ত্ৰিপুৰা কংগ্ৰেছে ঘোষণা কৰিছে যে অহা ১৮ ফেব্ৰুৱাৰীত অনুষ্ঠিত হ’বলগীয়া বিধানসভাৰ নিৰ্বাচনত ৰাজ্যখনৰ গোটেই ৬০ খন আসনতে প্ৰাৰ্থিত্ব আগবঢ়াব। মাৰ্চত চৰকাৰ গঠন কৰিব বুলিও ত্ৰিপুৰা কংগ্ৰেছ আশাবাদী।
নিৰ্বাচন আয়োগে অলপতে ত্ৰিপুৰা, মেঘালয় আৰু নাগালেণ্ডৰ বিধানসভাৰ নিৰ্বাচনৰ দিন ঘোষণা কৰাৰ পিছতে ত্ৰিপুৰা প্ৰদেশ কংগ্ৰেছৰ সভাপতি বিৰাজিত সিনহাই ত্ৰিপুৰাৰ খোৱাই জিলাৰ তেলিয়ামুৰাত এখন নিৰ্বাচনী সমাৱেশ অনুষ্ঠিত কৰে য’ত কেন্দ্ৰত শাসনত থকা বিজেপি আৰু ৰাজ্যৰ শাসনাধীস্থ বাওমৰ্চা চৰকাৰক তীব্ৰ সমালোচনা কৰে।
তেলিয়ামুৰা ত্ৰিপুৰাৰ ৰাজধানী আগৰতলাৰ পৰা ৪৫ কিলোমিটাৰ আঁতৰত অৱস্থিত।
কংগ্ৰেছ নেতা সুশান্ত চক্ৰৱৰ্তী, হৰেকৃষ্ণ ভৌমিকৰ লগতে অন্যান্য নেতাসকল নিৰ্বাচনী সমাৱেশত উপস্থিত থাকে।
ভাষণ প্ৰসংগত সিনহাই বিজেপি নেতৃত্বাধীন কেন্দ্ৰৰ এনডিএ চৰকাৰক তীব্ৰ আক্ৰমণ কৰি কয় যে কেন্দ্ৰৰ শাসনাধিষ্ঠ বিজেপি চৰকাৰখনে ধাৰাবাহিকভাৱে ত্ৰিপুৰাৰ জনসাধাৰণক বঞ্চিত কৰি আহিছে। একেদৰে তেওঁ ৰাজ্যৰ বাওঁমৰ্চা চৰকাৰখনকো কঠোৰ ভাষাৰে সমালোচনা কৰে।
উল্লেখযোগ্য যে নিৰ্বাচনৰ দিন ঘোষণা কৰাৰ পিছতে ত্ৰিপুৰাৰ ৰাজনৈতিক দলবোৰে ভোটাৰক আকৰ্ষণ কৰাৰ বাবে ৰাজ্যখনৰ বিভিন্ন স্থানত নিৰ্বাচনী সভাৰ আয়োজন কৰিছে।
ৰাজনৈতিক পৰ্যবেক্ষকসকলৰ মতে গেৰুৱা দলটোৱে উত্তৰ পূৰ্বাঞ্চলৰ তিনিওখন ৰাজ্যতে বিজয়ৰ বাবে প্ৰচেষ্টা অব্যাহত ৰাখিছে। আনহাতে, কংগ্ৰেছ দলে মেঘালয়ত ক্ষমতা ধৰি ৰখাৰ চেষ্টা কৰাৰ বিপৰীতে চিপিআই (এম) এ দীৰ্ঘদিন ধৰি শাসনত থকা ত্ৰিপুৰাত নিজৰ আধিপত্য বৰ্তাই ৰখাৰ চেষ্টা কৰিব।
