অসমবাসীৰ হিয়াৰ আমঠু হাৰ্টথ্ৰৱ জুবিন গাৰ্গৰ অন্তিম শয়নৰ লগ দিব তেওঁৰ নিজহাতে ৰোৱা চন্দন গছৰ সুবাসে। প্ৰকৃতিপ্ৰেমী জুবিনে নিজৰ জন্মদিন ২০১৭ চনৰ ১৮ নৱেম্বৰত শ্ৰীমন্ত শংকৰদেৱ কলাক্ষেত্ৰত ৰোপণ কৰিছিল নাহৰ আৰু চন্দনৰ গছ। জানিব পৰা মতে জুবিন গাৰ্গে নিজহাতে ৰোৱা সেই চন্দনৰ এটা ডাল কাটি আনি শিল্পীগৰাকীৰ অন্ত্যেষ্টিক্ৰিয়াত ব্যৱহাৰ কৰাৰ বাবে সাজু কৰা হৈছে।
প্ৰকাশিত খবৰ অনুসৰি মঙলবাৰে সোণাপুৰত সম্পন্ন হ‘ব জুবিন গাৰ্গৰ অন্ত্যেষ্টিক্ৰিয়া। ইতিমধ্যে সাজু কৰি তোলা হৈছে সমাধিক্ষেত্ৰ। চন্দনৰ এই ডালটো শিল্পীগৰাকীৰ পত্নী গৰিমা শইকীয়া গাৰ্গ, মুখ্যমন্ত্ৰী হিমন্ত বিশ্ব শৰ্মা, কলাক্ষেত্ৰ সমাজ আৰু বৃক্ষমানৱ বকুল গগৈৰ উপস্থিতিত আগবঢ়োৱা হ‘ব।
কলাক্ষেত্ৰৰ সচিব সুদৰ্শন ঠাকুৰে এই প্রসঙত কয়, “অসম আৰু অসমীয়াৰ গৌৰৱ জুবিন গাৰ্গৰ প্ৰকৃতিপ্ৰেম সকলোৱে জানে। আমি ভাগ্যবান যে ২০১৭ চনত তেওঁ নিজহাতে কলাক্ষেত্ৰত নাহৰ আৰু চন্দনৰ গছ ৰোপণ কৰিছিল। সেই চন্দনৰ এটা ডাল অন্ত্যেষ্টিক্ৰিয়াত আগবঢ়াব পাৰি বুলি আমি আশা কৰিছোঁ।”
বৃক্ষমানৱ বকুল গগৈয়ে উল্লেখ কৰে যে, “সাধাৰণতে মই গছ নাকাটোঁ, কিন্তু জুবিনদাৰ প্ৰতি মৰম আৰু সন্মানৰ বাবেই এইবাৰ এই সিদ্ধান্ত ল‘বলৈ বাধ্য হৈছোঁ। ২০১৭ চনত তেওঁ মোৰ অনুৰোধত নাহৰ, চন্দন আৰু বহু গছ ৰোপণ কৰিছিল। সেই নাহৰক আমি ‘জুবিন বৃক্ষ’ হিচাপে সন্মান দিবলৈ পৰিকল্পনা কৰিছিলোঁ।”
তেওঁ লগতে কয় যে, সোণাপুৰত জুবিনৰ সমাধিক্ষেত্ৰৰ চাৰিওফালে নাহৰ গছ ৰোপণ কৰা হ‘ব, যাতে প্ৰিয় শিল্পীগৰাকীৰ স্মৃতি প্ৰকৃতিৰ মাজতেই অনন্তকাললৈ সজীৱ হৈ থাকে ।
