মহেন্দ্ৰ সিং ধোনীৰ নেতৃত্বত চেন্নাই ছুপাৰ কিংছে আই পি এলৰ প্লে অফত স্থান সুৰক্ষিত কৰিব নোৱাৰিলেও অনুৰাগী সকলৰ বাবে আহিছে এটা সুখবৰ।
ধোনীৰ লগতে দলৰ শোচনীয় প্ৰদৰ্শনৰ ধাৰা অব্যাহত থকাৰ সময়তে বিভিন্ন মাধ্যমত এটা খবৰ ওলাইছিল যে আই পি এলত ধোনীৰ আজি অন্তিমখন মেচ।
আন্তঃৰাষ্ট্ৰীয় ক্ৰিকেটৰ পিছত আই পি এলৰ পৰাও ধোনীয়ে অৱসৰ ল’ব বুলি ওলাই থকা খবৰক আজি সম্পূৰ্ণৰূপে নস্যাৎ কৰি দিলে ধোনীয়ে।
আজি কিংছ ইলেভেন পঞ্জাৱৰ বিৰুদ্ধে লীগৰ অন্তিমখন মেচত ধোনীয়ে স্পষ্ট কৰি দিছে যে তেওঁ আই পি এল খেলি থাকিব আৰু অৱসৰৰ কথা বৰ্তমান চিন্তা-চৰ্চা কৰা নাই।
আজি ধোনীয়ে আই পি এল ২০২০ত শেষবাৰৰ বাবে টছ কৰিবলৈ আহোতে ধাৰাভাষ্যকাৰ ডেনি মৰিছনে তেওঁক সোধে যে হালধীয়া জাৰ্চিত আপোনাৰ এইখন অন্তিম আই পি এল মেচ নেকি?
উত্তৰত ধোনীয়ে কয়, ‘নহয় কোনো কাৰণতেই নহয়, হালধীয়া জাৰ্চিত এইখন মোৰ অন্তিম মেচ নহয়’।
ইয়াৰ পূৰ্বে চেন্নাই ছুপাৰ কিংছ দলৰ চি ই অ’ৱেও কৈছিল যে অহাবাৰো ধোনীয়ে চেন্নাইক নেতৃত্ব প্ৰদান কৰিব।
উল্লেখ্য যে আই পি এল ইতিহাসত ধোনী আৰু তেওঁৰ নেতৃত্বত চেন্নাই ছুপাৰ কিংছ দলে এইবাৰেই আটাইতকৈ শোচনীয় প্ৰদৰ্শন আগবঢ়াইছে। দলে ধোনীৰ নেতৃত্বত প্ৰথমবাৰৰ বাবে প্লে অফত স্থান সুৰক্ষিত কৰিব নোৱাৰিলে।
চলিত আই পি এলত ধোনীয়ে গড়ে ২৫ কৈ মাত্ৰ ২০০ ৰানহে কৰিবলৈ সক্ষম হৈছে। তদুপৰি ২০১৫ৰ পিছত প্ৰথমবাৰৰ বাবে ধোনীয়ে এইবাৰ এটাও মেন অৱ দ্যা মেচ পাবলৈ সক্ষম নহ’ল।
এনেবোৰ কাৰণৰ বাবেই বহু ক্ৰিকেট প্ৰেমী তথা বিশেষজ্ঞ সকলে ধোনীক যথেষ্ট সমালোচনা কৰাৰ লগতে আই পি এলৰ পৰাও অৱসৰ ল’বলৈ দাবী জনাই আহিছিল।