নিউজিলেণ্ডৰ বিৰুদ্ধে ঘৰৰ মাটিত বিধ্ৱস্ত হোৱাৰ পিছত অষ্ট্ৰেলিয়া ভ্ৰমণত যোৱা ভাৰতীয় টেষ্ট দলটোক লৈ ক্ৰিকেট অনুৰাগীৰ চিন্তা আছিল। কিন্তু সকলো চিন্তা-চৰ্চা আঁতৰাই বুমৰাহৰ নেতৃত্বত টিম ইণ্ডিয়াই আকৰ্ষণীয় আৰম্ভণি ঘটাইছে।
অষ্ট্ৰেলিয়াই হয়তো সপোনতো কল্পনাও কৰিব পৰা নাছিল যে ভাৰতীয় ক্ৰিকেট দলটোৱে এনেদৰে প্ৰত্যাৱৰ্তন কৰিব পাৰে। অৱশ্যেই সৌজন্যত টিম ইণ্ডিয়াৰ অধিনায়ক যশপ্ৰীত বুমৰাহ। তেওঁ অকলে ৫টা উইকেট দখল কৰে। পাৰ্থ টেষ্টৰ প্ৰথম ইনিংছত অষ্ট্ৰেলিয়াই ১০৪ ৰান সংগ্ৰহ কৰি আউট হৈছে।
এই মেচত টিম ইণ্ডিয়াই টছত জয়লাভ কৰি প্ৰথমে বেটিং কৰাৰ সিদ্ধান্ত লয়। অৱশ্যে ভাৰতৰ আৰম্ভণি ভাল নহ’ল। মাত্ৰ ১৫০ ৰানত অল আউট হয়। দলটোৰ হৈ নীতিশ কুমাৰ ৰেড্ডীয়ে সৰ্বাধিক ৪১ ৰান সংগ্ৰহ কৰে।
ভাৰতৰ বেটিংক সমালোচনা কৰা আৰম্ভ হৈছিল। কিন্তু, টিম ইণ্ডিয়াৰ পেচাৰসকলেও দেখুৱাই দিলে যে তেওঁলোক পিছ পৰি থকা নাই। প্ৰথম দিনটোৰ শেষত অষ্ট্ৰেলিয়াই ৬৭ ৰানত ৭টা উইকেট হেৰুৱাইছিল। তেতিয়া আশা কৰা হৈছিল যে দ্বিতীয় দিনা পুৱা অষ্ট্ৰেলিয়াই হয়তো আৰু বেছি সময় বেটিং কৰিব নোৱাৰিব।
দিনটোৰ আৰম্ভণিতে এলেক্স কেৰীৰ (২১) উইকেট দখল কৰে যশপ্ৰীত বুমৰাহে। হৰ্ষিত ৰাণাৰ বলত কে এল ৰাহুলৰ হাতত কেচ দি উভতি যায় নাথান লিয়ন (৫)। হৰ্ষিতে ষ্টাৰ্কৰ শেষ উইকেটটোও লয় (২৬)। প্ৰথম ইনিংছত হৰ্ষিতে তিনিটা উইকেট দখল কৰে। বাকী দুটা উইকেট দখল কৰে মহম্মদ চিৰাজে।
প্ৰথম ইনিংছত টিম ইণ্ডিয়াৰ অগ্ৰগতি ৪৬ ৰান। এই পৰিস্থিতিত দ্বিতীয় ইনিংছত অলপ ভাল বেটিং প্ৰদৰ্শন আশা কৰিব পাৰি। বিশেষকৈ বিৰাট কোহলী আৰু যশস্বী জয়ছোৱালৰ পৰা ৰান আশা কৰিছে ভাৰতীয় ক্ৰিকেট অনুৰাগীয়ে। যদি গোটেই দলটোৱে আৰু ১৫০-১৬০ ৰান কৰিব পাৰে, তেন্তে টিম ইণ্ডিয়াই ২০০ ৰানৰ অধিক অগ্ৰগতি লাভ কৰিব। এই দৃশ্যপটত ভাৰতে জয়ী হোৱাৰ সোণালী সুযোগ আছে।
ভাৰতে ইতিমধ্যে যশস্বী জয়ছোৱাল আৰু কে এল ৰাহুলৰ অপেনিং যুটীত কোনো উইকেট নেহেৰুৱাকৈ দ্বিতীয় ইনিংছত ৪৩ ৰান সংগ্ৰহ কৰিছে। সেই সূত্ৰে ভাৰতৰ সামগ্ৰিক লীড হৈছে ৮৯ৰান।
