অসম ৰাজ্যিক পৌৰ জীৱিকা অভিযান (Assam State Urban Livelihoods Mission(ASULM))ৰ অধীনত আজি ডিব্ৰুগড়ৰ পৌৰ নিগমৰ অন্তৰ্ভুক্ত আত্মসহায়ক গোটবোৰৰ মাজত সক্ষমতা বিকাশ কাৰ্য্যসূচী গ্ৰহণ কৰে। পৌৰ এলেকাৰ পৰা দৰিদ্ৰতা নিৰ্মূল কৰাৰ লক্ষ্যেৰে এই প্ৰশিক্ষণ কাৰ্যসূচী লোৱা হৈছে বুলি কৰ্তৃপক্ষটোৱে জানিবলৈ দিছে। ৰাষ্ট্ৰীয় পৌৰ জীৱিকা অভিযান National Urban Livelihood Mission(NULM)ৰ নগৰ প্ৰকল্প মেনেজাৰ ইন্দ্ৰজিৎ গামে এই সন্দৰ্ভত কয়, ‘ডিব্ৰুগড় পৌৰ সভাৰ অন্তৰ্গত ১৯৯টা আত্মসহায়ক গোটৰ প্ৰায় ২০০ মহিলাক আত্মসহায়ক গোট পৰিচালনা, হিচাপ ৰখা কাম, আত্মসহায়ক গোটৰ সমাবায় গঠন আদি বিষয়ত পৰৱৰ্তী ৬০ দিন ধৰি প্ৰশিক্ষণ দিয়া হ’ব। এইটো হ’ল মহিলাক অৰ্থনৈতিকভাৱে স্বাধীন কৰাৰ উদ্দেশ্যে লোৱা সক্ষমতা বিকাশৰ বৃহৎ অভিযান।’
তথ্যমতে ডিব্ৰুগড় পৌৰ সভাৰ অন্তৰ্গত মুঠ ৬৪৪ আত্মসহায়ক গোট আছে।
জানিব পৰামতে মহিলাসকলক প্ৰশিক্ষণ দিবলৈ প্ৰশিক্ষকসকল অৰুণাচল প্ৰদেশৰ পৰা আহিছে। তেওঁ জনোৱা মতে এই প্ৰশিক্ষণে মহিলাসকলক আত্মসহায়ক গোটবোৰ ভালদৰে পৰিচালনা কৰিবলৈ সমৰ্থ কৰি তুলিব। ইয়াৰ পূৰ্বেও ডিব্ৰুগড় চহৰৰ ১২২ টা আত্মসহায়ক গোটৰ মহিলাসকলে একে ধৰণৰ প্ৰশিক্ষণ লৈছিল বুলিও তেওঁ জানিবলৈ দিয়ে।
উল্লেখযোগ্য যে ৰাষ্ট্ৰীয় পৌৰ জীৱিকা অভিযান National Urban Livelihood Mission(NULM)ৰ লক্ষ্য হ’ল লাভজনক আত্মনিয়োগৰ ব্যৱস্থা আৰু দক্ষতাপূৰ্ণ মজুৰিভিত্তিক নিয়োজনৰ সুবিধা সৃষ্টিৰ জৰিয়তে নগৰীয়া দৰিদ্ৰসকলৰ দৰিদ্ৰতা হ্ৰাস কৰা।
আনহাতে নগৰৰ গৃহহীন লোকসকলৰ বাবেও পৰ্য্যায়ক্ৰমে আশ্ৰয়ৰ ব্যৱস্থা কৰাটোও NULMৰ এটা লক্ষ্য। প্ৰকল্প মেনেজাৰজনে কয় যে আত্মসহায়ক গোটবোৰক তেওঁলোকৰ গোটটো গঠন কৰাৰ বাবে ১০ হাজাৰকৈ টকাৰ সাহায্য আৱৰ্তী পুঁজি (RF) দিয়া হয়।
