বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে শেহতীয়াকৈ চীন ভ্ৰমণ কৰিছিল। চাৰিদিনীয়া চীন ভ্ৰমণৰ সময়ত তেওঁ বেইজিঙত দেশখনৰ ৰাষ্ট্ৰপতি ছি জিনপিঙৰ সৈতে সাক্ষাৎ কৰে। শেহতীয়াকৈ এটা পোষ্টত দাবী কৰা হৈছে যে মহম্মদ ইউনুছে চীন ভ্ৰমণৰ সময়ত বেইজিঙক এটা আহ্বান জনাইছিল। সমগ্ৰ ঘটনাটো ভিডিঅ’ত বন্দী হোৱা বুলি জানিব পৰা গৈছে।
যিটো ভিডিঅ’ প্ৰকাশ পাইছে তাত মহম্মদ ইউনুছৰ বাৰ্তা আছিল যে ভাৰতৰ উত্তৰ-পূবৰ ‘ছেভেন ছিষ্টাৰ্ছ’ নামেৰে পৰিচিত সাতখন ৰাজ্য সকলো স্থলভাগেৰে আবদ্ধ, ফলস্বৰূপে বাংলাদেশ সেই অঞ্চলৰ জলভাগৰ ‘অভিভাৱক’! এই যুক্তিৰে বেইজিঙৰ প্ৰতি ঢাকাৰ আবেদন হৈছে যে চীনে বাংলাদেশত অৰ্থনৈতিক ভিত্তি স্থাপন কৰি নিজৰ অৰ্থনৈতিক কাৰ্যসূচীৰ পৰিসৰ বৃদ্ধি কৰিব লাগে।
ভাইৰেল হোৱা ভিডিঅ’টোত ইউনুছে কোৱা শুনা গৈছে যে, “পূব ভাৰতৰ সাতখন ৰাজ্য, যাক ছেভেন চিষ্টাৰ্ছ বুলি কোৱা হয়… সেইবোৰতো স্থলভাগেৰে আৱদ্ধ… সাগৰলৈ যোৱাৰ তেওঁলোকৰ কোনো পথ নাই।” তাৰ পিছত তেওঁ কয়, “সেই অঞ্চলত আমিয়েই একমাত্ৰ সাগৰৰ অভিভাৱক। ফলত ই বৃহৎ সম্ভাৱনাৰ সৃষ্টি কৰে। ইয়াৰ দ্বাৰা চীনৰ অৰ্থনীতিয়ে নিজৰ সীমা সম্প্ৰসাৰণ কৰিব পাৰে, কিবা এটা নিৰ্মাণ কৰিব পাৰে, কিবা এটা উৎপাদন কৰিব পাৰে, বজাৰ সৃষ্টি কৰিব পাৰে… চীনলৈ বস্তু আনিব পাৰে, চীনৰ পৰা সমগ্ৰ বিশ্বলৈ বস্তু পঠাব পাৰে…।”
উল্লেখ্য যে নৰেন্দ্ৰ মোডীৰ অৰ্থনৈতিক উপদেষ্টা সঞ্জীৱ সান্যালে এটা পোষ্টত ইউনুছৰ মন্তব্যৰ ভিডিঅ’ শ্বেয়াৰ কৰিছে। তাত সঞ্জীৱ সান্যালে লিখিছে, ” ইউনুছে চীনৰ ওচৰত ৰাজহুৱা আবেদন জনাইছে, ভাৰতৰ ৭খন ৰাজ্য স্থলভাগত আৱদ্ধ বুলি। বাংলাদেশত চীনৰ বিনিয়োগক আদৰণি জনোৱা হৈছে, কিন্তু ভাৰতৰ ৭খন ৰাজ্যৰ ভূ-পৃষ্ঠত আবদ্ধ হোৱাৰ তাৎপৰ্য সঠিকভাৱে কি?”
প্ৰসংগক্ৰমে মহম্মদ ইউনুছে বাংলাদেশৰ নদী ব্যৱস্থাপনাৰ বাবে চীনৰ পৰা ৫০ বছৰীয়া মাষ্টাৰ প্লেন বিচাৰিছে। মন কৰিবলগীয়া যে এই ক্ষেত্ৰত তিস্তাৰ বিষয়টো আহি পৰে। যাৰ পানী বাংলাদেশে ভাৰতৰ সৈতে ভাগ কৰি লয়। কোৱা বাহুল্য যে যদি সেইখিনিৰ পৰা চীনে বাংলাদেশৰ জলসম্পদত মূৰ সোমোৱাৰ কোনো ইংগিত পোৱা যায় তেন্তে সেয়া দিল্লীৰ বাবে অস্বস্তিৰ কাৰণ হ’ব পাৰে।
ইউনুছে দাবী কৰে যে চীন ‘জলসম্পদ ব্যৱস্থাপনাৰ মাষ্টাৰ’। ইপিনে ভাৰতৰ ৭খন ৰাজ্যক টানি আনি কৰা ইউনুছৰ বক্তব্যক লৈ বিভিন্ন জল্পনা-কল্পনাৰ সৃষ্টি হৈছে। প্ৰতিৰক্ষা বিশেষজ্ঞ ধ্ৰুৱ কাটোচে কয়, “এই আলোচনাত ভাৰতৰ নাম উল্লেখ কৰি তেওঁ ভাবুকি দিছে, তেওঁ বুজাব বিচাৰিছে নেকি যে বাংলাদেশে ভাৰতৰ উত্তৰ-পূবক বিছিন্ন কৰি পেলাব পাৰে?”
তেওঁ লগতে কয়, “ভাৰতক এই আলোচনাৰ মাজলৈ টানি নিয়াৰ ইউনুছৰ কোনো কাৰণেই নাছিল। সাগৰৰ সৈতে সংযোগ কেনেকৈ কৰা হয়, সেই সংযোগৰ বিষয়টো আমাৰ চৰকাৰৰ, আমি ইয়াক চম্ভালিছো।”
