কোৱা হয় প্ৰেম সুন্দৰ, প্ৰেম স্বৰ্গীয় অনুভূতি। প্ৰেমৰ বাবে প্ৰেমাস্পদ সাজু থাকে সকলো ত্যাগ কৰিবলৈ।
কিন্তু প্ৰেমৰ এই ধাৰণাত কালিমা সানিলে এক প্ৰত্যাখ্যিত প্ৰেমিকে। অসমত সৌ-সিদিনা মৰিধল কলেজৰ ছাত্ৰী নন্দিতা শইকীয়াৰ হত্যাকাণ্ডই জোকাৰি গৈছিল। আকৌ তেনে এক ঘটনাৰে পুনৰাবৃত্তি হৈছে। এজন যুৱকৰ প্ৰেমৰ প্ৰস্তাৱ নাকচ কৰাৰ বাবেই শিৰশ্চেদ কৰিলে এগৰাকী কিশোৰীক। অৱশ্যে এইবাৰ পশ্চিম বংগৰ ফালাকাটাত সংঘটিত হৈছে এই নৃশংস হত্যাকাণ্ড। এই বৰ্বৰ হত্যাকাণ্ডৰ খবৰ বিয়পি পৰাৰ লগে লগে চাঞ্চল্যৰ সৃষ্টি হৈছে সমগ্ৰ দেশতে।
হত্যাকাণ্ডৰ বিষয়ে খবৰ পোৱাৰ পিছত স্থানীয় ফালাকাটা আৰক্ষী থানাৰ ভাৰপ্ৰাপ্ত আৰক্ষী বিষয়া সনাতন সিংহ এক বৃহৎ আৰক্ষী বাহিনীৰ সৈতে ঘটনাস্থলীত উপস্থিত হয় আৰু যুৱকজনক গ্ৰেপ্তাৰ কৰে।
স্থানীয় সূত্ৰ অনুসৰি অভিযুক্ত চুবুৰীয়া যুৱকজনে ফালাকাটাৰ খালিচামাৰী গাঁৱৰ এগৰাকী দশম শ্ৰেণীৰ ছাত্ৰীক প্ৰেমৰ প্ৰস্তাৱ আগবঢ়াইছিল। কিন্তু ছাত্ৰী গৰাকীয়ে ই প্ৰস্তাৱ প্ৰত্যাখ্যান কৰিছিল।
ইয়াতে খৰ্গহস্ত হৈ যুৱকজনে প্ৰায়ে কিশোৰীগৰাকীক অপদস্থ কৰিছিল। কিন্তু বুধবাৰে এই নিৰ্যাতনে নিৰ্মম আৰু চুড়ান্ত ৰূপ লয়। ছাত্ৰীগৰাকী স্কুললৈ যোৱাৰ সময়তে ঘৰৰ চৌহদতে যুৱকজনে দাৰে আঘাত হানে আৰু কিশোৰীগৰাকীৰ শিৰ ডিঙিৰ পৰা পৃথক হৈ ছিটিকি পৰে। ঘৰৰ চৌহদ তেজেৰে ৰাঙলী হৈ থকা দৃশ্যই সকলোকে হতচকিত কৰি তোলে।
আৰক্ষীৰ ভাষ্য অনুসৰি যুৱকজন হত্যাৰ পিছত ঘৰলৈ উভতি আহিছিল আৰু শৰীৰত লাগি থকা তেজ ধুই পেলায়। যুৱকজনৰ ভগ্নীয়ে এই দৃশ্য দেখি আতংকিত হৈ পৰে যদিও যুৱকজনে তেওঁক এই বিষয়ে কাকো অৱগত নকৰিবলৈ ভাবুকি দিছিল।
এনে এক নিৰ্মম হত্যাকাণ্ডৰ বিষয়ে তথ্য লাভ কৰি ঘটনাস্থলীত এক বৃহৎ আৰক্ষী বাহিনী উপস্থিত হয়। ইতিমধ্যে যুৱকজনক গ্ৰেপ্তাৰ কৰা হৈছে আৰু আৰক্ষী চকীলৈ লৈ যোৱা হৈছে।
প্ৰেমত প্ৰত্যাখ্যানৰ বাবে প্ৰতিশোধলব্ধ হৈ যুৱকজনে এনে নিৰ্মম হত্যাকাণ্ড সংঘটিত কৰে নে ইয়াৰ আঁৰত আন কোনো কাৰণ আছে সেই বিষয়ত তদন্ত অব্যাহত ৰাখিছে আৰক্ষীয়ে। অৱশ্যে স্থানীয় লোকে এইয়া এক শীতল মস্তিষ্কৰ পৰিকল্পিত হত্যাকাণ্ড বুলি অভিযোগ কৰিছে আৰু হত্যাকাৰী যুৱকজনৰ উচিত শাস্তি দাবী কৰিছে।
