১৫ ফেব্ৰুৱাৰিত ফিল্মফেয়াৰ এৱাৰ্ড অনুষ্ঠানলৈ যোৱা জুবিন গাৰ্গে মুখ্য মন্ত্ৰী সৰ্বানন্দ সোণোৱালৰ আলিংগন কৰা এখন ছবিক লৈ ছ’চিয়েল মিডিয়াত তুমুল চৰ্চা অব্যাহত থকাৰ মুহূৰ্ততে নিজৰ প্ৰতিক্ৰিয়া প্ৰকাশ কৰিছে জনপ্ৰিয় কন্ঠশিল্পীগৰাকীয়ে।
খাৰঘুলিস্থিত নিজৰ বাসগৃহত সংবাদ মাধ্যমৰ আগত জুবিনে ফটোখনক লৈ বিতৰ্ক হ’বলগীয়া একো নাই বুলি মন্তব্য কৰে। লগতে মুখ্য মন্ত্ৰী সৰ্বানন্দ সোণোৱালৰ লগত পুৰণি চিনাকি বাবেই ইয়াক সৌজন্যৰ প্ৰকাশ বুলি কয়।
“ফটো কোনোবাই তুলি দিছে সেইটো মই নাজানো। সৰ্বা দা মোৰ বহু পুৰণা চিনাকি। ভদ্ৰতাৰ খাতিৰত তেওঁক মাত এষাৰ দিবই লাগিব। সেই কাৰণে মাত এষাৰ দিলো। গোটেই প্ৰগেমত মই নাছিলো। মাত্ৰ এঘন্টা থাকি ওলাই আহিছিলো। এইটোক লৈ বিতৰ্ক হ’বলগীয়া কোনো কথা নাই।”
ইপিনে, ‘কা’ বিৰোধী প্ৰতিবাদ অৱ্যাহত থাকিব বুলি মন্তব্য কৰি তেওঁ লগতে কয় “আমি ‘কা’ বিৰোধী প্ৰতিবাদত এতিয়াও লাগি আছো, তেতিয়াও লাগি আছিলো। ফিল্ম ফেয়াৰত গ’লো বুলিয়েই মই আন্দোলনৰ পৰা আঁতৰি অহাটো নুবুজায়। বহুতে তেনেধৰণে খবৰ উলিয়াবলৈ চেষ্টা কৰিছে।”
তেওঁ আৰু কয় “কা বিৰোধী প্ৰতিবাদ সদায় অব্যাহত থাকিব। স্থিতি সলনি কেতিয়াও নকৰো। মই তেনেকুৱা মানুহেই নহয়। যিটো বস্তু বেয়া পাওঁ সেইটো মুকলিকৈ কওঁ আৰু যিটো ভাল পাওঁ সেইটোও মুকলিকৈ কওঁ।”
তদুপৰি, “ক্ৰীড়া, গীত, চিনেমা ইত্যাদি বন্ধ কৰি দিলে আমাৰ ক্ষতি হ’ব” বুলি মন্তব্য কৰি শিল্পীজনে লগতে কয় “বহু লোক তাত জড়িত আছে। বহুতেই তাৰ পৰা পেটৰ ভাতমুঠি মোকলাই আছে। আন্দোলনৰ সমান্তৰালকৈ খেল, মিউজিক সকলো চলি থাকিব।”