, মনজিৎ মহন্তৰ লগতে ৭ জানুৱাৰিত লতাশিলত অনুষ্ঠিত হোৱা প্ৰতিবাদী সভাত অংশগ্ৰহণ কৰা সকলোৰে বিৰুদ্ধে আৰক্ষীয়ে গোচৰ ৰুজু কৰিছে।
