অসমৰ সাংস্কৃতিক জগতৰ প্ৰাণস্পন্দন জুবিন গাৰ্গৰ মৃত্যুত শোকত ডুবিছে সমগ্ৰ ৰাজ্য। তাৰ মাজতে ভৱিষ্যতে অকৰ্তৃত্বশীল ব্যৱহাৰ বা বিকৃতকৰণ ৰোধ কৰিবলৈ শিল্পী গৰাকীৰ কণ্ঠক ডিজিটেলভাবে সংৰক্ষণৰ কাম আৰম্ভ কৰিছে তেওঁৰ ঘনিষ্ঠ ব্যক্তিয়ে।
জুবিন গাৰ্গৰ দীৰ্ঘদিনীয়া সহযোগী গায়ক-সুৰকাৰ মানস ৰবীনে কয় যে এনেধৰণৰ ডিজিটেল সংৰক্ষণে তেওঁৰ কণ্ঠক এআই-সক্ষম বা অন্যান্য প্ৰযুক্তিৰ জৰিয়তে বিকৃতকৰণ বা অপব্যৱহাৰ নকৰাটো নিশ্চিত কৰিব।
সোমবাৰে জুবিনক শ্ৰদ্ধাঞ্জলি জনোৱাৰ বাবে উপস্থিত হোৱা সৰুসজাই ষ্টেডিয়ামত মানস ৰবীনে কয় যে, ‘প্ৰযুক্তিবিদ্যাই ব্যাপক অগ্ৰগতি লাভ কৰাৰ লগে লগে ইণ্টাৰনেটৰ পৰা লোৱা জুবিনৰ কণ্ঠৰ নমুনা ভৱিষ্যতে আন গায়ক, পৰিবেশকে নিজৰ হিচাপে ব্যৱহাৰ কৰিব পৰাটো অতি সম্ভৱ।
তেওঁ কয় যে আমি জুবিনৰ কণ্ঠক ডিজিটেলভাৱে সংৰক্ষণ কৰি এনে এক ‘ডিজিটেল চিগনেচাৰ’ সৃষ্টি কৰাৰ কাম কৰিম যে তেওঁৰ কণ্ঠ বজোৱাৰ মুহূৰ্ততে ইয়াৰ উৎস ধৰা পেলাব পৰা যাব।
ইয়াৰ আঁৰৰ ধাৰণাটো ব্যাখ্যা কৰি তেওঁ কয়, “যদি কোনো ব্যক্তিৰ মুখখন ডিজিটেলভাৱে আন এজন ব্যক্তিৰ শৰীৰত ছুপাৰ-ইম্পোজ কৰা হয়, তেন্তে ইয়াক ধৰা পেলাব পাৰি। একেদৰে এনে ব্যৱস্থা বিকশিত হৈছে য’ত এটা কণ্ঠৰ মূল ব্যক্তি বা গায়কৰ ডিজিটেলভাৱে সংৰক্ষিত সংস্কৰণৰ পৰা মুল কণ্ঠ ধৰিব পৰা যায়।”
মানস ৰবীনে কয় যে গাৰ্গৰ গীতসমূহ ইতিমধ্যে আৰ্কাইভ কৰা হৈছে, মৃত্যুৰ কিছুদিন পূৰ্বে গায়কগৰাকীয়ে নিজেই এনে এটা আৰ্কাইভ উদ্বোধন কৰিছে। তেওঁ কয়, “জুবিনৰ কামৰ ডিজিটেল সংৰক্ষণৰ কাম ইতিমধ্যে তেওঁৰ ইউটিউব চেনেল আৰু অন্যান্য ইণ্টাৰনেট প্লেটফৰ্মৰ জৰিয়তে চলি আছে। আমিও তেওঁৰ কণ্ঠত ‘ডিজিটেল চিগনেচাৰ’ লগাব বিচাৰো যাতে আজিৰ এআই-জেনেৰেটেড অডিঅ’ আৰু ভিডিঅ’ৰ জগতখনত কোনেও নিজৰ বুলি চলাব নোৱাৰে।” ইয়াৰ দ্বাৰা জুবিনৰ কণ্ঠ যাতে কোনো ধৰণৰ বিকৃত কৰিব নোৱাৰে সেয়াও নিশ্চিত হ’ব বুলি তেওঁ লগতে কয়।
