কিংবদন্তি সংগীত শিল্পী জুবিন গাৰ্গৰ পত্নী গৰিমা শইকীয়া গাৰ্গে স্বামীৰ মৃত্যুক কেন্দ্ৰ কৰি চি আই ডিত এজাহাৰ দাখিল কৰিছে। এজাহাৰত ঘটনাৰ সময়ত ছিংগাপুৰত উপস্থিত থকা বিশেষভাৱে শ্যামকানু মহন্ত আৰু মেনেজাৰ সিদ্ধাৰ্থ শৰ্মাকে ধৰি সকলোৰে নাম উল্লেখ কৰিছে।
গৰিমাই তেওঁৰ ননদ পামী বৰঠাকুৰ আৰু পৰিয়ালৰ এজন খুড়াকৰ সৈতে ইমেইলযোগে অনলাইন এজাহাৰ দাখিল কৰিছে।
অভিযোগ অনুসৰি ছিংগাপুৰ ভ্ৰমণৰ অংশ হিচাপে থকা সকলো ব্যক্তিকে সামৰি জুবিন গাৰ্গৰ মৃত্যুৰ পৰিস্থিতিৰ সম্পূৰ্ণ তদন্ত বিচাৰিছে।
কৰ্তৃপক্ষই অভিযোগ লাভ কৰাটো নিশ্চিত কৰিছে, আৰু এজাহাৰ দাখিল কৰাৰ পিছত চিআইডিয়ে তদন্ত আৰম্ভ কৰাৰ সম্ভাৱনা আছে। পৰিয়ালৰ ফালৰ পৰা দাখিল কৰা এই অভিযোগৰ ফলত এই মৰ্মান্তিক ঘটনাক কেন্দ্ৰ কৰি আইনী আৰু ৰাজহুৱা নিৰীক্ষণ আৰু অধিক গভীৰ হৈ পৰিছে।
মুখ্যমন্ত্ৰী হিমন্ত বিশ্ব শৰ্মাই শনিবাৰে কয় যে ছিংগাপুৰত কণ্ঠশিল্পী জুবিন গাৰ্গৰ ৰহস্যজনক মৃত্যুৰ তদন্ত দ্ৰুত গতিত আগবাঢ়িছে।
সংবাদ মাধ্যমক সম্বোধন কৰি মুখ্যমন্ত্রীয়ে নিশ্চিত কৰে যে এই গোচৰৰ সন্দর্ভত সিদ্ধার্থ শর্মা আৰু শ্যামকানু মহন্তৰ বিৰুদ্ধে লুক আউট নোটিচ জাৰি কৰা হৈছে৷
তেওঁ লগতে প্ৰকাশ কৰে যে ছিংগাপুৰত থকা ৮ জন প্ৰবাসী ভাৰতীয় (এন আৰ আই)ক বিষয়টোৰ সৈতে জড়িত বুলি জানিব পৰা গৈছে আৰু তেওঁলোকক চি আই ডিৰ কাৰ্যালয়ত সোধা-পোছাৰ বাবে হাজিৰ হ’বলৈ নিৰ্দেশ দিয়া হৈছে।
ইতিমধ্যে ৰাজ্য চৰকাৰে শ্যামকানু মহন্ত আৰু তেওঁৰ সৈতে জড়িত সংগঠনসমূহে অসমত কোনো ধৰণৰ সাংস্কৃতিক বা ৰাজহুৱা অনুষ্ঠান অনুষ্ঠিত কৰাত নিষেধাজ্ঞা আৰোপ কৰিছে।
