ডব্লিউ ডব্লিউ ইৰ বিশ্ব বিখ্যাত যোদ্ধা গ্ৰেট খালী আজি গুৱাহাটীত উপস্থিত হৈ ব’ব ফিটনেছ একাডেমী উদ্বোধন কৰে।
মহানগৰীৰ হোটেল পেলেছিয়াত একেডেমীৰ উদ্বোধনী অনুষ্ঠান অনুষ্ঠিত হয়। ইয়াত ব্যায়ামশালা, পুষ্টি আৰু শাৰীৰিক ব্যৱহাৰিক পাঠ্যক্ৰম সমূহ থাকিব।
২.৫ মাহৰ পৰা ৬ মাহলৈকে বিভিন্ন পাঠ্যক্ৰম থাকিব। দশম শ্ৰেণী উত্তীৰ্ণ হোৱাৰ পিছৰে পৰাই এই একাডেমিত নামভৰ্তি কৰিব পাৰিব।
একেডেমিৰ নামভৰ্তি মাচুলো ভিন্ন ভিন্ন হ’ব। ২৫০০০ ৰ পৰা আৰম্ভ কৰি ৪০ হাজাৰলৈকে থাকিব নামভৰ্তি মাচুল।
বিশ্বৰ শৰীৰ চৰ্চা সন্থাৰ প্ৰাক্তন সভাপতি তথা বিশ্ব প্ৰসিদ্ধ ফিটনেছ গুৰু প্ৰদীপ বাবা মাধক একাডেমীখনৰ মুখ্য সঞ্চালক আৰু সৃষ্টিকৰ্তা হিচাপে আছে। যুক্ত মুখ্য সঞ্চালক হিচাপে আছে নিলাক্ষী চৌধুৰী।
বিশ্বৰ বিভিন্ন প্ৰান্তৰ জিম প্ৰশিক্ষকক প্ৰশিক্ষণ দিবৰ বাবে অনা হ’ব উক্ত একাডেমীলৈ।
এই একাডেমীখন উলুবাৰীৰ বি বৰুৱা পথত অৱস্থিত।
উদ্বোধনী অনুষ্ঠানত মুখ্য অতিথি হিচাপে অংশগ্ৰহণ কৰি ডব্লিউ ডব্লিউ ইৰ বিশ্ব বিখ্যাত যোদ্ধা গ্ৰেট খালীয়ে কয়, ‘মাধকক ধন্যবাদ জনাইছো ইমান সুন্দৰ পদক্ষেপ লোৱাৰ বাবে। শৰীৰ চৰ্চাৰ বাবে আগবাঢ়ি আহিলে মই বহুত সুখী হওঁ।’
২৫ বছৰ ধৰি একেৰাহে শৰীৰ চৰ্চা কৰি আহিছে বুলি তেওঁ উল্লেখ কৰি কয় ‘আমেৰিকাত থাকিও ভাৰতৰ প্ৰতি টান এটা থকাৰ বাবে ইয়ালৈ ঘূৰি আহিলো। ভাৰতৰ লগতে পঞ্জাৱৰ হৈও কিবা এটা কৰিবলগীয়া আছে।’
‘কিছুমান ব্যায়ামাগাৰ আছে য’ত ভাল প্ৰশিক্ষক নাথাকে। তেনে ব্যায়ামাগাৰত প্ৰশিক্ষণ ল’ব নালাগে। তেতিয়া শৰীৰৰ ক্ষতি হ’ব পাৰে। ভাল প্ৰশিক্ষকৰ ওচৰত প্ৰশিক্ষণ ল’ব লাগে। জিম কৰিবলৈ ধৈৰ্য লাগিব। এদিন দুদিন কৰি এৰি দিলেই নহ’ব।’, গ্ৰেট খালীয়ে কয়।
পঞ্জাৱ ড্ৰাগছৰ বৃহৎ ঘাটিলৈ পৰিণত হৈছে বুলি উল্লেখ কৰি খালীয়ে কয় ‘ড্ৰাগছ আসক্ত বহু যুৱকক মোৰ জিম চেণ্টাৰ লৈ আনি শৰীৰ শিক্ষাৰ প্ৰশিক্ষণ দিয়া হৈছে। তেওঁলোক এতিয়া নিচাৰ পৰা মুক্ত হৈছে। ড্ৰাগছৰ নিচা ৰাতি খালে ৰাতিপুৱালৈ গুচি যাব কিন্তু সেই নিচাটো যদি ক্ৰীড়া ক্ষেত্ৰত ব্যৱহাৰ কৰে তেতিয়া জীৱনটো উন্নতী হ’ব।’
সংস্থাটোত ফিটনেছ প্ৰশিক্ষক, আহাৰ বিশেষজ্ঞ, এৰবিক প্ৰশিক্ষক, ক্ৰচফীত প্ৰশিক্ষক, ঝুমবা প্ৰশিক্ষক, যোগাসনৰ ডিপ্লোমা, মধুমেহ শিক্ষককে আদি কৰি কিছুমান স্বীকৃতি প্ৰাপ্ত পাঠ্যক্ৰমৰ প্ৰশিক্ষণ দিয়া হ’ব বুলি জানিবলৈ দিয়ে মাধকে।
