কালি, অৰ্থাৎ ১ জুনত অনুষ্ঠিত চৰকাৰৰ কেবিনেট বৈঠকত অগপ দলটোৰ মন্ত্ৰীকেইজনে নাগৰিকত্ব বিধেয়ক বিষয়টোত কি ক’লে?
এইটো আছিল সাম্প্ৰতিক ৰাজনৈতিক পৰিস্থিতিৰ প্ৰতি চকু ৰখা সকলোৰে এটা প্ৰধান উৎসুকতা। এইটো জানিবলৈ লগে লগে সুবিধা নোপোৱাসকলে আজিৰ সংখ্যাৰ কাকত চাই জানিবৰ চেষ্টা কৰিছিল।
কিন্তু কথাটো হ’ল ভিন্ন কাকতত সম্পূৰ্ণ বিপৰীত তথ্যৰে আজি বাতৰিটো পৰিৱেশন কৰিলে অসমৰ ছপা সংবাদ মাধ্যমে, যাৰ ফলত সৰ্বসাধাৰণক বিভ্ৰান্তিত পৰা দেখা গৈছে। এই কথাটো আজি ছ’চিয়েল মিডিয়াত দিনটোৰ অন্যতম চৰ্চিত বিষয় হোৱা দেখা গ’ল।
উল্লেখযোগ্য যে এই প্ৰসংগটো আজিৰ সংখ্যাৰ কাকতবোৰৰ প্ৰথম পৃষ্ঠাৰ মুখ্য বাতৰি আছিল। কিন্তু কিছু সংখ্যক কাকতে অগপৰ মন্ত্ৰীকেইজনে বৈঠকত কথাটো উত্থাপনেই নকৰিলে বুলি সংবাদ ছপা কৰাৰ বিপৰীতে আন সীমিত সংখ্যক কাকতে অগপৰ মন্ত্ৰীকেইজনে কেবিনেট বৈঠকত নাগৰিকত্ব সংশোধনী বিধেয়কক লৈ পৰিস্থিতি উত্তপ্ত কৰি তোলে বুলি বাতৰি পৰিৱেশন কৰা দেখা গৈছে। আনকি ইয়াৰ ফলত আধা ঘণ্টা ধৰি কেবিনেট বৈঠক স্তব্ধ হৈ পৰে বুলি কয়।
মন কৰিব লগীয়া যে কাকতবোৰৰ মাজত ইমান বৈপৰীত্য কেনেকৈ হ’ব পাৰে বুলি বহুতে প্ৰশ্ন উত্থাপন কৰিছে ছ’চিয়েল মিডিয়াত। বাতৰি পৰিৱেশনৰ ধৰণ কিছু বেলেগ হ’ব পাৰে, কিন্তু একেটা বাতৰি কেনেকৈ ইমান বিপৰীত তথ্যৰ হ’ব পাৰে আৰু তেনে হ’লে পাঠকে সত্য খবৰৰ বাবে কাক আস্থাত ল’ব ধৰণৰ প্ৰশ্ন উত্থাপন হৈছে।
উল্লেখযোগ্য যে কালিৰ কেবিনেট বৈঠকখন সন্দৰ্ভত নৰ্থ-ইষ্ট নাও-য়েও বাতৰি পৰিৱেশন কৰিছিল। নৰ্থ-ইষ্ট নাও-এ সঠিক খবৰ সংগ্ৰহ কৰি কালিয়েই পাঠকক জনাইছিল যে অগপৰ মন্ত্ৰীকেইজনে কেবিনেট বৈঠকত নাগৰিকত্ব বিধেয়ক সন্দৰ্ভত টু শব্দ এটাও কৰা নাছিল।
কাৰণ কেবিনেট বৈঠকৰ পূৰ্বেই মুখ্য মন্ত্ৰী সৰ্বানন্দ সোণোৱালে অগপৰ মন্ত্ৰীকেইজনৰ সৈতে এখন সৰু বৈঠকত মিলিত হৈ বিষয়টো কেবিনেট বৈঠকত উত্থাপন নকৰিবলৈ তিনিওজনকে সন্মত কৰায়।
কেবিনেট বৈঠকৰ পৰিৱৰ্তে সমন্বয়ৰক্ষী সমিতিৰ বৈঠকত নাগৰিকত্ব বিধেয়কৰ বিষয়টো উত্থাপন কৰিবলৈ তেওঁলোকক মুখ্য মন্ত্ৰীজনে অনুৰোধ কৰে আৰু সেইটো তেওঁলোকে মানি লয়। পিছত সংবাদ মাধ্যমৰ আগতো এই কথা দলটোৰ সভাপতি অতুল বৰাই স্বীকাৰ কৰে। লগতে বিজেপিৰ উদ্যোগ মন্ত্ৰী চন্দ্ৰমোহন পাটোৱাৰীয়ে সংবাদ মাধ্যমক দিয়া ভাষ্যৰ পৰাও এই কথা স্পষ্ট হয়।
আমালৈ শেহতীয়াকৈ অহা গোপন সূত্ৰৰ খবৰ মতে, কালি কেবিনেট বৈঠকত বিষয়টো উত্থাপন কৰাৰ আঁচনি থকা সত্ত্বেও উত্থাপন কৰিব নোৱৰাত ৰাইজৰ তথা বিভিন্ন দল-সংগঠনৰ তীব্ৰ ক্ষোভ আৰু সমালোচনাৰ সন্মুখীন হৈছিল অগপ নেতৃত্ব। ফলত নেতৃত্বই বহুকেইটা সংবাদগোষ্ঠীৰ ঊৰ্ধ্বতন মহললৈ বাতৰিটো বেলেগকৈ পৰিৱেশন কৰিবলৈ ‘ব্যক্তিগতভাৱে’ যোগাযোগ কৰি অনুৰোধ জনাইছিল। ইয়াৰ পৰিণতিতে আজি সীমিত সংখ্যক বাতৰি-কাকতত দলটোৱে কেবিনেট বৈঠকত বিষয়টো উত্থাপন কৰিছিল বুলি সংবাদ ওলায়।
