কলিয়াবৰ আৰ্ট চ’ছাইটিয়ে গ্ৰহণ কৰিছে এক অভিনৱ কাৰ্যসূচী । ৰাজ্যত সঘনাই সংঘটিত হৈ থকা হত্যা, ধৰ্ষণ, নাৰী নিৰ্য্যাতন, ডাইনী হত্যাৰ দৰে কু-সংস্কাৰ ৰোধ কৰাৰ উদ্দেশ্যে জনসাধাৰণৰ মাজত সজাগতা সৃষ্টিৰ প্ৰয়াসেৰে কিছু চিত্ৰশিল্পীয়ে কেনভাচত ৰং-তুলিকাৰে এই সমূহ সমস্যা সমাধানৰ বাবে জনসাধাৰণক সজাগ কৰা পৰিলক্ষিত হৈছে।
কলিয়াবৰ আৰ্ট চ’ছাইটিৰ উদ্যোগত কুঁৱৰীটোলৰ চহিদ স্মৃতিস্তম্ভ প্ৰাংগনত অসমৰ জলন্ত সমস্যাসমূহক লৈ আয়োজন কৰিছে এই কেনভাচ অনুষ্ঠানৰ।
ৰাজ্যৰ কেইবাখনো জিলাৰ পৰা সমাগম ঘটা ২০ গৰাকীকৈ চিত্ৰশিল্পীৰ হাতৰ পৰশত এইদৰে জীৱন্ত ৰূপ পাইছে অসমৰ জলন্ত সমস্যাসমুহ। ৰং-তুলিকাৰে ৰাজ্যৰ সামাজিক ব্যাধিস্বৰূপ সমস্যাসমুহ ৰাইজৰ আগত প্ৰকাশ কৰি সেইসমুহ প্ৰতিৰোধ কৰা আহ্বান এইসকল চিত্ৰশিল্পীৰ।
আনহাতে চিত্ৰশিল্পৰে অসমৰ জলন্ত সমস্যা, অন্ধবিশ্বাস, কু-সংস্কাৰৰ লগতে হত্যা-হিংসা, নাৰী নিৰ্য্যাতন, শিশু নিৰ্য্যাতন তথা প্ৰকৃতি ধ্বংসৰ বিৰুদ্ধে অভিনৱ প্ৰতিবাদৰে জনসাধাৰণৰ মাজত সজাগতা সৃষ্টিৰ উদ্দ্যেশ্যে দীৰ্ঘদিনৰে পৰা বিভিন্ন ঠাইত ভিন্ন কাৰ্য্যসূচী হাতত লৈ আহিছে কলিয়াবৰ আৰ্ট চ’ছাইটিয়ে।
সজাগতামুলক চিত্ৰশিল্প কাৰ্য্যসূচীৰ অন্তত অনুষ্ঠানত অংশগ্ৰহণ কৰা চিত্ৰশিল্পীসকলক একোখনকৈ মানপত্ৰ প্ৰদান কৰে কলিয়াবৰ আৰ্ট চ’ছাইটিয়ে।
