ৰাজ্যখনত বসবাস কৰি থকা প্ৰায় ৭ লাখ হিন্দীভাষী লোকৰ নাম এন আৰ চিৰ চূড়ান্ত খচৰাৰ পৰা বাদ পৰিছে। এন আৰ চিৰ পৰা তেওঁলোকৰ নাম বাদ পৰাৰ এটা অন্যতম কাৰণ হিচাপে চিহ্নিত হৈছে এই লোকসকলৰ উপাধি তথা ভাষা বিভ্ৰাট। সংবাদ মাধ্যমক এই কথা জানিবলৈ দিছে সদৌ অসম ভোজপুৰী পৰিষদৰ সভাপতি কৈলাস গুপ্তাই।
উল্লেখযোগ্য যে ভোজপুৰী পৰিষদৰ এটা প্ৰতিনিধি দলে সোমবাৰে এন আৰ চিৰ ৰাজ্যিক সমন্বয়ক প্ৰতীক হাজেলাক সাক্ষাৎ কৰে। ভোজপুৰী পৰিষদে অসমত বসবাস কৰি থকা প্ৰকৃত ভাৰতীয়সকলৰ নাম অন্তৰ্ভুক্তিৰে তথা বিদেশীৰ নাম মুক্ত এখন শুদ্ধ এন আৰ চি প্ৰস্তুত হোৱাটো বিচাৰিছে বুলি গুপ্তাই জানিবলৈ দিয়ে।
গুপ্তাই জানিবলৈ দিয়া মতে বিহাৰ, উত্তৰ প্ৰদেশৰ পৰা আহি অসমত নিগাজীকৈ থাকিবলৈ লোৱা প্ৰায় ৭ লাখ লোকৰ নাম এন আৰ চিৰ খচৰাত অন্তৰ্ভুক্ত হোৱা নাই। তেওঁলোকে হিন্দী আৰু উৰ্দু ভাষাত ব্যৱহাৰ হোৱা নথি জমা দিয়াৰ বাবে এনে বিংসগতি হোৱাৰ অনুমান কৰা হৈছে।
এন আৰ চিৰ আবেদনৰ লগত হিন্দী আৰু উৰ্দুত লিখা নথি জমা দিয়াৰ পিছত সেইবোৰৰ নথি পৰীক্ষণৰ বাবে বিহাৰ, উত্তৰ প্ৰদেশ আদিলৈ পঠিওৱাৰ পিছত তাৰ উত্তৰসমূহো হিন্দী বা উৰ্দু ভাষাত আহিছে। কিন্তু ৰাজ্যখনত এন আৰ চি কেন্দ্ৰসমূহত কৰ্মৰত বেছিভাগ কৰ্মচাৰীয়ে হিন্দী বা উৰ্দু ভাষা নাজানে। ইয়াৰ বাবেই তেওঁলোকৰ নথিসমূহৰ বিপৰীতে তেওঁলোকৰ নাম অন্তৰ্ভুক্ত নহ’ল বুলি গুপ্তাই জানিবলৈ দিয়ে।
তদুপৰি, উপাধিৰ বিসংগতিৰ বাবেও বহু লোকৰ নাম এন আৰ চিৰ খচৰাৰ পৰা বাদ পৰিছে বুলি জানিবলৈ দিয়ে গুপ্তাই। আনহাতে, ভোজপুৰী বিবাহিত মহিলাসকলে বিয়াৰ পিছত তেওঁলোকৰ উপাধি সলনি কৰি দেবী উপাধি লিখে বুলি জানিব দি স্বামী-স্ত্ৰীৰ এনে বেলেগ উপাধি দেখিও বহু মহিলাৰ নাম খচৰাত অন্তৰ্ভুক্ত কৰা নহ’ল বুলি গুপ্তাই সদৰী কৰে।
সোমবাৰে হাজেলাক সাক্ষাৎ কৰি পৰিষদে এইসমূহ কথা ব্যক্ত কৰাৰ লগতে সেৱা কেন্দ্ৰসমূহত হিন্দী আৰু উৰ্দু ভাষা জনা কৰ্মচাৰী নিয়োগ কৰিবলৈ আহ্বান জনায়। হাজেলাই তেওঁলোকক এই বিষয়ত উপযুক্ত ব্যৱস্থা গ্ৰহণৰ প্ৰতিশ্ৰুতি দিয়ে। আনহাতে এই বিষয়সমূহ লৈ পৰিষদৰ প্ৰতিনিধি দলটোৱে মুখ্যমন্ত্ৰী সৰ্বানন্দ সোণোৱালকো সাক্ষাৎ কৰিব বুলি জানিব দিয়ে।
