কামৰূপৰ কমলপুৰত পিষ্টলসহ যুৱকক গ্ৰেপ্তাৰ; সেনাৰ নাটক আখ্যা ধৃত যুৱকৰ

কামৰূপৰ কমলপুৰত আজি আৰক্ষী আৰু সেনাই যুটীয়া অভিযান চলাই নিজকে ছালফা সদস্য বুলি দাবী কৰা এজন যুৱকক পিষ্টল আৰু গুলীসহ গ্ৰেপ্তাৰ কৰে। আৰক্ষীৰ ভাষ্যমতে কেন্দুকোণাৰ চহিদুল হক ওৰফে ৰুবুল নামৰ যুৱকজনে নিজৰ পিষ্টলটো ব্যৱহাৰ কৰি ডকাইতিত জড়িত হৈ আহিছিল। তেওঁৰ পৰা আৰক্ষীয়ে আমেৰিকাত নিৰ্মিত ১০১ পিষ্টল, সক্ৰিয় গুলী জব্দ কৰে।

যুৱকজনে দীৰ্ঘদিনৰ পৰা ভিন্ন ঠাইত ডকাইতি কাৰ্যত এই পিষ্টলতো ব্যৱহাৰ কৰি সন্ত্ৰাস চলাই আহিছিল বুলি বিশেষ সূত্ৰৰ পৰা আৰক্ষীয়ে জানিবলৈ পাই তেওঁৰ বিৰুদ্ধে অভিযান চলাই গ্ৰেপ্তাৰ কৰা বুলি কয়।

উল্লেখযোগ্য যে আগন্তুক গণৰাজ্য দিৱসৰ প্ৰাকমুহূৰ্তত ৰাজ্যৰ নিৰাপত্তাৰ দিশটোত বিশেষ মনোযোগ দিছে অসম আৰক্ষীয়ে। আৰক্ষীয়ে যুৱকজনৰ কৰ্মকাণ্ড সন্দৰ্ভত জোৰ তদন্ত অব্যাহত ৰাখিছে বুলি জানিব পৰা গৈছে।

আনহাতে নিজকে ছালফা সদস্য বুলি পৰিচয় দি অহা ৰুবুলে তেওঁৰ গ্ৰেপ্তাৰ ভাৰতীয় সেনাৰ নাটক বুলি কয়।