বিদ্যালয় সপ্তাহৰ নাটক প্ৰতিযোগিতাৰ কথা। নাটকৰ মাধ্যমেৰেই কিশোৰ গৰাকীয়ে বিপ্লবী ভগৎ সিঙৰ কথা আৰু স্বাধীনতা সংগ্ৰামত তেওঁৰ অৱদানৰ কথা জানিবলৈ পাইছিল।
নাটকত ভগৎ সিঙৰ ফাঁচিৰ দৃশ্যৰ সময়ত চকুপানী ওলাইছিল কিশোৰ গৰাকীৰ।
নাটকত কিশোৰ গৰাকীয়ে ভগৎ সিঙৰ চৰিত্ৰত অভিনয় কৰিবলৈ পোৱা নাছিল, অভিনয় কৰিছিল এজন আৰক্ষী বিষয়াৰ চৰিত্ৰতহে।
ঘৰলৈ উভতি কিশোৰ গৰাকীয়ে ভগৎ সিঙৰ চৰিত্ৰত অভিনয়ৰ অনুশীলন কৰে আৰু ফাঁচিৰ দৃশ্য অনুকৰণ কৰিবলৈ গৈ মৃত্যুক সাবতিলবলগীয়া হয়।
এই ঘটনাৰ পাছতে চাঞ্চল্যৰ সৃষ্টি হৈছে মধ্যপ্ৰদেশৰ মান্দচৌৰত।
ভগৎ সিঙৰ ফাঁচিৰ অনুকৰণ কৰিবলৈ গৈ মৃত্যু হোৱা কিশোৰ গৰাকীৰ নাম শ্ৰেয়াছ।
পৰিয়ালৰ লোকে ঘৰৰ চিলিং ফেনত ওলমি থকা অৱস্থাত শ্ৰেয়াছক উদ্ধাৰ কৰে আৰু চিকিৎসালয়লৈ লৈ যায় যদিও চিকিৎসকে তেওঁক মৃত ঘোষণা কৰে।
শ্ৰেয়াছৰ পৰিয়ালৰ লোকে জনোৱা মতে বিদ্যালয়ত ভগৎ সিঙৰ নাটকত অভিনয় কৰি অভিভূত হৈ পৰিছিল শ্ৰেয়াছ আৰু ঘৰলৈ আহি তেওঁ ভগৎ সিঙৰ ফাঁচিৰ দৃশ্য অনুকৰণ কৰে যাৰবাবে দুৰ্ঘটনাটো সংঘটিত হয়।
আনহাতে, উক্ত ঘটনাৰ প্ৰতি লক্ষ্য কৰি এতিয়াৰে পৰা মান্দচৌৰৰ বিদ্যালয় সমূহৰ নাটকত তেনেধৰণৰ দৃশ্য সংলগ্ন নকৰাৰ সিদ্ধান্ত গ্ৰহণ কৰে।
