ড০ ভীমৰাও আম্বেদকাৰৰ চিন্তাধাৰা, গণতান্ত্ৰিক ব্যৱস্থালৈ আগবঢ়োৱা অনবদ্য অৱদান আৰু আদৰ্শৰ বিষয়ে ৰাজ্যখনৰ নৱ প্ৰজন্মই ভালদৰে জ্ঞাত হোৱাৰ প্ৰতি লক্ষ্য ৰাখি ৰাজ্য চৰকাৰে গুৱাহাটীত তেওঁৰ নামত এখন ৰাষ্ট্ৰীয় প্ৰতিষ্ঠান স্থাপন কৰিব বুলি মুখ্য মন্ত্ৰী সৰ্বানন্দ সোণোৱালে ঘোষণা কৰে।
১২৭ সংখ্যক জন্মজয়ন্তী উপলক্ষে জনতা ভৱনত আয়োজিত এক অনুষ্ঠানত মুখ্য মন্ত্ৰী সোণোৱালে কয় যে দেশৰ আগশাৰীৰ শিক্ষানুষ্ঠানত নামভৰ্তী কৰাত ব্যৰ্থ হোৱা তথা বিভিন্ন সৰ্বভাৰতীয় প্ৰতিযোগিতামূলক পৰীক্ষাত অৱতীৰ্ণ হোৱাৰ বাবে ৰাজ্য চৰকাৰে বিশেষ প্ৰশিক্ষণৰ ব্যৱস্থা কৰাৰ লগতে জলপানিও প্ৰদান কৰিব।
ভাৰতীয় সংবিধানৰ জনক ড০ ভীমৰাও আম্বেদকাৰৰ প্ৰতি গভীৰ শ্ৰদ্ধাঞ্জলী জ্ঞাপন কৰি সোণোৱালে কয় যে ভাৰতীয় গণতন্ত্ৰৰ জয়যাত্ৰা অব্যাহত ৰখাৰ ক্ষেত্ৰত আম্বেদকাৰৰ অৰিহনা যথেষ্ট উল্লেখণীয়।
ইয়াৰ উপৰি ৰাজ্যখনৰ সৰু-বৰ সকলো জাতি জনগোষ্ঠীৰ মাজত থকা সমন্বয়ৰ ধাৰা অটুট ৰখাৰ বাবে নৱ প্ৰজন্মক এই গৰাকী মহান ব্যক্তিৰ বিষয়ে গভীৰভাবে অধ্যয়ন কৰা উচিত বুলি মুখ্য মন্ত্ৰী সোণোৱালে উল্লেখ কৰে।
আনহাতে উক্ত অনুষ্ঠানতে ভৈয়াম জনজাতি আৰু পিছপৰা শ্ৰেণী কল্যাণ বিভাগৰ মন্ত্ৰী প্ৰমীলা ৰাণী ব্ৰহ্মই ৰাজ্য চৰকাৰে অনুসূচিত জাতি, অনুসূচিত জনজাতি, অন্যান্য পিছপৰা শ্ৰেণীৰ কল্যাণৰ বাবে গ্ৰহণ কৰা বিভিন্ন আঁচনি সমূহৰ বিষয়ে ৰাইজৰ আগত অৱগত কৰে।
এই অনুষ্ঠানতে মুখ্য মন্ত্ৰীয়ে অসবৰ্ণ বিবাহ বিত্তীয় উদগণি আঁচনিৰ অধীনত কিছু সংখ্যক নৱ দম্পতীলৈ ৫০ হেজাৰ টকাৰ চেক প্ৰদান কৰে।
অনুষ্ঠানত সমাজ কল্যাণ বিভাগৰ ৰাজ্যিক মন্ত্ৰী নৱ কুমাৰ দলে, সাংসদ আৰ পি শৰ্মা, অসম বিধানসভাৰ প্ৰাক্তন অধ্যক্ষ তথা হাইছ ফেডৰ অধ্যক্ষ ৰঞ্জিত দাস, অনুসূচিত জাতি উন্নয়ন পৰিষদৰ সঞ্চালিকা লীনা দাস, সদৌ অসম অনুসূচিত জাতি ছাত্ৰ সন্থাৰ সভাপতি প্ৰবীন বৈশ্যৰ লগতে বহুতো বিশিষ্ট লোক উপস্থিত থাকে।
