ড্ৰাগছৰ বাবেই প্ৰাণ হেৰুৱাব লগীয়া হ’ল এগৰাকী ২৫ বছৰীয়া যুৱকে। যুৱকজন গোলাঘাট চহৰৰ চানমাৰীৰ বাসিন্দা সঞ্জীৱ গোস্বামী। জানিব পৰা অনুসৰি গোলাঘাটৰ কুখ্যাত ড্ৰাগছ মাফিয়াৰ হাতত প্ৰাণ হেৰুৱাই এই গৰাকী প্ৰতিভাসম্পন্ন যুৱকে।
পৰিয়ালৰ লোকে জানিবলৈ দিয়া অনুসৰি পুনৰে পৰা উচ্চ শিক্ষা গ্ৰহণ কৰা সঞ্জীৱ ড্ৰাগছ আসক্ত আছিল আৰু যোৱা তিনি মাহৰ পৰা তেওঁ গুৱাহাটীত চিকিৎসাধীন হৈ আছিল।
‘তাক শনিবাৰে ঘৰলৈ লৈ অহা হৈছিল। মোৰ ল’ৰাটোৱে ড্ৰাগছ মাফিয়া জজৌ ওৰফে মৃণাল গগৈৰ ওচৰত মোবাইলটো বন্ধকত থৈছিল আৰু সেইটো আনিবলৈ কালি জজৌৰ ঘৰলৈ গৈছিল। কিন্তু বহু সময়ৰ পাছত অচেতন অৱস্থাত সঞ্জীৱক দুজন যুৱকে এখন ৰিক্সাত লৈ অহা দেখো। লগে লগে মই মোৰ ল’ৰাটোক অসামৰিক চিকিৎসালয়লৈ লৈ আহো যদিও চিকিৎসকে মৃত বুলি ঘোষণা কৰে’। এইদৰে কয় সঞ্জীৱৰ মাতৃ ৰুণু গোস্বামীয়ে।
মাতৃ ৰুণু গোস্বামীৰ অভিযোগ অনুসৰি ড্ৰাগছ মাফিয়া জজৌৱে আন কেইজনমানৰ লগত মিলি তেওঁৰ পুত্ৰক হত্যা কৰিছে। তেওঁ গোলাঘাট আৰক্ষী থানাত এই সন্দৰ্ভত গোচৰ দিছে। এই গোচৰৰ ভিত্তিত আৰক্ষীয়ে ইতিমধ্যে অকণি গগৈ আৰু ভাৰতী গগৈ নামৰ দুজনক গ্ৰেপ্তাৰ কৰি ন্যায়িক জিম্মালৈ প্ৰেৰণ কৰিছে।
ইফালে এই ঘটনাৰ মূল অভিযুক্ত জজৌক আটক কৰাৰ বাবে অভিযান চলাই থকা হৈছে যদিও এই পৰ্যন্ত আটক কৰিবলৈ সক্ষম হোৱা নাই বুলি গোলাঘাট আৰক্ষী থানাৰ ভাৰপ্ৰাপ্ত বিষয়া দীপক বৰাই জানিবলৈ দিয়ে।
