দেশৰ উচ্চতম ন্যায়ালয়ৰ সময়সীমা অনুসৰি ৰাষ্ট্ৰীয় নাগৰিকপঞ্জীৰ চূড়ান্ত খচৰা ৩০ জুলাইত প্ৰকাশৰ পোৱাৰ পিছতে অহা ৩১ ডিচেম্বৰত চূড়ান্ত এন আৰ চি প্ৰকাশ কৰা হ’ব বুলি কেন্দ্ৰীয় চৰকাৰে ঘোষণা কৰিছে।
যোৱা ৩১ ডিচেম্বৰত প্ৰথমখন আংশিক খচৰা প্ৰকাশৰ পাছত সোমবাৰে চূড়ান্ত খচৰা প্ৰকাশ পোৱাৰ পিছত পৰৱৰ্তী সময়ত দুমাহৰ ভিতৰত যাৱতীয় ওজৰ-আপত্তি এন আৰ চি কৰ্তৃপক্ষই দূৰ কৰি এন আৰ চি প্ৰক্ৰিয়া সম্পূৰ্ণ কৰি তুলিব। এই প্ৰক্ৰিয়াৰ সমাপ্ত কৰি অহা ৩১ ডিচেম্বৰত চূড়ান্ত এন আৰ চি প্ৰকাশ কৰা হ’ব বুলি সোমবাৰে ভাৰতৰ মহাপঞ্জীয়কৰ কাৰ্যালয়ৰ হৈ কেন্দ্ৰীয় গৃহ মন্ত্ৰালয়ে জাননী জাৰি কৰিছে।
দেশৰ মহাপঞ্জীয়ক শ্ৰীশৈলেশে সোমবাৰে এক অধিসূচনাযোগে কয় যে ভাৰত চৰকাৰে অহা ৩১ ডিচেম্বৰৰ ভিতৰত চূড়ান্ত এন আৰ চি প্ৰকাশ কৰাটো বিচাৰিছে। নিৰ্দিষ্ট সময়ৰ ভিতৰত সম্পূৰ্ণ ৰাষ্ট্ৰীয় নাগৰিকপঞ্জীখন প্ৰকাশ কৰাটো অসমৰ ৰাইজে বিচাৰিছে। সেয়েহে সোমবাৰে চূড়ান্ত খচৰা প্ৰকাশৰ পিছত পূৰ্ণাংগ এন আৰ চি প্ৰকাশৰ ক্ষেত্ৰত কেন্দ্ৰীয় চৰকাৰে আৰু বিলম্ব কৰিব বিচৰা নাই।
উল্লেখযোগ্য যে সোমবাৰে প্ৰকাশ পোৱা চূড়ান্ত খচৰাত মুঠ আবেদনকাৰী ৩.২৯ কোটিৰ ভিতৰত ২.৮৯ কোটি লোকৰ নাম অন্তৰ্ভুক্ত হৈছে। আবেদনকাৰীৰ মাজত এন আৰ চিত অন্তৰ্ভুক্তিৰ বাবে প্ৰায় ৪০ লাখ লোক যোগ্য বিবেচিত নহ’ল।
আনহাতে, বাদ পৰি যোৱা লোকসকলক এন আৰ চিত নিজৰ নাম অন্তৰ্ভুক্তিৰ বাবে পুনৰ এক সুযোগ দিয়াৰ বাবে প্ৰায় দুমাহজোৰা ওজৰ-আপত্তি গ্ৰহণৰ প্ৰক্ৰিয়া এন আৰ চি কৰ্তৃপক্ষই আৰম্ভ কৰিব। এই সকলো প্ৰক্ৰিয়া সুচাৰুৰূপে সমাপ্ত কৰি অহা ৩১ ডিচেম্বৰত কেন্দ্ৰীয় গৃহ মন্ত্ৰালয়ে পূৰ্ণাংগ এন আৰ চি প্ৰকাশ কৰাৰ লক্ষ্য নিৰ্দ্ধাৰণ কৰিছে।গৃহ মন্ত্ৰালয়ৰ এই সিদ্ধান্তৰ লগতে দেশৰ মহাপঞ্জীয়কেও চলিত বৰ্ষৰ ৩১ ডিচেম্বৰত চূড়ান্ত এন আৰ চি প্ৰকাশ কৰা হ’ব ঘোষণা কৰিছে।
