শাসনাধিষ্ঠিত এন পি পি আৰু বিৰোধী কংগ্ৰেছে কেইবা ঠাইতো সৰ্বশক্তিৰে চলোৱা প্ৰচাৰৰ মাজেৰে আজি মেঘালয়ৰ আমপাতি সমষ্টিৰ উপ নিৰ্বাচনৰ অন্ত পৰিছে। উপ নিৰ্বাচনটোৰ বাবে চলা বিগত দিনবোৰৰ প্ৰচাৰ অভিযানত ৰাজ্যৰ দুয়োটা প্ৰধান দলেই তীব্ৰ বাক-যুদ্ধ আৰু অভিযোগ-প্ৰতিঅভিযোগত লিপ্ত হোৱা দেখা গ’ল। আনহাতে দুয়োটা দলৰ বিৰুদ্ধেই উঠিছে ভোটাৰক প্ৰলোভিত কৰাৰ বাবে টকাৰ ব্যৱহাৰ কৰাৰ।
অৱশ্য ৰাজ্যখন মুখ্য নিৰ্বাচনী বিষয়া এফ আৰ খাৰকংগৰে কোনো অপ্ৰীতিকৰ ঘটনাৰ অবিহনেই নিৰ্বাচনী প্ৰচাৰৰ অন্ত পৰা বুলি সংবাদ মাধ্যমক জানিবলৈ দিছে।
উল্লেখযোগ্য যে দুটা সমষ্টিৰ পৰা প্ৰতিদ্বন্দ্বিতা কৰা প্ৰাক্তন মুখ্য মন্ত্ৰী তথা কংগ্ৰেছী নেতা মুকুল চাংমাই আমপাতি সমষ্টিটো এৰি দিয়াত ইয়াৰ বাবে উপ নিৰ্বাচন পাতিব লগীয়া হৈছে। অহা ২৮ মে’ত সমষ্টিটোৰ নিৰ্বাচন অনুষ্ঠিত হ’ব। মুঠ তিনিজন প্ৰাৰ্থীয়ে ইয়াত প্ৰতিদ্বন্দ্বিতা কৰিছে। তেওঁলোক ক্ৰমে শাসনাধিষ্ঠিত মৰ্চাৰ বৃহত্তম দল এন পি পি ৰ ক্লেমেণ্ট জি মমিন, কংগ্ৰেছ দলৰ মিয়ানি ডি শ্বিৰা আৰু নিৰ্দলীয় প্ৰাৰ্থী শুভাংকৰ কোচ।
মিয়ানি ডি শ্বিৰা হ’ল প্ৰাক্তন মুখ্য মন্ত্ৰী তথা বিৰোধী দলৰ নেতা মুকুল চাংমাৰ জীয়েক।
নিৰ্বাচনী প্ৰচাৰৰ সময়ত মুখ্য মন্ত্ৰী কনৰাড চাংমা আৰু কংগ্ৰেছৰ প্ৰাক্তন মুখ্য মন্ত্ৰী মুকুল চাংমাক নিজৰ দলৰ প্ৰাৰ্থীৰ হৈ চলোৱা প্ৰচাৰত সৰ্বশক্তি প্ৰয়োগ কৰা দেখা গ’ল। দুয়োটা দলৰ আন আন বিধায়ক তথা নেতাসকলেও এই নিৰ্বাচনী প্ৰচাৰত অংশ গ্ৰহণ কৰিছিল।
আনহাতে মেঘালয়ত বিধায়কৰ সংখ্যাৰ কথাটোৱে এতিয়াও গুৰুত্বপূৰ্ণ অৱস্থান লৈ থকালৈ চাই এই উপ-নিৰ্বাচন দুয়োটা দলৰ বাবেই ডাঙৰ অংক হোৱাৰ লগতে সন্মানৰ প্ৰশ্নও হৈ পৰিছে। মন কৰিব লগীয়া যে এই সমষ্টিটো যোৱা প্ৰায় ২৫ বছৰ ধৰি কংগ্ৰেছৰ দখলত আছে।
