উত্তৰ -পূৰ্বাঞ্চলৰ বিচ্ছিন্নতাবাদী সংগঠন সমুহৰ উমৈহতীয়া সংগঠন য়ুনাইটেড নেশ্যনেল লিবাৰেইশ্যন ফ্ৰন্ট অব ছাউথ-ইষ্ট এছিয়াই আগন্তুক গণৰাজ্য দিৱস বৰ্জনৰ আহ্বান জনাইছে। সংগঠনটোৰ সভাপতি খাংগো কন্যাক স্বাক্ষৰিত এক বিবৃতিযোগে সংগঠনটোৱে আগন্তুক গণৰাজ্য দিৱসৰ সকলো চৰকাৰী কাৰ্যসূচী বিফল কৰিবলৈ সেইদিনা ২৪ ঘণ্টীয়া উত্তৰ-পূব বন্ধ ঘোষণা কৰিছে। বিবৃতিটোত সভাপতিগৰাকীয়ে দাবী কৰে যে উত্তৰ-পূব ভাৰত কেতিয়াও মূল ভাৰতবৰ্ষৰ অংগ নাছিল আৰু স্বাধীনতাৰ ৬৯ বছৰ ধৰি ভাৰতবৰ্ষই উত্তৰ-পূবক কেবল এখন উপনিৱেশৰ দৰে শোষণ কৰি আহিছে। বিভিন্ন সময়ত ভাৰত চৰকাৰে উত্তৰ পূবৰ সংগ্ৰামী সংগঠনসমূহৰ সৈতে অনুষ্ঠিত কৰা আলোচনা সমূহেও উত্তৰ-পূবৰ মূল সমস্যাসমূহ সমাধানত ব্যৰ্থ হোৱা বুলি তেওঁ ক্ষোভ প্ৰকাশ কৰে। উত্তৰ-পূবৰ স্বাধীন জনসাধাৰণক দমন কৰাৰ বাবে ভাৰত চৰকাৰে AFSPAৰ দৰে মানব অধিকাৰ পৰিপন্থী আইন ব্যবহাৰ কৰি আহিছে বুলি তেওঁ ভাৰত চৰকাৰক তীব্ৰ সমালোচনা কৰে। আনকি উত্তৰ-পূবৰ প্ৰতিবাদী কণ্ঠসমূহ ৰুদ্ধ কৰিবলৈ ভাৰত চৰকাৰে NIAৰ দৰে তদন্তকাৰী সংস্থাসমূহ ব্যবহাৰ কৰে বুলিও তেওঁ অভিযোগ উত্থাপন কৰে। এই পৰিপ্ৰেক্ষিতত সংগঠনটোৱে অহা ২৬ জানুৱাৰিত সকলো চৰকাৰী কাৰ্যসূচীৰ পৰা আঁতৰি থাকিবলৈ ৰাইজলৈ আহ্বান জনাইছে।
উল্লেখযোগ্য যে উত্তৰ-পূবৰ নাগালেণ্ড, অসম, মণিপুৰ আদি ৰাজ্যৰ ভালেকেইটা তথা শক্তিশালী সন্ত্ৰাসবাদী সংগঠনৰ উমৈহতীয়া মঞ্চৰূপে আত্মপ্ৰকাশ কৰা সংগঠন য়ুনাইটেড নেশ্যনেল লিবাৰেইশ্যন ফ্ৰন্ট অব ছাউথ-ইষ্ট এছিয়া (য়ু এন এল এফ ডব্লিউ)ত অসমৰ অন্যতম সশস্ত্ৰ সংগঠন সংযুক্ত মুক্তি বাহিনী অসম চমুকৈ আলফা (স্বাধীন)ও অন্যতম সদস্য।
