নাগৰিকত্ব সংশোধনী বিধেয়ক বাতিলৰ দাবীত ৰাজ্যত চলি থকা প্ৰতিবাদৰ সমান্তৰালভাৱে ৰাইজৰ লগত সহযোগ কৰি বিধেয়কখন বাতিল কৰিবলৈ বিজেপি চৰকাৰক বাৰে বাৰে অনুৰোধ জনাইছিল জনপ্ৰিয় শিল্পী জুবিন গাৰ্গে। কিন্তু জুবিনৰ অনুৰোধক কোনো ভ্ৰূক্ষেপেই নকৰিলে কেন্দ্ৰ আৰু ৰাজ্যৰ শাসনত থকা বিজেপিয়ে। সেয়ে শিল্পী সমাজক লৈ প্ৰতিবাদ কৰিব জুবিনে।
অহা ১৭ জানুৱাৰীত তেজপুৰৰ কলেজিয়েট খেলপথাৰত নাগৰিকত্ব সংশোধনী বিধেয়ক বাতিলৰ দাৱীত অনুষ্ঠিত হ’ব ‘সংকল্পৰ দিন’ অনুষ্ঠান।
ৰূপকোঁৱৰ জ্যোতিপ্ৰসাদ আগৰৱালাৰ জীৱনৰ অন্যতম কৰ্মস্থলী তেজপুৰত ‘শিল্পী দিৱসত শিল্পীৰ প্ৰতিবাদ’ সাব্যস্ত কৰাৰ বাবে জুবিন গাৰ্গৰ আহ্বানত কলাগুৰু আৰ্ট ফাউণ্ডেশ্যনে এই উদ্যোগ হাতত লৈছে।
উক্ত দিনা বিয়লি ৩-৩০ মিনিটৰ পৰা আৰম্ভ হ’বলগীয়া এই কাৰ্যসূচীৰ জৰিয়তে বিধেয়ক বাতিলৰ দাবীৰ লগতে ভিন্ন সম্প্ৰদায়ৰ মাজত সমন্বয় বৰ্তাই ৰখাৰো প্ৰচেষ্টা লোৱা বুলি শিল্পীগৰাকীয়ে চ’চিয়েল মিডিয়াৰ জৰিয়তে প্ৰকাশ কৰিছে।
এই অনুষ্ঠানত নৱপ্ৰজন্মৰ ভালেকেইগৰাকী শিল্পীৰ লগতে জুবিন গাৰ্গৰ বহুসংখ্যক অনুৰাগীয়ে অংশ ল’ব বুলি জানিব পৰা গৈছে।
উল্লেখযোগ্য যে জুবিন গাৰ্গে শেহতীয়াভাৱে নাগৰিকত্ব সংশোধনী বিধেয়ক বাতিলৰ দাবী জনাই মুখ্য মন্ত্ৰী সৰ্বানন্দ সোণোৱাললৈ এখন পত্ৰ প্ৰেৰণ কৰিছিল। লগতে তেওঁ ৭ দিনৰ ভিতৰত এই সন্দৰ্ভত ব্যৱস্থা গ্ৰহণৰো দাবী জনাইছিল।
কিন্তু এই ক্ষেত্ৰত মুখ্য মন্ত্ৰীৰ নীৰৱ ভূমিকাৰ পাছত জুবিন গাৰ্গে যোৱা ১৩ জানুৱাৰীত টুইটাৰযোগে এই সন্দৰ্ভত ক্ষোভ প্ৰকাশ কৰে। তেওঁ আনকি ২০১৬ চনৰ নিৰ্বাচনৰ সময়ত বিজেপিৰ প্ৰচাৰৰ বাবে গোৱা গানৰ বাবত লোৱা মাননিও ওভতাই দিব বুলি টুইটটোত ঘোষণা কৰে।
ইয়াৰ পূৰ্বেও জুবিন গাৰ্গে কেইবাটাও সাংস্কৃতিক অনুষ্ঠানৰ মঞ্চৰ পৰাই বিধেয়কখনৰ বিৰোধিতা কৰাৰ লগতে ইয়াৰ বিৰুদ্ধে ৰাইজক প্ৰতিবাদ কৰি যাবলৈ আহ্বান জনাইছিল।
